ကျာ်မြဟ်၊ ဂျူလာၚ် ၁၆
ဒပ်ကံင်ဇြဳပၞာန် ထပ်ပန်ကၠုၚ်မံၚ်လွဟ်ဇၞော် ပ္ဍဲကွာန်ဒေသၜဳဂြာၚ် ပွိုၚ်ဍုၚ်ကျာ်မြဟ် တွဵုရးဍုၚ်မန် သီုဗ္တံသီုတ္ၚဲဂှ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပပ္တံနူလဒေါဝ်ဂိတုဂျောန် တုဲကၠုၚ်တေံတုဲ နူကဵုဗ္ဒိုပ်ဒပ်ဖျေံသ္ဇိုၚ်ကံၚ်ဇြဳပၞာန် ခမရ စၟတ် ၂၀၈ ၊ ခလရ စၟတ် ၈၁ ဖျေံသ္ဇိုၚ်ဟပၠၚ်တံဂှ် ပန်ကၠုၚ်ဒၟံၚ်လွဟ်ဇၞော် ပ္ဍဲကဵုကွာန်ပွဳပွူဒေသၜဳဂြာၚ်တအ် သီုဗ္တံသီုတ္ၚဲရ။
ဟိုတ်နူဒပ်ကံၚ်ဇြဳပၞာန် ပန်ဒၟံၚ်လွဟ်ဇၞော် သီုဗ္တံသီုတ္ၚဲဂှ်တုဲ ညးဍုၚ်ကွာန်ဒေသ ဗွဲမဂၠိုၚ် ဒးဖေက်လကိုတ်ဒၟံၚ်တုဲ ညးဍုၚ်ကွာန်လ္ၚဵုတအ်ဂှ်တှ်ေ ထောံလသာဌာန်ဒၟံၚ် ဒးပါဲဒလေတ်ကၠုၚ် နွံရ။
အတိုၚ်ဂလာန် ညးဒေသတံဂှ်မ္ဂး ပရေၚ်ပန်ပှော်လွဟ်ဇၞော်ဂှ်ဝွံ ညံၚ်ဂကောံပၠန်ဂတးတအ် ကၠုၚ်စိုပ်ဗ္တိုက်ဗ္ဒိုပ်ဒပ်ညးတအ် ဟွံဂွံဂှ် ဒပ်ကံၚ်ဇြဳပၞာန် ဒစးဒုၚ်စဵုဒၞါလဝ် ဒှ်မာန်ရောၚ် သ္ဂးအိုတ်ရ။
ကမ်လွဟ်ဇၞော်ဒပ်ကံၚ်ဇြဳပၞာန် ပန်လဝ်ဂှ်ဝွံ ဒတုံဗ္တိုဟ်ထ္ကးအာ ပ္ဍဲကွာန်ကအ်ပလိုၚ်၊ ကွာန်ဓမ္မသ၊ ကွာန်သၚ်ကၠံ၊ ကွာန်ကြေဝ်ဏာ၊ ကွာန်ကအ်ဗိန် ကေုာံ ပ္ဍဲကဵုခံက်ဝါ ကွာန်ဗ္ဒါဲဗ္ဒါဲတံဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ညးဍုၚ်ကွာန်ဒေသ ဇီုကပိုက်ကလိဂွံလဝ်ဝပ် ဟွံမွဲကီုလေဝ် သ္ၚိဒၟံၚ် ကေုာံ ဗ္ဒမ်ဆေၚ်ဖျာ၊ တာဲဝါတအ် လီုလာ်ဒးအာ နွံရောၚ် သ္ဂးအိုတ်ရ။
ဒပ်ကံၚ်ဇြဳပၞာန် ပန်ကၠုၚ်ဒၟံၚ်လွဟ်ဇၞော်ကြာန်န်တုဲ ညးဍုၚ်ကွာန်ဒေသဂမၠိုၚ်ဝွံ ဟွံဂံၚ်အာကၠုၚ်ကၠအ်ဂူဝါတုဲ ရံၚ်အကာဲအရာတုဲ ဒးကၠောန်ၜိုတ်ဒၟံၚ်တုဲ ညးဒေသလ္ၚဵုတအ်ဂှ်တှ်ေ ဆုဲပြံၚ်မံၚ်ဒၟံၚ် လ္တူဍုၚ်မတ်မလီု၊ ကျာ်မြဟ်တံ နွံဒၟံၚ်ရ။
ပ္ဍဲကဵုကွာန်မွဲဒမြိပ်ၜဳဂြာၚ် ပွိုၚ်ဍုၚ်ကျာ်မြဟ်ဂှ် အကြာဒပ်ပံၚ်ကောံပၠန်ဂတးတအ်ကဵု ဒပ်ကံၚ်ဇြဳပၞာန်တအ်ဂှ် ဒှ်မံၚ်ပေါဲဗ္တိုက်မွဲဏေံမွဲဏေံတုဲ သီုၜါလ္ပာ် ပန်ဒၟံၚ်လွဟ်ဇၞော်၊ ထောံမခတိုဟ်ကဵုဒရုၚ်ကီု၊ လ္ပာ်ဒပ်ပၞာန်ဗၟာ ထောံကၠုၚ်မခတိုဟ် နကဵုပၞာန်ကျာ နွံဒၟံၚ်ရ။
ပ္ဍဲဂိတုမာတ် ၂၄ တုဲကၠုၚ်တေံ လ္ပာ်ဒပ်ပံၚ်ကောံပၠန်ဂတးတအ် ဗ္တိုက်သီဂွံလဝ် ဗ္ဒိုပ်ဗၠာဲသၟိၚ်ကွာန်ကအ်ဗိန်တုဲ မွဲဒမြိပ်ဒေသဏံဂှ် ပရေၚ်ပၞာန်ကြံၚ်မ္ၚိုဟ်တုဲ ပေါဲဗ္တိုက်ဒှ်လဝ်ရ။
အပ္ဍဲပေါဲဗ္တိုက်ဒှ်လဝ် ဗ္ဒါဲကွာန်ဓမ္မသ ဒေသၜဳဂြာၚ်ဂှ် ဒပ်ကံၚ်ဇြဳပၞာန် ဟိုတ်နူထောံကၠုၚ်မခတိုဟ်နကဵုပၞာန်ကျာ၊ ပန်ကၠုၚ်ကဵုလွဟ်ဇၞော်တုဲ သ္ၚိညးဒေသ ၃၀၀ ပြၚ် ပၟတ်တူလေၚ်အာလဝ်တုဲ ညးဒေသ ဗ္ဒါဲ ၂၀၀၀၀ ဒးဂြိပ်ဒဴပါဲဒလေတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