မတ်မလီု၊ ဂျောန် ၁၈
ပ္ဍဲကဵုမၞိဟ်ဒးဒုၚ်ပကောံမံၚ် သွက်တန်ဗ္တောန်ကွတ်ပၞာန် လၟေၚ် ၁၄ ကံၚ်ဇြဳပၞာန်ပံက်ကၠုၚ် ပ္ဍဲတွဵုရးဍုၚ်မန်ဂှ် ဟိုတ်နူဍိုက်ဒးယာန်လာၚ်ဇြေန်ဟွံမွဲတုဲ မၞိဟ်ဒးဒုၚ်ရပ်လဝ်တအ်ဏံလေဝ် ပါလုပ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ ပ္ဍဲကဵုဌာန်ဂအုပ်ပၞာန်ရးဂမၠိုၚ် ညးတံမထိၚ်ဒက်လဝ်ဂှ် ပ္ဍဲဂိတုဂျောန် စၟတ်တ္ၚဲ ၁၆ ဂှ် စပံက်လဝ်တန်ဗ္တောန်ကွတ်ပၞာန် လၟေၚ် ၁၄ ယျဂှ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒရ။
ကံၚ်ဇြဳပၞာန်ဝွံ ကၠာဟွံဂွံပံက်တန်ဗ္တောန်ကွတ်ပၞာန်ဏံ ပပ္တံနူဂိတုမေ သတ္တာဟလက္ကရဴအိုတ်ဂှ်တုဲ စရပ်ကၠုၚ်မံၚ်ကွဳလာၚ်ဇြေန်ဟွံမွဲတံဂှ်တုဲ သၟတ်မပါလုပ် ပ္ဍဲကဵုညးဒေသ ညးတအ်မရပ်ဂွံတအ်ဂှ် ပကောံဒၟံၚ်ကောန်ဒပ်တၟိတၟိ သွက်ဂွံယိုက်လျိုၚ်ပၞာန်ရ။
ညးဒေသတွဵုရးမန်မွဲတၠ ဟွံမိက်ထ္မံက်ယၟုဂှ်တှ်ေ ပ္ဍဲကဵုလၟေၚ်ဒဒှ်ရပ်ဂွံယာန်လာၚ်ဇြေန်ဟွံမွဲ လ္ၚဵုဂှ်တှ်ေ ညးဗက်ကဵုသြန်ဟွံမာန်တအ် ကေုာံ ညးဟွံကၠိုဟ်ခၠၚ်တအ် ဒးဒုၚ်ပကောံပဒၟံၚ်ကောန်ပၞာန်ရောၚ် ဟီုရ။
“ ညးဒးဒုၚ်ပကောံပလဝ်ကောန်ပၞာန်တအ်ဂှ်တှ်ေ ရပ်ဂွံလဝ်ယာန်ဟၟဲကဵုလာၚ်ဇြေန်တုဲ ရဲသ္ၚိဗက်ကဵုလှုဲဟွံမာန်တအ်ဂှ် ကော်ဏာ ပ္ဍဲဒပ်ပၞာန်ရ။ ဒုၚ်ဖျေံထံၚ်ဟာ။ ကၠောန်ပ္ဍဲဒပ်ဂှ်ဟာ။ ဒုၚ်စောဲအမှု နကဵုသၞောဝ်ဟာ။ ယဝ်လုပ်ပ္ဍဲဒပ်ဏံတှ်ေ ဟွံဒးအာပေါဲဗ္တိုက်ပုဟ်၊ ကလေၚ်ကၠောန် ပ္ဍဲဍုၚ်ဇကု ပ္ဍဲကွာန်ဇကု ဗီုဏံရ။ စန်ဒက် ဘပဠ ကၠုၚ်ဒၟံၚ်သာ်ဏံရ” သာ်ဝွံ သ္ဂးရ။
ညးဒးဒုၚ်ပကောံပလဝ်ကောန်ပၞာန် ဗွဲမဂၠိုၚ် ဟိုတ်နူကဵုဍိုက်ဒးယာန်လာၚ်ဇြေန်ဟွံမွဲတုဲ မဒးဒုၚ်ရပ်လဝ်ဂှ်ဝွံ ဖေက်ဒးထံၚ်တုဲ လုပ်ကၠုၚ်လဝ်ပၞာန်တုဲ မုမှတီလဝ်လေဝ်ဟွံမွဲပုဟ်ဂှ် ညးဆက်ဟီုရ။
