သေန်ကာပေါဝ်၊ ဂျူလာၚ် ၂၃
ပ္ဍဲပယျဵုအကြာၜါဍုၚ်ဂှ် သတ္တာဟတုဲကၠုၚ်တေံ ကောန်ပၞာန်သေံၜါတၠ ဂွံအာဝပ်တုဲ ပ္ဍဲဂိတုဂျူလာၚ် ၂၀ တေံ နူကဵုအလဵုအသဳသေံ စောဲစပ်ကၠုၚ် ဍုၚ်ကာမ္ဗောဒဳယျာ ဒဒှ်ရပစူလဝ်မာၚ်တိုပ်တိဂှ်တုဲ အကြာၜါဍုၚ် ပရေၚ်ကြံၚ်မ္ၚိုဟ် သၠုၚ်ကၠုၚ်ရ။
သ္ကိုပ်ဝန်ဇၞော်တြေံကာမ္ဗောဒဳယျာ ဟောန်သာန်ဂှ် ဂွံဆက်စၠောံ ကုသ္ကိုပ်ဝန်ဇၞော်တြေံဍုၚ်သေံ တက်ဇြေန်ယှေန်နဝါတ် ဆန္ဒဟွံမွဲရောၚ် ဟီုလဝ်တုဲ အခိၚ်က္ဍိုပ်သ္ကိုပ်တြေံ နူၜါဍုၚ်ဏံ ပတိုန်ဒုဟ်ပါ်ပါဲဒၟံၚ်ညးသ္ကအ်ဂှ် ပရူဒဒှ်သာ်ဏံ ဒှ်ကၠုၚ်လဝ်ရ။
ညးတအ်ၜါတၠဝွံ အခိၚ်အဝဵုညးတအ်တဴဂှ် ညးဂမၠိုၚ် ညာတ်ကၠုၚ်လဝ်ညးတအ် နဒဒှ်မဟာမိတ်ဍုက်ကေဝ်အိုတ်ရ။
ကောန်ဝုတ်တက်ဇြေန် ဗဴဓံၚ်ဓါန်ယှေန်နဝါတ် သ္ကိုပ်ဝန်ဇၞော်တြေံသေံဂှ်ဝွံ မာနသၠုၚ် ဗဒေက်ဖျဝ်ညးတုဲ ဆက်ဆောံကၠုၚ်ဂှ်ရ ညးမထေက်ကဵုဒးထပိုတ်အဆက် ကုတက်ဇြေန်ဂှ်ဝွံ ဒှ်ညးရောၚ် ဟောန်သာန် ဟီုကၠုၚ်လဝ်ရ။
နကဵုညး ဂွံဆက်ဆောံတက်ကျာ ကုညးမဒးဒုၚ်စောဲစပ်လဝ် နကဵုဂဗုတ်ဗွဲမဂၠိုၚ် ကုညးမဒးဒုၚ်ဖျေံလဝ်ဒုဟ်ဒဏ်ဂှ် စိုတ်ဟွံလုပ်စရောၚ်ဂှ်လေဝ် ဟောန်သာန် ဟီုကၠုၚ်ရ။
တက်ဇြေန်ဂှ်တှ်ေ ဒဒှ်မဆက်စၠောံတက်ကျာဒၟံၚ် ကုဟောန်သာန်ဂှ် ဒးဒေါအ်ဏောၚ်တုဲ ဂလာန်ညးမဟီုဂးကၠုၚ်တအ်ဂှ် ဖေက်ကၠတ်ရပ်လဝ်ရမျာၚ်သ္ၚိတ်တ်ရောၚ် သာ်ဝွံ ဟီုလဝ် ကုမဳဒဳယျာသေံဂမၠိုၚ်ရ။
ယဝ်ညးဟွံမၚ်မွဲဒ္ဂေတ်ပဋိပတ်မ္ဂး တုဲကၠုၚ်နူသၞာံ ၂၀၀၆ စဵုကဵုသၞာံ ၂၀၂၅ ပွိုၚ် ၁၉ သၞာံဏံ မူဟိုတ်ဂွံပပဓာန်လဝ်ကုညးရော မိက်ဂွံသၟာန်တုဲ တက်ဇြေန် ကလၚ်ကေတ်ကသပ်ညးလၟိုန်တုဲ သီုကဵုကော်ကၠုၚ်ညး က္ဍိုပ်သ္ကိုပ်ဂၞန် ၁ ဂှ် ဟောန်သာန် ဟီုလဝ်ရ။
ပပ္တံနူကဵုတက်ဇြေန်ပါလုပ်ကၠုၚ် ပ္ဍဲပရေၚ်ဍုၚ်ကွာန်ဍုၚ်သေံတုဲဂှ် အကာဲအရာဒှ်ကၠုၚ်ဒၟံၚ်ဟွံညိၚ်ဝတ်ဂှ်လေဝ် ဟောန်သာန် သ္ဂးရ။
ပ္ဍဲကဵုပရေၚ်မာၚ်တိုပ်တိဗ္တိုဟ်ထ္ကး ပ္ဍဲဒေသချံၚ်ဗံက် ပ္ဍဲဂိတုဂျူလာၚ် ၁၆ တေံဂှ် ကောန်ပၞာန်သေံပိတၠ ဂွံအာဝပ်တုဲ မွဲတၠ ဒးဆောံလေၚ်အာဇိုၚ်မွဲဒိုဟ်ရ။
မာၚ်တံဏံဝွံ ဒှ်ကပေါတ်နူတိုက်လွဟ်သေံဟွံသေၚ် ပစူလဝ် အခိၚ်ဟွံလအ်ဏီဂှ် ဌာနဝန်ဇၞော်ကာဍုၚ်သ္အာၚ်သေံ ဟီုလဝ်တုဲ ဒှ်ပွဝးပ္ကဝ် သၞောဝ်ဍုၚ်နာနာ ဒှ်ပွဝးပ္ကဝ်အဝဵုစၟိန်ပြမာန်ကၟိန်ဍုၚ်သေံရောၚ် ဟီုလဝ်ရ။
Ref: Agencies