မတ်မလီု၊ ဨပရဴ ၂၀
ဟိုတ်နူပေါဲဗ္တိုက် မက္တဵုဒှ်ဒၟံၚ် ပ္ဍဲတွဵုရးကရေၚ် ဍုၚ်ကအ်ကြိက် သ္ကုတ်သၟဝ်ကျာကဵု မွဲဒမြိပ်ဂၠံၚ်အာယှ ကြုၚ်ဒဵု−ကအ်ကြိက်ဂှ်တုဲ ညးပါဲကၠုၚ်ဘဲပၞာန် လ္ပာ်ဍုၚ်မတ်မလီု တွဵုရးဍုၚ်မန် ဂၠိုၚ်ကၠုၚ်ဂှ် ညးမရီုဗၚ်ကဵုဒၟံၚ် ပရေၚ်ညးပါဲဘဲပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပေါဲဗ္တိုက်ကအ်ကြိက်ဂမၠိုၚ်ဝွံ စနူတ္ၚဲအတးစှ်ေတေံတုဲ အကြာဂကောံဇြဟတ်ပၠန်ဂတး သၟဝ်သ္ကိုပ်သ္ကဒပ်ပၞာန်ဗၠးၜးကောန်ဂကူကရေၚ် KNLA ကဵု ဒပ်ကံၚ်ဇြဳပၞာန်တံဂှ် ပေါဲဗ္တိုက်က္တဵုဒှ်ဒၟံၚ် ကြပ်အရိုဟ်တ္ၚဲရ။
မ္ၚးနူပေါဲဗ္တိုက်ၜါလ္ပာ်ဂှ် ဟိုတ်နူကံၚ်ဇြဳပၞာန် ဗ္တိုက်ကဵုပၞာန်ကျာတုဲ မ္ၚးနူကဵုကွာန်ကအ်ဗိုတ်၊ ဂြိုပ်ကြုက်၊ ကွာန်(ရေပူ) မၞုံအပ္ဍဲပွိုၚ်ဍုၚ်ကအ်ကြိက်တံဂှ် ညးဍုၚ်ကွာန်ဒေသဂၠိုၚ်ကဵုလ္ၚီ နူကဵုကွာန်ဟွံအောန်နူ ၁၀ ကွာန် ဒးပါဲဒၟံၚ်ဘဲပၞာန်ရ။
ညးမရီုဗၚ်ကဵုဒၟံၚ်ပရေၚ်ပါဲဘဲပၞာန်မွဲတၠဂှ်တှ်ေ ညးပါဲဘဲပၞာန် စိုပ်ကၠုၚ်မတ်မလီုဂမၠိုၚ်ဝွံ မံၚ်ဒၟံၚ် ပ္ဍဲသ္ၚိမသကလောကောဒေံ မကြပ်တံ နွံတုဲ မံၚ်ဒၟံၚ် ပ္ဍဲဘာလကျာ်တံလေဝ် နွံတုဲ ပြဟ်ဟ်ဏံ နွံပၟိက်ဒၟံၚ်ကဵုဇွောံမစၞစတံရောၚ် ဟီုရ။
“လ္ပာ်မတ်မလီုဂှ်တှ်ေ ပြဟ်ဟ်ဏံ အာကၠုၚ်ဒၟံၚ် သ္ၚိမသကလောကောဒေံ မကြပ်တံ နွံ။ တုဲတှ်ေ လ္ပာ်ကွာန်တၟိဂှ်တှ်ေ ပ္ဍဲဘာလကျာ်။ ကောံမံၚ်ဒၟံၚ် ဗၞတ် ၁၀၀၊ ၁၅၀ နွံရ။ ပြဟ်ဟ်ဏံ တၚ်နွံပၟိက်ဂှ်တှ်ေ ညးတံပါဲကၠုၚ်ဘဲပၞာန်လ္ပာ်ဏံတုဲ နွံပၟိက်ကဵုဇွောံမစၞစတံရ။ မွဲပၠန်ဂှ် လအ်ၜိုတ်လဵုဟွံတီပုဟ်။ ဍာ်ဇမၠိၚ် ဒှ်ကၠုၚ်သာ်လဵုဟွံတီဏီတုဲ ညအ်ဂှ် ဒှ်သ္ဇက်ဒးပသတိမွဲဏောၚ်” သာ်ဝွံ သ္ဂးရ။
ညးမရီုဗၚ်ကဵုဒၟံၚ်ပရေၚ်ပါဲဘဲပၞာန်တံ ထံက်ပၚ်ကဵုဒၟံၚ် ဇွောံမစၞစ ကုညးပါဲဘဲပၞာန်တံ နွံတုဲ လၟိဟ်ညးပါဲဘဲပၞာန်တံ ဂၠိုၚ်ကၠုၚ်ဗက် ဗၞိက်စသုၚ်သ္ဇိုၚ်၊ ဂဥုဲဇဗတံလေဝ် နွံပၟိက်ကၠုၚ်ဏောၚ်ဂှ် ညးဆက်ဟီုရ။
အခိၚ်လၟုဟ်ဂှ်လေဝ် ပေါဲဗ္တိုက်ၜါလ္ပာ်တံ ဆက်သ္ကာတ်မြဟ်ဒၟံၚ်တုဲ ကံၚ်ဇြဳပၞာန် ဗ္တိုက်ဒၟံၚ်ကွာန်ဂမၠိုၚ် နကဵုပၞာန်ကျာ၊ လွဟ်ဇၞော် ပါလုပ်သီုကဵု ဒရုၚ်တံဂှ်တုဲ ညးပါဲဘဲပၞာန်တံ ထပ်ဂၠိုၚ်တိုန်ကၠုၚ်မာန်ဂှ် ညးမရီုဗၚ်ကဵုဒၟံၚ် ပရေၚ်ပါဲဘဲပၞာန်တံ ဟီုရ။
အပ္ဍဲပေါဲဗ္တိုက်ဂှ် ကံၚ်ဇြဳပၞာန် ထောံမခတိုဟ်ကဵုက္ၜၚ်ကျာ၊ ပန်ပှော်လွဟ်ဇၞော်တံသၟးဟွံက ဟိုတ်နူဗ္တိုက်ကၠုၚ်သီုဒရုၚ်တံဂှ်တုဲ ညးဍုၚ်ကွာန်ဒေသနူကဵုကွာန်ဂမၠိုၚ် အပ္ဍဲအခိၚ်အတးဂှ် ဗၞတ် ၂၀ တၠ လမျီုဒးအိုတ်အာလဝ်တုဲ ဟွံအောန်နူ ၂၂ တၠ ဇီုကပိုက်ကလိဂွံလဝ်ဝပ်ရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် သ္ဂးရ။
ဗော်သွးကောန်ဂကူကရေၚ် KNU ဗဟဵုဂှ်လေဝ် အပ္ဍဲတွဵုရးကရေၚ်ဂှ် ပေါဲဗ္တိုက်ဒှ်ဒၟံၚ် ဗွဲမသ္ကာတ်မြဟ်ဂှ်ရ နကဵုညးဍုၚ်ကွာန်ဂမၠိုၚ် ကိစ္စကာတၟေၚ်ဟွံမွဲမွဲသာ် လ္ပအာကၠုၚ် အပ္ဍဲဒေသဒၞါဲပေါဲဗ္တိုက်က္တဵုဒှ်ဒၟံၚ်တံအိုတ်ညိဂှ် ပ္ဍဲဂိတုဨပရဴ ၁၉ တေံ ကဵုသတိလလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−Nai Aung (Fb)