ညးဒေသတွဵုရးမန် ဟွံမိက်ထ္မံက်ယၟုမွဲတၠပၠန်ဂှ်လေဝ် ကံၚ်ဇြဳပၞာန်ဝွံ ထ္ၜးဟိုတ်ကဵု ပရေၚ်ရပ်ယာန်လာၚ်ဇြေန်ဟွံမွဲတံဂှ်တုဲ ဗက်ရပ်ဒၟံၚ် ဒၞါဲစုၚ်တုဲ ယဝ်ရပ်ဂွံမ္ဂး သီဒၟံၚ်သီုကွဳစက် ရပ်ဏာသီုမၞိဟ်တုဲ ပကောံဒၟံၚ်ကောန်ပၞာန် နွံဒၟံၚ်ရောၚ် ဟီုရ။
“ ယဝ်လာၚ်ဇြေန်ဟွံမွဲတှ်ေ ရပ်ဒၟံၚ်စၟအ်ဒၞါဲရ။ လ္ၚဵုဂှ်တှ်ေ ရပ်ဒၟံၚ်ကဵုဂကောံဟွံသေၚ်ပုဟ်။ လဆောဝ်လဆောဝ် တတ်အာဂတမုက်ဗ္ဒိုပ်ဂှ်မ္ဂး ဗဒေါအ်လဝ်ဂှ်နွံ။ လဆောဝ်ပၠန် အခိၚ်ဍေံတံဂေတ်ကဵုကွဳစက် ယဝ်ကွဳလိုန်ဓာတ်ဇကု လာၚ်ဇြေန်ဟွံမွဲမ္ဂး ဍေံတံရပ်ဏာလဝ်ရ။ ပ္ဍဲကွာန်ဂှ်လေဝ် ရပ်ဒၟံၚ်ရ။ ရပ်ဂွံသီုမၞိဟ် သီုကွဳလိုန်ဓာတ်မ္ဂး ကလေံထောံသီုမၞိဟ်” သာ်ဝွံ သ္ဂးရ။
ဍိုက်ကွဳလာၚ်ဇြေန်ဟွံမွဲတုဲ ဒးဒုၚ်ရပ်မ္ဂး လ္ၚဵုဂှ်တှ်ေ ကဵုသြန်ဂၠိုၚ်ၚ်တုဲ ကလေၚ်ဗလးကၠုၚ်လဝ်တုဲ လ္ၚဵုဂှ်ပၠန် ဒးဒုၚ်ဖျေံထံၚ်တုဲ လ္ၚဵုဂှ်တှ်ေ ကၠေံအာကီုလေဝ် စိုပ်အာအလဵုရောဟီုဂှ် ဟွံဂွံတီကေတ်ပုဟ်ဂှ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ မ္ၚးနူကွဳစက်၊ ကွဳလိုန်ဓာတ် လာၚ်ဇြေန်ဟွံမွဲတအ်ဂှ် သီုကဵုကွဳသၠာပိတံဂှ် ဖျေံအစဳဇန်တုဲ ရပ်ဒၟံၚ်ဇၞော်ကဵုဇြဟတ် ပ္ဍဲကဵုဒၞါဲလုပ်တိတ်ဍုၚ်၊ ဒၞါဲယာန်အာကၠုၚ်ဂၠိုၚ်၊ ဒၞါဲဟွံထေၚ်လဝ်တံဂှ်တုဲ ဂွံပရိုၚ်တုဲ ဗက်ရပ်ဒၟံၚ်စဵုကဵုအပ္ဍဲသ္ၚိရ။
ဌာနမဆေၚ်စပ်သၟဝ်တဲကံၚ်ဇြဳပၞာန်ဂမၠိုၚ်ဝွံ ရပ်ကၠုၚ်ကွဳလာၚ်ဇြေန်ဟွံမွဲတံဂှ်တုဲ ဂွံမံၚ်ပၞော်သြန်ဟွံဗဗွဲကဵုသၞောဝ်တုဲ မွဲလ္ပာ်ဂှ်ပၠန်လေဝ် ဂွံမံၚ်ကောန်ပၞာန်တၟိ သွက်တန်ဗ္တောန်ကွတ်ပၞာန် မပံက်ဒၟံၚ်လၟေၚ်ဂိတုဂှ်ရောၚ် ညးဒေသဂမၠိုၚ် ဟီုအိုတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပကောံပကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန်ဏံ ပ္ဍဲကဵုတန်ဗ္တောန်ကွတ်ပၞာန်ကံၚ်ဇြဳပၞာန် ပံက်ကၠုၚ်လဝ် နူလၟေၚ် ၁ စဵုကဵု လၟေၚ် ၁၃ ဂှ် ညးဒးဒုၚ်ပကောံပကောန်ပၞာန် နွံကၠုၚ် စဵုကဵု ၂၂၀၀ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI