ကအ်ကြိက်၊ ဂျူလာၚ် ၁၂
သွက်ဂွံကလေၚ်ထိၚ်ဒက် ဂၠံၚ်ကအ်ကြိက်−ကြုၚ်ဒဵု တွဵုရးကရေၚ်မာန် ပ္ဍဲဂိတုဂျူလာၚ်ဏံ ဒပ်ကံၚ်ဇြဳပၞာန် ထပ်ထ္ပက်ကၠုၚ်ဒၟံၚ်ကရောၚ်ပၞာန်တုဲ အရိုဟ်တ္ၚဲ ဒှ်ဒၟံၚ်ပေါဲဗ္တိုက်ဆေၚ်မုက် ကုဒပ်ပံၚ်ကောံပၠန်ဂတး KNLA တံရောၚ် တမ်ပရိုၚ်ဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကရောၚ်ပၞာန်မွဲ မတိတ်ကၠုၚ် နူဌာန်ဂအုပ်ဒပ်ကံၚ်ဇြဳပၞာန် စကခ ၁၂ ဖျေံသ္ဇိုၚ်ဍုၚ်ကအ်ကြိက်ဂှ်ကဵု ကရောၚ်ပၞာန်ဒပ်ကံၚ်ဇြဳပၞာန် ၂ မတိတ်ကၠုၚ် နူဌာန်ဂအုပ်တမ်ဒပ် ခမရ ၅၄၆ ဖျေံသ္ဇိုၚ်ဍုၚ်ကြုၚ်ဒဵုဂှ်ဝွံ ပ္ဍဲဂိတုဂျူလာၚ်ဏံ ထ္ပက်ကၠုၚ်ပၞာန်တုဲ ကြပ်အရိုဟ်တ္ၚဲ ဒှ်ဒၟံၚ်ပေါဲဗ္တိုက်ဆေၚ်မုက်ရ။
ဒပ်ကံၚ်ဇြဳပၞာန် သွက်ဂွံကလေၚ်ထိၚ်ဒက် ဂၠံၚ်ကအ်ကြိက်−ကြုၚ်ဒဵု နူကဵုဒပ်ပံၚ်ကောံပၠန်ဂတး သၟဝ်ပၠတရဴဒပ်ပၞာန်ဗၠးၜးကောန်ဂကူကရေၚ် KNLA မထိၚ်ဒက်ဂွံလဝ်ဂှ် ရပ်စပ်စကာကၠုၚ်လွဟ်ဇၞော် ထ္ပက်ကၠုၚ်ပၞာန်တုဲ ပေါဲဗ္တိုက်ဆေၚ်မုက် ဒှ်ဒၟံၚ် ဗွဲမသ္ကာတ်မြဟ်ရ။
အပ္ဍဲပေါဲဗ္တိုက် ဂၠံၚ်ကြုၚ်ဒဵု−ကအ်ကြိက်ဂှ် လ္ပာ်ဒပ်ကံၚ်ဇြဳပၞာန် ဇီုကပိုက်ဒးဝပ် ဗွဲမဂၠိုၚ်ဂၠေၚ်တုဲ လ္ပာ်ဒပ်ပံၚ်ကောံပၠန်ဂတး သၟဝ်သ္ကိုပ်သ္က KNLA ဂှ်လေဝ် ဇီုကပိုက်ပြဟ်လလုဲဒးအာလဝ် နွံတုဲ ဒပ်ကံၚ်ဇြဳပၞာန်ဝွံ သွက်ဂွံကလေၚ်သီကေတ် ဂၠံၚ်ကြုၚ်ဒဵု−ကအ်ကြိက်ဂှ် ထ္ပက်ကၠုၚ်ဒၟံၚ်ကရောၚ်ပၞာန် ဂွံကၠုၚ် ၃ ဝါရ။
ပ္ဍဲဂၠံၚ်ကအ်ကြိက်−ကြုၚ်ဒဵုဂှ် ဂကောံ DKBA ပါ်တိတ် သၟဝ်သ္ကိုပ်သ္ကဗိုလ်ဘိ ပံၚ်တောဲမံၚ် ကုဒပ်ကံၚ်ဇြဳပၞာန်ဂှ်လေဝ် နွံဒၟံၚ်တုဲ ကောန်ဒပ် DKBA ဍိုပ်ပါ်တိတ်ဏံ ပံၚ်တောဲပါလုပ်ဗ္တိုက်ဒၟံၚ် ကရောံကရောၚ်ပၞာန်ဒပ်ကံၚ်ဇြဳပၞာန် မထ္ပက်ကၠုၚ်ပၞာန် နူကဵုဍုၚ်ကြုၚ်ဒဵုဂှ် တမ်ရိုဟ်ပရိုၚ်ဒေသဂမၠိုၚ် သ္ဂးရ။
ဂကောံဒပ် DKBA ပါ်တိတ် သၟဝ်သ္ကိုပ်သ္ကဗိုလ်ဘိဂှ်ဝွံ အခိၚ်လၟုဟ် ဖျေံသ္ဇိုၚ်မံၚ်ဒၟံၚ် ပ္ဍဲပွိုၚ်ဍုၚ်ဘာအၚ် ဒေသ(ကြာအၚ်းပေါ်တော်မူ) တိဍာ် KNU ဒပ်မဟာ ၁ တုဲ ပရေၚ်ပန်ပှော် ကုတမ်ဒပ် ၁ သၟဝ်တဲဒပ်မဟာ ၁ KNU ဂှ်လေဝ် ဒှ်ဒၟံၚ်မွဲဏှမွဲဏှရ။
ဒပ် DKBA သၟဝ်သ္ကိုပ်သ္ကဗိုလ်ဘိဂှ်ဝွံ ဖျေံသ္ဇိုၚ် ပ္ဍဲပွိုၚ်ဍုၚ်ဘာအၚ် ဒေသ (ကြာအၚ်းပေါ်တော်မူ) တုဲ အပ္ဍဲဒေသဏံဂှ် သၠဲတိ၊ သိုၚ်သၠဲပတိတ် ဗ္ဒိုပ်သၞေဟ်ကၚ်တအ်သၟးဟွံက သီုကဵုပကောံဒၟံၚ်ကောန်ဒပ်တၟိတၟိတံဂှ်တုဲ ဒပ်ကံၚ်ဇြဳပၞာန် ထံက်ပၚ်ကဵုဒၟံၚ် မကမ်လွဟ်လက်နက်ပၞာန်ရ။
ပေါဲဗ္တိုက်ကအ်ကြိက်−ကြုၚ်ဒဵု လအ်ကၠုၚ်ပွိုၚ်ပိဂိတုဏံ ဆက်သ္ကာတ်မြဟ်ဒၟံၚ် စဵုကဵုတ္ၚဲဏံတုဲ ညးဍုၚ်ကွာန်ဒေသ ဒးဂြိပ်ဒဴပါဲဒလေတ်ဒၟံၚ် ဂၠိုၚ်ကဵုဂိတု ဟိုတ်နူပေါဲဗ္တိုက်ဂှ် ဗွဲမဂၠိုၚ်ဝွံ ဒၟါနူဘဲလွဟ်ဇၞော် ကေုာံ ဘဲပၞာန်ကျာ ဒပ်ကံၚ်ဇြဳပၞာန်တံတုဲ စဴဌာန်ဒၟံၚ်ဟွံမာန် ဒးဆက်မံၚ်ဒၟံၚ် ပ္ဍဲဒေသတၞဟ်သ္အာၚ်ဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်− CJ