ဂျေရူသလေန်၊ ဂျူလာၚ် ၁၂
ယဝ်အဳရာန် ဘပဠကၠုၚ်ညးတအ်မ္ဂး ထပ်ဗ္တိုက်အာဏောၚ်ဂှ် ဝန်ဇၞော်ကာစဵုဒၞါအေဿရေ အေဿရေ ကာသ် ဟီုကၠုၚ်လဝ် ပ္ဍဲဂိတုဂျူလာၚ် ၁၀ တေံရ။
“ယဝ်မၞးတအ် ပတိတ်ကၠုၚ်ဇြဟတ် သွက်ဂွံဘပဠ ဟွံသေၚ်မ္ဂး သွက်ဂွံကဵုအန္တရာယ် ကုအေဿရေမ္ဂး ဇိုၚ်တဲအေဿရေ စိုပ်ကၠုၚ်ဇရေၚ်မၞးတအ် ပ္ဍဲတဳဟဳရာန်၊ တာဗရေသ်၊ အေဿဖာဟာန်တံဂှ်ဏောၚ်” သာ်ဝွံ ဝန်ဇၞော် အေဿရေကာသ် ဟီုလဝ် ပ္ဍဲအသေအဟာန်စှ်ေဘာပၞာန်ကျာရ။
ယဝ်ပိုယ်တအ် ဒးကလေၚ်ကၠုၚ်မ္ဂး ကလေၚ်ကၠုၚ် နကဵုဇြဟတ်ဇၞော်ဇၞော်ဏောၚ် ညးဟီုရ။
အပ္ဍဲဂိတုဂျောန်တုဲကၠုၚ်တေံ အေဿရေ ဟိုတ်နူဗ္တိုက်လဝ် အဳရာန် ပွိုၚ် ၁၂ တ္ၚဲဂှ်ရ ပေါဲပၞာန်ဇၞော်ဇၞော်မွဲ ဒှ်ကၠုၚ်မာန်ရောၚ် အရာမဒှ်ဒၟံၚ်ဓဝိၚ်သာ်ဏံ မံက်တိတ်ကၠုၚ်လဝ်ရ။
သီုၜါလ္ပာ်ဂှ် တုပ်လဝ်စိုတ်ပရေၚ်ဒေါအ်ပန်ပှော် ထြာမ်မပညဳပညပ်ကဵုအကြာဂှ်တုဲ လလောၚ်ပ္တိတ်လဝ် ပ္ဍဲဂိတုဂျောန် ၂၃ တေံ သွက်သ္ဂောံဖအိုတ်ကၠေံ ပရေၚ်မဂၠါဲသၞတံဂှ်ရ။
အေဿရေ ထ္ၜးကၠုၚ်ဟိုတ် ဒဒှ်မအဳရာန် ကြပ်ပတိတ်လွဟ်နျူကလဳယျာဂွံဂှ်တုဲ ဗ္တိုက်ကၠုၚ်လဝ် ဒၞါဲဒတန်နျူကလဳယျာ အဳရာန်ရ။
အဳရာန်ဂှ်တှ်ေ ကိုန်စဳမာန်နျူကလဳယျာညးတအ်ဝွံ ဒှ်သွက်ပရေၚ်ၜိုဟ်လလမ်သက်က်ရောၚ် ဟီုလဝ်တုဲ ကယျာန်ပါဲလဝ် တၚ်စောဲစပ်ကၠုၚ်ညးတအ် မဂ္စါန်ကၠောန်ပတိတ်ဒၟံၚ်လွဟ်နျူကလဳယျာဂှ်ရ။
ပ္ဍဲပေါဲပၞာန်ဏံဂှ် အမေရိကာန်လေဝ် ပါလုပ်လဝ်တုဲ စကာ မခတိုဟ်ပလီုဗာန်ကာတံဂှ်တုဲ ဗတိုက်လဝ် ရုၚ်စက်နျူကလဳယျာအဳရာန်ရ။
ဆ္ဂး ကြဴနူအမေရိကာန် ဗတိုက်ကၠုၚ်တုဲဂှ် ပ္ဍဲဒၞါဲဒတန်ရုၚ်စက်နျူကလဳယျာအဳရာန်ဂှ် ဟွံဂွံဆဵုကေတ် ဓာတ်ရေဒဳယောလရုကတဵုပုဟ်ဂှ် တၠပညာဂမၠိုၚ် ဟီုလဝ်ရ။
ပရေၚ်မဟီုဂးဒၟံၚ် ကၠာနူအမေရိကာန်ဟွံဂွံဗ္တိုက်ဂှ် အဳရာန် ပြံၚ်ဆုဲဏာလဝ်ယူရေနဳယာန် သ္အးဇ္ၚးလဝ်တုဲတုဲဂမၠိုၚ် ဒၞါဲတၞဟ်ဟ်တုဲရောၚ်ဂှ်လေဝ် မံက်တိတ်ကၠုၚ်ကီုရ။
နကဵုအဳရာန် ကလေၚ်စအာ ကိုန်စဳမာန်နျူကလဳယျာညးတအ် ခြာဟွံလအ်မာန်ဏောၚ် ချိၚ်ခယျဟီုဂးဒၟံၚ်ဂှ်လေဝ် နွံတုဲ ဆ္ဂး ဒဝ်နေဝ်ထြာမ် တးပါဲကၠေံတုဲ ဟီုကၠုၚ်လဝ် ဒဒှ်ရညးတအ် ပလီုပလာ် ပသောၚ်ထောံလဝ် ရုၚ်စက်နျူကလဳယျာတဳဟဳရာန် ဖအိုတ်တုဲရ။
Ref: Reuters