ကအ်ကြိက်၊ ဂျူလာၚ် ၁၅
ပ္ဍဲတွဵုရးကရေၚ် ပေါဲဗ္တိုက်သ္ကာတ်မြဟ်ဒၟံၚ်ဂှ် ဒပ်ကံၚ်ဇြဳပၞာန် ဗ္တိုက်ကၠုၚ်ဒၟံၚ်ကဵုပၞာန်ကျာ အရိုဟ်တ္ၚဲတုဲ ဟိုတ်နူပန်ပှော်ဒၟံၚ်ကဵုလွဟ်ဇၞော် ဟွံပိုတ်သ္ကုတ်တုဲ ညးဍုၚ်ကွာန်ဂမၠိုၚ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး KNU ဗဟဵုကဵု ဂကောံမှာဇန်ကရေၚ်တအ်ရ။
ပ္ဍဲဂိတုဂျူလာၚ် စၟတ်တ္ၚဲ ၁၀ တုဲကၠုၚ်တေံ နူကုန်အမၠံက်ဒပ်တၟိ ဒပ်ကံၚ်ဇြဳပၞာန်ဂှ် ပန်မံၚ်လွဟ်ဇၞော် အပ္ဍဲကွာန်(မြောက်ကြာအၚ်း) ပွိုၚ်ဍုၚ်ကြုၚ်ဒဵု ခရိုၚ်ဒူပလာယာ KNU တုဲ ကောန်ၚာ်သၟတ်ပန်ဂိတုမွဲတၠ မပါလုပ် ကောန်ၚာ်သၟတ် ၄ တၠ ကလိဂွံအာလဝ်ဝပ်ရောၚ် KNU ဗဟဵု လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျူလာၚ် ၁၃ တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ် နကဵုက္ၜၚ်ကျာ ပ္ဍဲဒေသဝဝ်လေ တိဍာ်ဒပ်မဟာ ၆ KNU တုဲ ပရေၚ်ဇီုကပိုက်ဂှ် ဟွံဂွံတီကေတ်ဏီရောၚ် တမ်ရိုဟ်ပရိုၚ်အပ္ဍဲဒေသဂမၠိုၚ် သ္ဂးအိုတ်ရ။
ဒပ်ကံၚ်ဇြဳပၞာန် ဗတိုက်ကၠုၚ်လဝ်ကဵုပၞာန်ကျာဏံ ကြဴနူဗ္ဒိုပ်ဥကယေတ်ထ ဒးဒုၚ်သီတုဲ ဂွံမွဲတ္ၚဲတုဲ မဒှ်တုဲ ပရေၚ်ဗ္တိုက်ကဵုပၞာန်ကျာ ဗွဲကြဴဏံဂှ်လေဝ် ဆက်တုဲဗ္တိုက်ဒၟံၚ် ကုဂကောံဒပ်ပၠန်ဂတးတအ် နကဵုဒရုၚ်ရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် ၁၃ တေံဂှ်လေဝ် ဒပ်ကံၚ်ဇြဳပၞာန် ထောံလဝ်မခတိုဟ်လျိုၚ်၅၀၀ ပံၚ် နကဵုပၞာန်ကျာ လ္တူကွာန်နကိုဝ်ထ တိဍာ်ဒပ်မဟာ ၅ ခရိုၚ်ဘာပန် KNU တုဲ ဘာလကျာ်ကေုာံသ္ၚိဒၟံၚ်၊ ဆေၚ်ဖျာလ္ၚဵု ဇီုကပိုက်လီုအာလဝ်တုဲ မၞိဟ်ဇီုကပိုက်ဒးဟွံမွဲရောၚ် ဂကောံမှာဇန်ကရေၚ် KPSN လလောၚ်ပ္တိတ်လဝ်ပရိုၚ်ရ။
ပ္ဍဲဂိတုဂျူလာၚ် ၁၄ တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ်နကဵုက္ၜၚ်ကျာ ပ္ဍဲကွာန် နွံလ္တူဂၠံၚ်ကြုၚ်ဒဵု−ကအ်ကြိက် ဒပ်မဟာ ၆ KNU ဂှ်တုဲ ပရေၚ်ဇီုကပိုက်ဒး ဟွံဂွံတီကေတ်ဏီဂှ် တမ်ရိုဟ်ပရိုၚ်အပ္ဍဲဒေသဂမၠိုၚ် သ္ဂးရ။
ဒပ်ကံၚ်ဇြဳပၞာန် သွက်ဂွံကလေၚ်သီကေတ် ဂၠံၚ်ကြုၚ်ဒဵု−ကအ်ကြိက်ဂှ် ထ္ပက်ကၠုၚ်ဒၟံၚ်ကရောၚ်ပၞာန် ၂ နူဍုၚ်ကအ်ကြိက်ကဵုဍုၚ်ကြုၚ်ဒဵု ၂ နကဵုအရီုဗၚ်ဂကောံ DKBA ပါ်တိတ်ဂှ်တုဲ ပပ္တံနူဂိတုဂျူလာၚ်မံက်ဏံတုဲ မွဲဒမြိပ်ဂၠံၚ်ဏံ ဒှ်မံၚ်ပေါဲဗ္တိုက်ၜါလ္ပာ် သ္ကာတ်မြဟ်ရ။
ကုန်ဗ္ဒိုပ်ဗျူဟာဒပ်ပၞာန် ဖျေံသ္ဇိုၚ်ဍုၚ်ဝဝ်လေ ဂှ် ဒပ်ပံၚ်ကောံပၠန်ဂတး KNLA ထ္ပက်ပၞာန်ဗ္တိုက်ဒၟံၚ်တုဲ ဒပ်ကံၚ်ဇြဳပၞာန်တအ် တဝ်စၞေဟ်ဗ္တိုက်ဒၟံၚ် နကဵုနဲကဲနာနာ ပါလုပ်သီုကဵုပၞာန်ကျာဂှ်ရ အကာဲအရာပရေၚ်ပၞာန်ၜါလ္ပာ် သာတုဲသ္ကာတ်မြဟ်ကၠုၚ်မံၚ်ရောၚ် ဂွံတီကေတ် အတိုၚ်ဂလာန် တမ်ရိုဟ်ပရိုၚ်ပယျဵုရ။
ပရိုၚ်−သြၚ်လောန်တိုၚ်(မ်)
ဗီုရုပ်−KHRG