မတ်မလီု၊ ဨပရဴ ၁၉
ပ္ဍဲတွဵုရးဍုၚ်မန် နဒဒှ်စၟတ်သမ္တီတ္ၚဲသၞာံတၟိမံက်တုဲ ပ္ဍဲကဵုကောန်ထံၚ်ပရေၚ်ဍုၚ်ကွာန် ကံၚ်ဇြဳပၞာန် ကလေၚ်ဗလးကဵုလဝ်ဂမၠိုၚ် ကောန်ထံၚ်ပရေၚ်ဍုၚ်ကွာန်ၜါတၠဟေၚ် ပါလုပ်ဂှ် ကိုဝ်တိုက်ထောန်ဥူ ညးမၞုံအခေါၚ်ဟီုဂး ဇာဇၞိက်ကောန်ထံၚ်ပရေၚ်ဍုၚ်ကွာန်စပ်ကဵုအလုံဍုၚ်ဗၟာ PPNM ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ဂိတုဨပပရဴ ၁၇ တ္ၚဲသၞာံတၟိမံက်ဂှ် နဒဒှ်စၟတ်သမ္တီသၞာံတၟိဍုၚ်ဗၟာတုဲ ကောန်ထံၚ်ပရေၚ်ဍုၚ်ကွာန် နွံအပ္ဍဲထံၚ်နာနာ အလုံဍုၚ်ဗၟာဂှ် ကဵုလဝ်အခေါၚ်ဗလးနူဒုဟ်ဒဏ် ၄၈၀၀ တၠပြၚ်ရ။
ပ္ဍဲကဵုဏံ နူကဵုထံၚ်စာတ်၊ အချုက်၊ ဂုက် အပ္ဍဲတွဵုရးဍုၚ်မန် ၁၀ ဂှ် ကောန်ထံၚ်တြုံတြုံ ဗြဴဗြဴ အပံၚ်ဖအိုတ် ၅၁၃ တၠ ကဵုလဝ်အခေါၚ်ဗၠးနူဒုဟ်ဒဏ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒကံၚ်ဇြဳပၞာန်ရ။
ကိုဝ်တိုက်ထောန်ဥူ ညးမၞုံအခေါၚ်ဟီုဂး PPNM ဂှ်တှ်ေ ပ္ဍဲအရာမကဵုလဝ်အခေါၚ်ဗၠးနူဒုဟ်ဒဏ် ပ္ဍဲတွဵုရးဍုၚ်မန်ဂှ် ကောန်ထံၚ်ပရေၚ်ဍုၚ်ကွာန် ပါလုပ်လဝ်ၜါတၠဓဝ်ရဂှ် ဂွံမိၚ်တီကေတ်တုဲ ညးမပါလုပ်ဂမၠိုၚ်ဂှ်လေဝ် ဒှ်ညးကြပ်ကဵုတ္ၚဲဗၠးတိတ်တံရဂှ် ဟီုရ။
“ပ္ဍဲတွဵုရးဍုၚ်မန်ဂှ်တှ်ေ ၜိုတ်ထံၚ်ကျာ်မြဟ်ရဂှ် ကောန်ထံၚ်ပရေၚ်ဍုၚ်ကွာန်ၜါတၠရ ပါဂှ် ဂွံတီကေတ်ရ။ ပ္ဍဲထံၚ်သှ်ေဒၟံၚ်တံဂှ်တှ်ေ ကောန်ထံၚ်ပရေၚ်ဍုၚ်ကွာန်ပါဂှ် ဟွံဂွံမိၚ်ကေတ်ပုဟ်။ ညးမဗၠးအာတံဂှ်လေဝ် ဒှ်ညးမကြပ်ကဵုတ္ၚဲဗၠးတံတုဲမ ပါအာ ပ္ဍဲတ္ၚဲဗၠးတံဂှ်ဏောၚ်။ ဒးဟီုမ္ဂး မၞိဟ်ကြပ်ကဵုတ္ၚဲဗၠးတံရ ပါပ္ဍဲအခေါၚ်ဗလးနူဒုဟ်ဒဏ်တံဂှ် ဂွံဆဵုကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုကံၚ်ဇြဳပၞာန် ကဵုလဝ်အခေါၚ်ဗၠးနူဒုဟ်ဒဏ် ပ္ဍဲတွဵုရးဍုၚ်မန်ဂှ် လၟိဟ်ကောန်ထံၚ်ပရေၚ်ဍုၚ်ကွာန် ပါလုပ် ချိုတ်တ်ပၠိုတ်တ်ဂှ် ဆက်ဂၠိုက်ဂၠါဲဒၟံၚ်ဖိုဟ်တုဲ လၟိဟ်ၜိုတ်ညိညရ နွံမာန်ဂှ် ညးဆက်ဟီုရ။
ကံၚ်ဇြဳပၞာန်ဂှ်တှ်ေ ကုညးမကဵုလဝ်အခေါၚ်ဗၠးနူဒုဟ်ဒဏ်တံဂှ် အတိုၚ်သၞောဝ်ဥပဒေရာဇဝတ် ၝောံပိုဒ် ၄၀၁၊ ၝောံပိုဒ်ပါ် (၁) ဂှ်မ္ဂး ယဝ်ထပ်ကလိလောန်ဒုဟ် မွဲဝါပၠန်မ္ဂး မ္ၚးနူကဵုဒုဟ်ဒဏ်ဏံဂှ် ဒုဟ်ဒဏ်မသှ်ေသၟေဟ်ဒၟံၚ်လၟုဟ်တံဂှ်လေဝ် ဆက်တုဲဒးဒုၚ်အာဏောၚ် နကဵုစေဝ်ပၞောန်သာ်ဏံဂှ် ဗလးကဵုလဝ်ရ။
ကောန်ထံၚ်ပရေၚ်ဍုၚ်ကွာန်တြေံတံဂှ်တှ်ေ ပ္ဍဲဒၞါဲဗလးကဵုကောန်ထံၚ်ပရေၚ်ဍုၚ်ကွာန်တံဂှ် ညးမကြပ်ကဵုတ္ၚဲဗလးတံဂှ်ရဟေၚ် ကံၚ်ဇြဳပၞာန်တံ ကေၚ်ဗလးကဵုလဝ်နွံတုဲ ကောန်ထံၚ်ပရေၚ်ဍုၚ်ကွာန်သှ်ေတံဂှ်တှ်ေ ဖျေံစၟတ်ဒဏ်ထံၚ်သၠုၚ်အိုတ်တုဲ ကဵုမံၚ်ဒၟံၚ်အပ္ဍဲထံၚ်ရောၚ် ဟီုရ။
အတိုၚ်တၚ်နၚ် ဇာဇၞိက်ကောန်ထံၚ်ပရေၚ်ဍုၚ်ကွာန်စပ်ကဵုအလုံဍုၚ်မွဲ PPNM ဂှ်မ္ဂး ပ္ဍဲစရၚ်ကံၚ်ဇြဳပၞာန် ဗလးကဵုဒုဟ်ဒဏ် အလုံဍုၚ်မွဲ တ္ၚဲသၞာံတၟိမံက်ဂှ် ကောန်ထံၚ်ပရေၚ်ဍုၚ်ကွာန် ၜိုတ် ၂၀၀ ရဟေၚ် ပါလုပ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SAC Telegram