မတ်မလီု၊ ဂျူလာၚ် ၁၃
ဗွဲကြဴဏံ ပ္ဍဲတွဵုရးဍုၚ်မန် ပရေၚ်ကၠတ်ဂၠံက်ပၠံၚ်ၜး ဒှ်ဆက်ကၠုၚ်ကီုလေဝ် လ္ပာ်ကံၚ်ဇြဳပၞာန် ဂၠိုက်ဂၠါဲကေတ်ကၠုၚ်အရေဝ်ဟွံမွဲ အောန်ဒၟံၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးမကလိလောန် ပွကၠတ်ဂၠံက်ပၠံၚ်ၜးတအ်ဂှ်ဝွံ ကေတ်အခေါၚ်ခိုဟ်ကဵုအခိၚ်ဗြဲဂူတုဲ အခိၚ်ဗ္တံသၟးဟွံက သီုအခိၚ်လဒေါဝ်တ္ၚဲဂှ် ကၠတ်ကၠုၚ်ဒၟံၚ်ကွဳလိုန်ဓာတ်၊ လုပ်ကၠတ်ဒၟံၚ်လှုဲလ္တူသ္ၚိ ကၠတ်ဒၟံၚ်သီုကဵုကပေါတ်ထေက်တန်ၚုဟ်မးဂမၠိုၚ်တုဲ ပါလုပ်သီုကဵုဖုၚ် ဒှ်တမ်ရ။
ပရေၚ်ဒးဒုၚ်ကၠတ်ဂၠံက်ပၠံၚ်ၜးတအ်ဏံဂှ် ယဝ်အာတေၚ်ဇရေၚ်ဂကောံဗၠာဲသၟိၚ်ကံၚ်ဇြဳပၞာန်တအ်မ္ဂးလေဝ် ညးတအ် ထ္ၜးကၠုၚ်ဟိုတ်ကဵုပရေၚ်ဂီုကၠီုတုဲ ၜိုတ်ဂွံပံက်လဝ်ဂဗုတ်ရတုဲ ဗက်ဂၠိုက်ဂၠါဲရပ်ဒက်ကဵုဟွံမွဲရောၚ် သ္ဂးရ။
ညးဒေသတွဵုရးဍုၚ်မန် မွဲတၠဂှ်တှ်ေ ညးမကလိလောန် ပရေၚ်ကၠတ်ဂၠံက်ဂမၠိုၚ်ဝွံ ဗွဲကြဴဏံ ကေတ်အခေါၚ်ခိုဟ်ကဵု ဗြဲဇၞော်တုဲ တိုန်သီုသ္ၚိတုဲကၠတ်ဒၟံၚ်ရောၚ် ဟီုရ။
“ဗြဲကျာဇၞော်တုဲ ကၠတ်တိုန်သ္ၚိ ဗြဴတြုံၜါတၠဓဝ် မတိက်ဒၟံၚ်ဂှ်တုဲ ကၠတ်ဏာသီုထာၚ်လှုဲ၊ သီုနစုတ်လဝ်လှုဲ ကၠောန်ဂွံလဝ်ကလောန်တအ်ဂှ်၊ သီုကဵုထၟာဲဍုန်ပုၚ်၊ သ္ၚိပၟတ်တေက်ဗွိုက်လ္တက်၊ ကွဳလိုန်ဓာတ်တံဂှ်တုဲ တၠသ္ၚိတအ်ဂှ် ဟွံၚုဟ်ပုဟ်။ မၞိဟ်လုပ်ကၠတ်ဂှ်လေဝ် ပါကၠုၚ်သီုကဵုၜုန်မြ၊ လေံဒုက် မကဵုဘဲကုမၞိဟ်မာန်တအ်ဂှ်ရ။ ကမၠတ်တအ်ဏံ ဂံၚ်ကွေံကွေံဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ကမၠတ်တအ်ဂှ်တှ်ေ တိတ်ကၠတ်ဒၟံၚ် အခိၚ်တိတ်ဗ္တံဟွံဂွံ ကံၚ်ဇြဳပၞာန်တအ် မလလောၚ်ပ္တိတ်လဝ်ဂှ် ဂၠိုၚ်အိုတ်တုဲ ကၠတ်ဒၟံၚ်ကဵုက္ဍိုပ်ဂှ်ရ ဒှ်ကၠုၚ်သီုဘဲအန္တရာယ်လမျီုရောၚ် ညးဆက်ဟီုရ။
