မတ်မလီု၊ ဂျူလာၚ် ၂၀
အကြာတ္ၚဲတံဏံ လ္ပာ်ကံၚ်ဇြဳပၞာန် နကဵုဇြဟတ်ဗွဲမဂၠိုၚ်ဂၠေၚ် ရပ်ကၠုၚ်ဒၟံၚ် ကွဳစက်ဗၞိက်ကပေါတ်သေံတံဂှ်တုဲ ၚုဟ်ကပေါတ်ဗၞိက်သေံ က္ဍၚ်တိုန်ကၠုၚ်ရောၚ် သၟာဗၞိက်ဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ စနူဂိတုဂျူလာၚ် ၁၅ တုဲကၠုၚ်တေံတုဲ ကွဳစက်ဖ္ဍိုက်ကၠုၚ်ဗၞိက်သေံ နူတွဵုရးကရေၚ် လုပ်ကၠုၚ်အပ္ဍဲတွဵုရးမန်ဂှ် ရပ်ကၠုၚ်ဒၟံၚ် ပ္ဍဲဂၠံၚ် မတ်မလီု၊ ပံၚ်၊ သဓီု၊ ၜဳကလေၚ် ကေုာံ ပ္ဍဲဂၠံၚ်ကျာ်ထဝ်ရ။
ဟိုတ်နူကၟာတ်လဒဵုရပ်ဒၟံၚ် ကွဳစက်ဖ္ဍိုက်ကပေါတ်ဗၞိက်သေံ ဗွဲမတေၚ်ဂြတ်တုဲ သၟာဗၞိက်လ္ၚဵုတအ်ဝွံ ဟွံဂံၚ်ဖ္ဍိုက် ကပေါတ်ဗၞိက်သေံတံဂှ်ရတုဲ ဗၞိက်ဟွံဂေတ်ဂြိပ်တုဲ ၚုဟ်ဗၞိက်သေံ ၚုဟ်က္ဍၚ်ကၠုၚ်ရ။
သၟာဗၞိက်မွဲတၠဂှ်တှ်ေ ဒၟါနူကံၚ်ဇြဳပၞာန်တအ် ရပ်ကၠုၚ်မံၚ်တုဲ ကပေါတ်ဗၞိက်သေံတအ်ဂှ်တှ်ေ တန်တဴကဵုဂကူဍေံတုံ ၚုဟ်က္ဍၚ်ကၠုၚ်ဒၟံၚ် နူ ၁၅ တၟံကၠံ စဵုကဵု ၂၀ တၟံကၠံတုဲ ယဝ်ကပေါတ်ဟွံလုပ်မ္ဂး ပရေံကၠုၚ်နူဏံမာန်ရောၚ် ဟီုရ။
“ကၠာတေံလေဝ် ရပ်ဒၟံၚ်ရ။ လၟုဟ်လေဝ် ရပ်ဒၟံၚ်ရ။ ဟိုတ်နူပၟိၚ်နူလ္တူတေံတုဲ ဍေံတံ ရပ်ဒၟံၚ်။ ဗၞိက်သေံဂှ်တှ်ေ ၚုဟ်တိုန်ဒၟံၚ် အောန်အိုတ် ၁၅ တၟံကၠံ ၂၀ တၟံကၠံရ။ တိုန်ဒၟံၚ် လၟေၚ်ၚ်ရဏောၚ်။ တိုန်ၜိုတ် ၂၀ တၟံကၠံကီုလေဝ် ယဝ်ဂွံကပေါတ်တှ်ေ ကိစ္စဟွံမွဲပုဟ်။ ကပေါတ်ဟွံစိုပ်မ္ဂး သာပရေံဏောၚ်” သာ်ဝွံ သ္ဂးရ။
