ကွာလာလာံပူ၊ ဂျူလာၚ် ၁၃
ဍုၚ်ဒြဟတ်ဇၞော်ဂမၠိုၚ် ကောပ်ကာဲဖန်ဇန် လ္တူပရေၚ်လညာတ်ဟွံတုပ်သၟဟ်ဂမၠိုၚ် နကဵုပြဝမၞုံကဵုတာလျိုၚ်ညိဂှ် ကလုတ်ဍုၚ်အာဇြဳယာန် ၁၀ ဍုၚ် ဖတိုက်ဖအောဝ်လဝ်ရောၚ် ဝန်ဇၞော်ကာဍုၚ်သ္အာၚ် မလေဝ်ယှာ မိုဝ်ဟာမက် ဟာသာန် ဟီုကၠုၚ် ပ္ဍဲဂိတုဂျူလာၚ် ၁၁ ကြဴနူကောံဓရီုကၠောန်ဗဒှ်လဝ် ပွိုၚ်ပိတ္ၚဲ လ္တူဍုၚ်ကွာလာလာမ်ပူ တုဲဒှ်ဂှ်ရ။
အပ္ဍဲဒေသ ဂွံၜိုဟ်လလမ်၊ ညိၚ်ဝတ်၊ သာယာဂှ် လ္တူနူကဵုပရေၚ်ဟွံတုပ်သၟဟ်တအ်ဂှ် သ္ပဂရု ကုပရေၚ်ညးဂမၠိုၚ်တုပ်စိုတ်တအ်ဂှ်တုဲ ပရေၚ်ပံၚ်တောဲရေၚ်တၠုၚ် နူအာဇြဳယာန်ဏံ ဒဒှ်ရပၟိက်ဇၞော်ဂှ် ညးတအ် ထ္မံက်ထ္ၜးလဝ်ရောၚ် ဝန်ဇၞော် ဟာသာန် ဟီုလဝ် ကုမဳဒဳယာဂမၠိုၚ် ကြဴနူကောံဓရီု ဝန်ဇၞော်ကာဍုၚ်သ္အာၚ်အာဇြဳယာန် မရနုက်ကဵု ၅၈ ဝါ တုဲဂှ်ရ။
အခိၚ်သမ္မတအမေရိကာန် ဒဝ်နေဝ်ထြာမ် လလောၚ်တြးကၠုၚ် ဒဒှ်မကံက်ဂလိုၚ်ပ္တိုန်အာအခေါန်ဖလှာ လ္တူကၟိန်ဍုၚ်ဂမၠိုၚ် သီုကဵုဍုၚ်အာယှဒိုဟ်အဂၞဲတအ်ဏံ ကေုာံ အခိၚ်အကာဲအရာ ပထဝဳပရေၚ်ဍုၚ်ကွာန် ကေုာံ ပရေၚ်သွံရာန်ဗၞိက် ဒှ်ဒၟံၚ်ဟွံချိုတ်ပၠိုတ် ချိၚ်ခယျဟွံဒးဏံဂှ် ကၠောန်ဗဒှ်ကၠုၚ်လဝ် ကောံဓရီုအာဇြဳယာန်ရ။
အပ္ဍဲဒေသ ပံၚ်တောဲတုဲ သွက်ဂွံခၠေဝ်ပလန်အာ လ္တူကိစ္စပရေၚ်ပိုန်ဒြပ် ဒှ်ကၠုၚ်ဟွံညိၚ်ဝတ်ဂှ်ကဵု ပရေၚ်သွံရာန်ဗၞိက် မကြံၚ်မ္ၚိုဟ်ကၠုၚ်ဒၟံၚ်ဂှ်တုဲ ကၠာဟွံဂွံကၠောန်ဗဒှ်ကောံဓရီုအာဇြဳယာန်ဂှ် ဝန်ဇၞော်ပရေၚ်ပိုန်ဒြပ် ကေုာံ ဝန်ဇၞော်ကာဍုၚ်သ္အာၚ်အာဇြဳယာန် ဖန်ဇန်လဝ် သွက်ဂွံပံၚ်တောဲကၠောန်အာကောံဓရီု အပ္ဍဲဂိတုအံက်တဝ်ဗာဂှ် မိုဝ်ဟာမက် ဟာသာန် ဟီုလဝ်ရ။
အခိၚ်လၟုဟ် ပရေၚ်ဍုၚ်ကွာန် ကေုာံ ပရေၚ်ပိုန်ဒြပ်ဂှ် ဒှ်မံၚ်မွဲဣရ၊ နကဵုပိုယ်တအ် တၞဟ်ခြာပ္တိတ်အရာတံဏံ ဟွံသေၚ်ရောၚ် ညး ထပ်ဟီုလဝ်ရ။
ပ္ဍဲကဵုကောံဓရီုအာဇြဳယာန် ကေုာံ ကောံဓရီုမဆက်စပ်ဂမၠိုၚ်ဂှ် ဝန်ဇၞော်ကာဍုၚ်သ္အာၚ်အမေရိကာန် မာဂိုဝ် ရူဗဳယော၊ ဝန်ဇၞော်ကာဍုၚ်သ္အာၚ်ကြုက် ဝါန်ယိ၊ ဝန်ဇၞော်ကာဍုၚ်သ္အာၚ်ရုယှာ သာဂျဳ လက်ဗရတ်၊ ဝန်ဇၞော်ကာဍုၚ်သ္အာၚ်ဗျိတိၚ် ဒေဝေတ် လာမ်မေ၊ ဝန်ဇၞော်ကာဍုၚ်သ္အာၚ် အဝ်သတြေလျ ပေနဳဝံၚ် ကေုာံ သၞာဲဒဴကဆံၚ်သၠုၚ်ဂမၠိုၚ် တိုန်စိုပ်သဳကၠဳလဝ်ရ။
ထြာမ်ဂှ်တှ်ေ ပလံၚ်ဗစိုပ်လဝ်လိက် ဒဒှ်မကံက်အာအခေါန် လ္တူဍုၚ်မလေဝ်ယှာ မဒှ်ဥက္ကဌအာဇြဳယာန်သၞာံဏံဂှ် ၂၅ တၟံကၠံ၊ လ္တူဍုၚ်လာအိုဝ်ကဵု ဍုၚ်ဗၟာဂှ် ၄၀ တၟံကၠံ၊ လ္တူဍုၚ်ကာမ္ဗောဒဳယျာ ကေုာံ ဍုၚ်သေံ မဟာမိတ်အမေရိကာန်ဂှ် ၃၆ တၟံကၠံ ကေုာံ လ္တူဍုၚ်အေန်ဒိုဝ်နဳယှာဂှ် ၃၂ တၟံကၠံရ။
Ref: CNA