ညးဒေသတွဵုရးဍုၚ်မန်မွဲတၠ ကေၚ်ဒးလဝ်ကမၠတ်ဂှ်တှ်ေ အခိၚ်ကာလဗြဲမ္ဂး ကမၠတ်တအ်ဏံ ဂံၚ်လုပ်စိုပ်ကၠတ်ဒၟံၚ် စဵုကဵုအပ္ဍဲကၠအ်တအ်ဂှ်တုဲ ကပေါတ်ကၠေံခၞၚ်ဂၠိုၚ်ကၠုၚ်ရောၚ် ဟီုရ။
“ လၟုဟ်ဂှ် ၜိုတ်ဆဵုဂှ် ကၠတ်မံၚ်ဖအိုတ်ဏောၚ်။ ဗြဲဂူတုဲ စွံလဝ်ကွဳစက်ကာ ပ္ဍဲကၠအ်။ ကပေါတ်နွံဒၟံၚ်လ္တူကွဳစက်ဂှ် ကေတ်ဏာလဝ်ဖအိုတ်။ ကပေါတ်နွံကဵုၚုဟ်မးဂှ်တှ်ေ ကၠတ်ဒၟံၚ်ဂၠိုၚ်ရ။ ကၠတ်တုဲ ဂွံကလေၚ်ဂွံဟွံမွဲရ၊ အာတေၚ်လေဝ် ဟွံကလေၚ်ဂွံဂှ် ဂၠိုၚ်ကွေံကွေံဏောၚ်။ အခိၚ်လၟုဟ် အခိၚ်ကာလဗြဲဏံ ဗြဲဂူမ္ဂး သာတုဲပရေံရ” သာ်ဝွံ သ္ဂးရ။
ညးမကၠတ်ဂၠံက်ပၠံၚ်ၜးဂမၠိုၚ်ဝွံ ဒက်က္ဍိုပ်တုဲကၠတ်ကၠုၚ်ဒၟံၚ်ဂှ်ရ ယဝ်တီမ္ဂးလေဝ် ဖေက်ကဵုဘဲကုလမျီုတုဲ ဟွံဂံၚ်ကလေၚ်ပလန်ဒှ်ဒၟံၚ်တုဲ အပ္ဍဲဒေသဂှ် ဒှ်ကၠုၚ်ဒၟံၚ်ဗီုပြၚ်သၞောဝ်ဟွံမွဲရောၚ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ညံၚ်ဂကောံဇြဟတ်ပၠန်ဂတးတအ် လုပ်စိုပ်ကၠုၚ်ဟွံဂွံဂှ် စၟဳတ်ဒၟံၚ်ဂၠံၚ်လုပ်တိတ်ဍုၚ် ဗွဲမတေၚ်ဂြတ်ကီု၊ ကၟာတ်လဒဵု ဂၠိုက်ဂၠါဲဒၟံၚ် လ္တူဍုၚ်တအ်ဂှ်လေဝ် အရိုဟ်တ္ၚဲရ။
သ္အာၚ်နူဂှ်ပၠန် လ္တူဍုၚ်ဂှ်မ္ဂး စုတ်ကၠုၚ်လဝ် CCTV အကြာဂၠံၚ်ပိပန်သွာၚ်၊ ဂၠံၚ်ကရေပ်၊ ဒၞါဲပၟတ်ဗဒေါအ်ယာန်တအ်ဂှ် ပေၚ်ၚ်တုဲ မၚ်ရံၚ်ဒၟံၚ်တုဲ ညးတအ် ၜိုန်ရစၟဳတ်ကၠုၚ်ဒၟံၚ် သီုကဵုစရၚ်ကၟုဲတံဂှ်ကီုလေဝ် ယဝ်ရဒးကမၠတ် ဒးဒုၚ်ပၠံၚ်ၜးမ္ဂး ဒှ်ဒၟံၚ်ဗီုပြၚ်ညးဒးညးဒုၚ်ရောၚ် ညးဒေသဂမၠိုၚ် ဟီုအိုတ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI
