ဝါယှေန်တာန်၊ ဂျူလာၚ် ၈
သမ္မတအမေရိကာန် ဒဝ်နေဝ်ထြာမ် ပါ်ပါဲကၠုၚ် အစဳဇန်တၠဓန အဳလောန်မက် မကေၚ်ဒှ်လဝ်မဟာမိတ်ညး သွက်သ္ဂောံဒက်ပ္တန်ဗော်ပရေၚ်ဍုၚ်ကွာန်တၟိဂှ်တုဲ ဟီုကၠုၚ် အဓိပ္ပာယ်ဟွံမွဲရ။
“ စဒက်ပ္တန်အာ ဗော်ပရေၚ်ဍုၚ်ကွာန် မရနုက်ကဵုတတိယမွဲဏောၚ်ဟီုဂှ် အဓိပ္ပာယ်ဟွံမွဲရောၚ် အဲထေၚ်ကေတ်ရ” သာ်ဝွံ ထြာမ် ဟီုကၠုၚ်လဝ် ကုအ္စာပရိုၚ်ဂမၠိုၚ် ကၠာညးဟွံဂွံတိုန်က္ၜၚ်ကျာ Air Force One ပ္ဍဲဂိတုဂျူလာၚ် ၆ တေံရ။
ဒှ်ဒၟံၚ်သၞောတ်ၜါဗော်လၟိုန်တုဲ စအာဗော်တတိယမွဲဟီုဂှ် ဆအယာံမာတ်ပထုဲဝိုၚ်ရရောၚ် ညးထေၚ်ကေတ်ဂှ် ထြာမ် ဆက်ဟီုလဝ်ရ။
အဳလောန်မက် လဴကၠုၚ်အစဳဇန်ညး လ္တူမဳဒဳယျာပရေၚ်မၞိဟ် X ဂှ် ဒဒှ်ရညးဒက်ပ္တန်အာ ဗော် American Party သွက်ဂွံပြိုၚ်ပ္ကာန်ကဵု သၞောတ်ဗော်ဒဳမဝ်ကရေတ်တေတ် ကေုာံ ရဳပါပလေတ်ကာန်တံရောၚ် ဟီုလဝ် ပ္ဍဲသတ္တာဟတုဲကၠုၚ်တေံရ။
ထြာမ် ကေုာံ မက် ညးၜါတၠဝွံ ဒှ်ကၠုၚ်လဝ်မဟာမိတ်မဍုက်ကေဝ်ကၠောံဍတုဲ သမ္မတ ကဵုလဝ်အခေါၚ်သေဌဳဇၞော် Tesla ဍိုက်ဍိုပ် ဌာနပတုဲဖဵုသွက်အလဵုအသဳ DOGE ရ။
ဟိုတ်နူပြဝဌာနဏံတုဲ ဒှ်ကၠုၚ်သွက်ဂွံဖအောန်ဖျေံ ခရိတ်အရပ်စပ်ဖေဝ်ဒရာ ဗွဲမဂၠိုၚ်ဂၠေၚ်ရ။
သွက်ပြဝအဳလောန်မက် ရေၚ်တၠုၚ်လဝ်သာ်ဂှ်တုဲ ဒဒှ်ရကေတ်ဂုန်စရာဲဂှ် ထြာမ် ဟီုလဝ်ရ။
မူဝါဒအလဵုအသဳအမေရိကာန် မဖန်ဗဒှ်လဝ် ညံၚ်ခတှ်ကၟိန်ဍုၚ်ဂွံဂၠိုၚ်ဂှ် အဳလောန်မက် ပါ်ပါဲကၠုၚ်လဝ် ဂၠိုၚ်ၚ်ကဵုဝါရ။
နကဵုဗော်တၟိညးဏံ ရုဲစှ်အာအလံၚ်ညးစၞး သွက်သမ္မတဏောၚ်တုဲ ပွိုၚ် ၁၂ ဂိတုဂတဏံ ညံၚ်သ္ဂောံစိုပ် အပ္ဍဲသ္ၚိဗု ကေုာံ အပ္ဍဲကၠတ်ထဝ်မာန်ဂှ် ပတိတ်အာဇြဟတ်ဏောၚ် အဳလောန်မက် ဟီုလဝ် ပ္ဍဲဂိတုဂျူလာၚ် ၆ တေံရ။
နကဵုအဳလောန်မက် ဂၠံၚ်ဗၠေတ်မံၚ်တုဲ ပ္ဍဲပွိုၚ် ၅ သတ္တာဟတုဲကၠုၚ်တေံ ဂွံညာတ်ကေတ် ဒှ်ဒၟံၚ်ညံၚ်ရဴကွဳလီုလီုမွဲဖ္ဍိုက်ဂှ် ဒးအောန်စိုတ်ရောၚ် ထြာမ် ဟီုလဝ်ရ။
အဳလောန်မက် ပၠောပ်ကၠုၚ်ဂလာန် သွက်ဂွံထ္မံက်ရုပ်ရဴစေဝ်ပၞောန် သ္ဂောံကဵုသုၚ်စောဲ ကွဳစက်ဓာတ်လလဳသၟးတုဲ ဟိုတ်နူလညာတ်ဟွံတုပ်ကုထြာမ်တုဲ ညးၜါတၠ ပါ်လဝ်ဍာန်ရ။
Ref: BBC