ဗေကျေန်၊ ဂျောန် ၉
ဍုၚ်ကြုက် ရန်ကဵုမၞိဟ်အာတရဴဂေတ်ဂၠးတိ ဂွံလုပ်စိုပ်ကၠုၚ်ဂၠိုၚ်တုဲ ကဵုလဝ်အခေါၚ်လုပ်ဍုၚ် ဟွံဒးကေတ်ဝဳဇြာ စဵုကဵု ၇၄ ဍုၚ်ရောၚ် လလောၚ်တြးလဝ်ရ။
ပ္ဍဲသၞာံ ၂၀၂၄ ဂှ် လၟိဟ်ကၟုဲဍုၚ်သ္အာၚ် လုပ်စိုပ်လဝ်ဍုၚ်ကြုက် ဟွံဒးကေတ်ဝဳဇြာဂှ် ၂၀ ပြကောဋိကိုဋ်ပြၚ် နွံတုဲ ဂၠိုၚ်နူကဵုသၞာံတုဲတုဲကၠုၚ်ဂမၠိုၚ် ၜါဆရောၚ် ဂွံတီကေတ် အတိုၚ်စရၚ် ဌာနကောပ်ကာဲပရေၚ်မၞိဟ်လုပ်ရ။
ကြဴနူရုပ်သီကၠေံ စေဝ်ပၞောန်စပ်ကဵုယဲကပ်ဂၠးတိဂှ်တုဲ ဍုၚ်ကြုက် ကလေၚ်ပံက်ကဵုလဝ်ပယျဵုညးတအ် သွက်ညးအာတရဴဍုၚ်သ္အာၚ်ဂမၠိုၚ် ပ္ဍဲကဵုသၞာံ ၂၀၂၃ မံက်တေံကီုလေဝ် ပ္ဍဲကဵုသၞာံဂှ် ကၟုဲလုပ်စိုပ်ကၠုၚ်လဝ် ၜိုတ် ၁၃ ဒဿမ ၈ ပြကောဋိကိုဋ်ဓဝ်ရ။
နကဵုညးအာတရဴ နူဍုၚ်ယူရောပ်၊ ဍုၚ်အာယှ၊ ဍုၚ်လက်တေန်အမေရိက ကေုာံ ဍုၚ်နူကဵုသ္ကုတ်လဒေါဝ်ဗၟံက်တအ်ဂှ် ဟွံဒးကေတ်ဝဳဇြာမွဲသာ် အာစိုပ်ဂေတ်ဝေၚ်ဍုၚ်ကြုက် ပွိုၚ် ၃၀ တ္ၚဲဂွံရောၚ်။
ဟိုတ်နူကဵုလဝ်အခေါၚ်လုပ်ဍုၚ် ဟွံဒးကေတ်ဝဳဇြာဂှ်တုဲ လၟိဟ်ညးအာတရဴဍုၚ်သ္အာၚ် လုပ်စိုပ်ကၠုၚ်ဍုၚ်ကြုက် ဂၠိုၚ်ကၠုၚ် ဗွဲမဍာံစၟတ်ရောၚ် အေဂျေန်ဇြဳအာတရဴလပှ်ကျာ ဖျေံသ္ဇိုၚ်ယှာန်ဟာဲ Trip.com Group ဟီုကၠုၚ်ရ။
အပ္ဍဲပွိုၚ်ပိဂိတုကၠာအိုတ် ပ္ဍဲသၞာံဏံဂှ် သွက်ဂွံကၠုၚ်စိုပ်ဍုၚ်ကြုက်ဂှ် ဒဒှ်မရာန်စၟတ်တဲက္ၜၚ်ကျာ၊ ဒစးဒုၚ်လိၚ်လဝ်ဟဝ်တေဝ် ကေုာံ အရာမဒစးဒုၚ်ကဵုလဝ်စရၚ် တၞဟ်ဟ်တံဂှ် ယဝ်ဒးၜတ်ကၞာတ်ကဵုအပိုၚ်အခြာအခိၚ်တုပ်ပ် ပ္ဍဲသၞာံတုဲတေံဂှ်မ္ဂး သၞာံဏံ ဂၠိုၚ်တိုန်ပိဆရောၚ် ဂွံတီကေတ်ရ။
အာဖရိကဝွံ ၜိုန်ပရေၚ်ဆက်ဆောံကုကြုက် ခိုဟ်မံၚ်ကီုလေဝ် ပ္ဍဲကဵုဍုၚ်ဂွံအခေါၚ်လုပ်ဍုၚ်ကြုက် ဟွံဒးကေတ်ဝဳဇြာဂှ် ဍုၚ်အာဖရိကဂမၠိုၚ် ဟွံပါလုပ်ကၠုၚ်ရ။
Ref: AP