ထ္ၜးဟိုတ်ကဵု ကပေါတ်ဗၞိက်ဟွံလုပ်သၞောဝ်တအ်ဂှ်တုဲ ရပ်ကၠုၚ်ဒၟံၚ် ကပေါတ်ဗၞိက်သေံဂှ်ရ ကပေါတ်ဗၞိက်သေံ ဟွံလုပ်ရတုဲ အပ္ဍဲဗွဝ်ဖျာဂှ် ဒးသွံတြးဒၟံၚ် ကပေါတ်ဗၞိက်မသၟေဟ်ဒၟံၚ်တအ်ဂှ်သၟးတုဲ ယဝ်အခိၚ်လအ်ကၠုၚ်မ္ဂး ကပေါတ်ဗၞိက်ပိုတ်ကၠုၚ်မာန်ရောၚ် ညးဆက်ဟီုရ။
မွဲလ္ပာ်ဂှ်ပၠန် ကံၚ်ဇြဳပၞာန် ပ္ဍဲအရာရပ်ကၠုၚ်ကွဳစက်ဗၞိက်သေံတံဂှ် ဗွဲမတေၚ်ဂြတ် ရပ်ကၠုၚ်ဒၟံၚ် သီုကွဳစက်ကဵုလဝ်အခေါန် သီုကွဳစက်ဟွံကဵုလဝ်အခေါန်တအ်ဂှ်တုဲ ကွဳစက်ဟွံဂွံကဵုလဝ်အခေါန်တံဂှ်တှ်ေ သီကေတ်ဒၟံၚ် နဒဒှ်ဒြပ်ကၟိန်ဍုၚ်ရောၚ် ဂွံတီကေတ်ရ။
အခိၚ်လၟုဟ် ဒှ်ဒၟံၚ်အခိၚ်ဗြဲတုဲ အကြာဂၠံၚ်မလီု ဂၠံၚ်ပရေံဂှ် ဒးယိုက်ဖ္ဍိုက်ဒၟံၚ် ကပေါတ်ဗၞိက်သေံတံဂှ်တုဲ သၞေဟ်ကၚ်စၟဳတ်ကံၚ်ဇြဳပၞာန်တအ်ဂှ်လေဝ် ဒးကဵုဒၟံၚ်လှုဲဗွဲမဂၠိုၚ်ဂၠေၚ်တုဲ ဂွံတတ်မံၚ်ဂှ်ရ ဒးဒုၚ်ရပ်ကၠုၚ်သာ်ဏံဂှ် ပရေၚ်ဒးဆောံလေၚ်ဂၠိုၚ်ဒၟံၚ်ရောၚ် သၟာဗၞိက်ဂမၠိုၚ် ဟီုအိုတ်ရ။
တွဵုရးဍုၚ်မန်ဝွံ ဗွဲအဓိက ဒးရပ်စပ်ဒၟံၚ် ကပေါတ်ဗၞိက်သေံ မပ္တံကဵုဗၞိက်စၞစသုၚ်၊ ဗၞိက်မၞိဟ်အရပ်စပ်၊ ဂဥုဲဇဗ၊ ဗၞိက်ပယျေဝ်၊ ကပေါတ်ဗၞိက်သွက်ပရေၚ်သိုၚ်ခၞံ ကေုာံ သီုကဵုကပေါတ်ဗၞိက်အရပ်စပ်နာနာတံဂှ်ရ။
အတိုၚ်ဂလာန် ညးမစုက်လုက်ကဵုကံၚ်ဇြဳပၞာန်တအ်ဂှ်မ္ဂး စဵုကဵုဂိတုဂျူလာၚ် ၁၉ ဂှ် ကံၚ်ဇြဳပၞာန် ထ္ၜးဟိုတ်ကဵု ဖ္ဍိုက်ကပေါတ်ဗၞိက်ဟွံလုပ်သၞောဝ်တံဂှ်တုဲ ရပ်ဂွံလဝ် ကွဳစက်ဗၞိက်သေံ ဟွံအောန်နူကဵု ၂၀၀ မပြၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