ဒဳဟဳရာန်၊ ဂျောန် ၁၈
ဂကောံကုလသမဂ္ဂ မၚ်ရံၚ်နျူကလဳယျာ ထ္မံက်ထ္ၜးလဝ် ဒဒှ်ရရုၚ်စက်သ္အးဇ္ၚးယူရေနဳယာန် ရုၚ်စက်အဳရာန်ဇၞော်အိုတ်ဂှ် ဒးဇီုကပိုက်လဝ် ဇၞော်ကဵုဇြဟတ်တုဲ ကြဴနူအေဿရေ ဗ္တိုက်ကၠုၚ် ရုၚ်ဗလးရုပ်ရမျာၚ်ကၟိန်ဍုၚ်အဳရာန် ပ္ဍဲဂိတုဂျောန် ၁၆ တေံတုဲဂှ် ဒဳဟဳရာန် ဖအောဝ်ကၠုၚ် အမေရိကာန် သွက်ဂွံကဵုဇြဟတ်ဓရိုဟ် ညံၚ်ဂွံဒေါအ်ပရေၚ်ပန်ပှော်ရ။
အေဿရေ ဟီုကၠုၚ် ဒဒှ်ရဗ္တိုက်လဝ် ဂကောံဗလးရုပ်ရမျာၚ်အဳရာန်တုဲ အခိၚ်ပရေၚ်ဗတိုဟ်ထ္ကးဒှ်ဂှ် ညးဗြဴလလောၚ်ပရိုၚ်ဂှ် ဂြိပ်တိတ်အာ ဂရက်ဂရက်ဂဗက်ဂဗက်ဂှ် ဂွံဆဵုကေတ် ပ္ဍဲဗဳဒဳယောသ္ကုတ်ရ။
စမြိုၚ်ဏံဂှ် ဒပ်ပၞာန်အဳရာန် ရပ်စပ်စကာဒၟံၚ် နဒဒှ်သေန်တာပလံၚ်ဗစိုပ်ပရိုၚ်ဏောၚ်ဂှ်လေဝ် ဒပ်ပၞာန်အေဿရေ ဟီုလဝ်ရ။
ပဋိပက္ခအကြာၜါဍုၚ်ဏံဝွံ ပ္ဍဲဂိတုဂျောန် ၁၇ ဏံမ္ဂး ဒှ်ကၠုၚ်မရနုက်ကဵုမသုန်တ္ၚဲယျတုဲ ဟိုတ်နူအဳရာန် ထပ်ဗ္တိုက်ဒၟံၚ်အေဿရေ နကဵုကမ်လှောဝ်တံဂှ်တုဲ ပ္ဍဲဍုၚ်ဒဴဝှေတ်ဂှ် အခိၚ်သ္ဂာဗ္တံလောန်မ္ဂး ဗြုညာန်ဒၟံၚ် နကဵုရမျာၚ် မကဵုသတိ ပရေၚ်ဗ္တိုက်ပၞာန်ကျာတံဂှ်ရ။
ဝန်ဇၞော်ကာဍုၚ်သ္အာၚ်အဳရာန် အဗာတ် အရာချဳဂှ်တှ်ေ နကဵုအဳရာန် ၜိုန်ရှ်ေသှ်ေတဴပရေၚ်ကလုတ်တမာန်ကီုလေဝ် ပြဟ်ဟ်ဏံ စွံလဝ်အာရီု သွက်ဂွံဆေၚ်မုက်ဒိဓဗတ်သၟးရဂှ် ဟီုလဝ်ကဵုဝန်ဇၞော်ကာဍုၚ်သ္အာၚ်ယူရောပ် ပန်တၠဂှ် ဌာန်ပရိုၚ်ကၟိန်ဍုၚ်အဳရာန် ထ္မံက်ထ္ၜးလဝ်ရ။
တၚ်ရန်တၟအ် ညးတံမ္ဒးဗ္တိုက်ကၠုၚ်ဂှ်ဝွံ သွက်ဂွံဗဒေါအ်ကၠေံ ပရေၚ်အဳရာန် သ္ဂောံပတိတ်လွဟ်နျူကလဳယျာတံဂှ်ရောၚ် အေဿရေ ဟီုရ။
ကောန်ဍုၚ်အဳရာန် ဗွဲမဂၠိုၚ် မဒှ်ကောန်အရာပ်ဂှ်တှ်ေ ဒးချိုတ်အာလဝ် ၂၂၄ တၠ လ္ပာ်လ္တူဂှ် လ္ပာ်အဳရာန် ဟီုလဝ်ရ။
ဟိုတ်နူပရေၚ်အဳရာန် ဗ္တိုက်ကၠုၚ်ဂှ်တုဲ ညးမဒးချိုတ်အာ ၂၄ တၠ နွံတုဲ ဒှ်ကောန်အရာပ်သီုဖအိုတ်ရောၚ် အေဿရေ ကဵုလဝ်သမ္တီရ။
တၞဟ်နသ္ဂောံဒေါအ်ပန်ပှော်တုဲ သွက်ဂွံကဵုဇြဟတ်ဓရိုဟ် ကုသ္ကိုပ်ဝန်ဇၞော်အေဿရေ နေတာန်ညာဟုဂှ် အဳရာန် အာတ်လဝ်အရီုဗၚ် ကုအိုဝ်မာန်၊ ကာတာ၊ သဝ်ဒဳအာရေဗဳယျာ ညံၚ်ဂွံကဵုဇြဟတ်ဓရိုဟ် ကုသမ္မတအမေရိကာန် ဒဝ်နေဝ်ထြာမ်ဂှ် တမ်ရိုဟ်ပရိုၚ်ဂမၠိုၚ် ဟီုကၠုၚ်ရ။
ဟိုတ်နူအေဿရေ ဗ္တိုက်ကၠုၚ်အဳရာန်တုဲ သ္ကိုပ်ဗိုလ်အဳရာန် ကဆံၚ်သၠုၚ်ၚ်ဂမၠိုၚ် ကေုာံ တၠပညာနျူကလဳယျာဂမၠိုၚ် ဒးချိုတ်အာလဝ်ရ။
Ref: Reuters