မတ်မလီု၊ ဂျူလာၚ် ၂၀
ဟိုတ်နူကံၚ်ဇြဳပၞာန် ကော်ဘိက်ကၠုၚ်တုဲ ကောန်ဒပ်စဵုဒၞါညးဍုၚ်ကွာန် PDF တအ် သ္ဂံၚ်ပၠန်ဂတးတအ် လုပ်စိုပ်ဖျေံကၠုၚ်လွဟ်ဆက်ဒၟံၚ်ရောၚ် ထ္မံက်ထ္ၜးလဝ် ပ္ဍဲလိက်ပရိုၚ်တြးဝါဒတံရ။
ပ္ဍဲလိက်ပရိုၚ်တြးဝါဒ ကံၚ်ဇြဳပၞာန် မလလောၚ်ပ္တိတ်လဝ် ပ္ဍဲဂိတုဂျူလာၚ် ၁၆ စဵုကဵု ဂိတုဂျူလာၚ် ၁၈ ဂှ် အပ္ဍဲပွိုၚ်ပိတ္ၚဲ ကောန်သ္ဂံၚ်ပၠန်ဂတး လုပ်ဖျေံကၠုၚ်လွဟ် စဵုကဵု ၄၄ တၠရောၚ် သ္ဂးရ။
ညးမလုပ်စိုပ်ဖျေံကၠုၚ်လွဟ်ဂမၠိုၚ်ဝွံ ဒှ်ကောန်သ္ဂံၚ် နူဒပ်တအာၚ် TNLA ၊ ဒပ်ပၞာန်ဗၠးၜးကချေၚ် KIA ၊ PDF မာန္တလေဝ်၊ ဒပ်ပၞာန်ဗၠးၜးညးဍုၚ်ကွာန်ဓနု DPLA ၊ PDF မန်တအ်ရောၚ် လလောၚ်ပ္တိတ်လဝ်ရ။
လ္ပာ်ကံၚ်ဇြဳပၞာန်တအ် ဒုၚ်တၠုၚ်လဝ် ကောန်သ္ဂံၚ်လုပ်ဖျေံကၠုၚ်လွဟ်တံဂှ်တုဲ ကဵုထ္ပက်လဝ်စၟတ်တဲဒုၚ်ဝန်တုဲ ကလေၚ်ဖျေံလာပ်ပအပ်ကဵုလဝ် သြန် ကေုာံ စၞစတံရောၚ် တြးလဝ်ဝါဒရ။
နူကဵုသြၚ်လောန်တိုၚ်(မ်) ဆက်စၠောံသၟာန်သၟုက်လဝ် ဇရေၚ်ဒပ်ပၠန်ဂတးတအ်ဂှ်မ္ဂး ကောန်သ္ဂံၚ်ပၠန်ဂတးလဵုမွဲမှ လုပ်ဖျေံလွဟ် ဇရေၚ်ကံၚ်ဇြဳပၞာန် ဟွံမွဲတုဲ ပရူဒဒှ်လၟုဟ်ဂှ်ဝွံ ဒှ်ဆၜိုတ်တြးဝါဒရရောၚ် ဟီုအိုတ်ရ။
ဂကောံရပ်လွဟ်ဂမၠိုၚ် ပါလုပ်သီုကဵု PDF ဂမၠိုၚ် သွက်ဂွံပံၚ်တောဲပါလုပ်အာ လ္တူဂၠံၚ်တရဴပေါဲရုဲမာဲဂှ် ပ္ဍဲဂိတုဂျူလာၚ် ၅ တုဲကၠုၚ်တေံ ကံၚ်ဇြဳပၞာန် ဂးကၠုၚ် “ပရေၚ်ကော်ဘိက် သွက်ဂုန်ဖဵုကၟိန်ဍုၚ်” တုဲ ကော်ဘိက်ကၠုၚ် ဂကောံတံဏံ သွက်ဂွံလုပ်ဖျေံလွဟ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−MOI