ရေဝ်၊ ဂျူလာၚ် ၁၂
ပ္ဍဲတွဵုရးဍုၚ်မန် ပွိုၚ်ဍုၚ်ရေဝ်သၟဝ်ကျာ ဗ္ဒါဲကွာန်တၟအ်ကၞေၚ် ဗ္ဒိုပ်ကၚ်ဒၞါကံၚ်ဇြဳပၞာန် ဒးဒုၚ်လုပ်စိုပ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန်ပိတၠ ချိုတ်အာလဝ်ရောၚ် ဒပ်ပၠန်ဂတးဍုၚ်မန် MSRF လလောၚ်ပ္တိတ်လဝ်ရ။
ပ္ဍဲဂိတုဂျူလာၚ် ၁၁ အခိၚ်နူဂယး ၜိုတ် ၉ နာဍဳဝိုက်ဂှ် ဒပ်ပံၚ်ကောံမဟာမိတ်ပၠန်ဂတးတအ် လုပ်စိုပ်ဗ္တိုက်လဝ် ဗ္ဒိုပ်ကၚ်ကံၚ်ဇြဳပၞာန်တုဲ ပေါဲဗ္တိုက်ၜါလ္ပာ် ဒှ်အာလဝ်ပွိုၚ်ဘာ်နာဍဳပြၚ်ရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန်ပိတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်တုဲ လ္ပာ်ဒပ်ပံၚ်ကောံမဟာမိတ်ပၠန်ဂတးတအ် ဇီုကပိုက်ဒးဟွံမွဲမွဲသာ် ဗွဲမအံၚ်ဇၞးဂီုကၠီု ကလေၚ်နုက်တိတ်ပၞာန်မာန်ကၠုၚ်ဂှ် သ္ဂးရ။
ပရေၚ်ဗ္တိုက်ဏံဂှ် ဒပ်ပံၚ်ကောံမဟာမိတ်ပၠန်ဂတးဂမၠိုၚ် ဒပ်ပၠန်ဂတးဍုၚ်မန် MSRF ၊ ဒပ်စဵုဒၞါညးဍုၚ်ကွာန်ရေဝ် YPDF ကဵု ဒပ် KNLA တမ်ဒပ် (၂၇) ဒပ်ပါ် (၁) တအ် ပံၚ်တောဲပါလုပ်လဝ်ရောၚ် ဂွံတီကေတ် အတိုၚ်တၚ်လလောၚ်တြးရ။
စပ်ကဵုပေါဲဗ္တိုက်ရေဝ်ဂှ်တုဲ လ္ပာ်ကံၚ်ဇြဳပၞာန် စဵုကဵုအခိၚ်လၟုဟ် လလောၚ်ပ္တိတ်ကၠုၚ်ပရိုၚ်ဂှ် ဟွံဂွံဆဵုကေတ်ဏီရ။
ပ္ဍဲပွိုၚ်ဍုၚ်ရေဝ် ဒၞါဲဒပ်ပၠန်ဂတးတအ် ချဳဒရာၚ်ဇြဟတ်ခိုဟ်ဒၟံၚ်ဂှ် ဒပ်ကံၚ်ဇြဳပၞာန် သၠုၚ်ပတိုန်ဇြဟတ်ဒပ်တုဲ မၚ်တောပ်ဗ္တိုက်ကၠုၚ်ဒၟံၚ် သွက်ပေါဲရုဲမာဲဂှ် ကၠောန်ကၠုၚ်အဆက်က်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MSRF