တဳဟဳရာန် ဂျူလာၚ် ၂၂
ကြဴနူက္ဍိုပ်သ္ကိုပ်ပရေၚ်ဘာသာ အဳရာန်ဂမၠိုၚ် လလောၚ်ပ္တိတ်ကၠုၚ် တၚ်လလောၚ်တြးစပ်ကဵုပရေၚ်ဘာသာ ဖာတဝါတုဲဂှ် ဂကောံမၞုံယၟု “Blood Covenant” ဂကောံပသစ္စသုၚ်ဆီဂှ် စချူခၞံကၠုၚ်အစဳဇန် သ္ဂောံကၠတ်ဂစိုတ်သမ္မတအမေရိကာန် ဒဝ်နေဝ်ထြာမ်ရ။
ပ္ဍဲအရာကံက်သြန်ဗွဝ်ညးဍုၚ်ကွာန် မဆက်စပ်ဒၟံၚ်ကဵု သၟာကမၠောန်တြေံ မဳဒဳယျာကၟိန်ဍုၚ်အဳရာန်ဂှ် ညးမဂစိုတ်ကၠေံ ဒဝ်နေဝ်ထြာမ်မာန်ဂှ် ဖျေံအာလာပ် ဒဝ်ဠာအမေရိကာန် ၄၀ မဳလျာန်ဏောၚ် ဌာန်ပရိုၚ် The New York Post ထ္မံက်ထ္ၜးလဝ်ရ။
ကြဴနူထြာမ် ကဵုကၠုၚ်အမိၚ် သွက်ဂွံဗ္တိုက်ရုၚ်စက်နျူကလဳယျာအဳရာန် ပိရုၚ်တုဲဂှ် က္ဍိုပ်သ္ကိုပ်ပရေၚ်ဘာသာအဳရာန် ဗွဲမဂၠိုၚ် စၟတ်ကၠုၚ်လဝ်ညးတေံ နဒဒှ်သၞ ကျာ်အလ္လာရ။
ဂကောံသုတေသနမဳဒဳယျာဒေသသ္ကုတ်လဒေါဝ်ဗၟံက် MEMRI မဒှ်ဂကောံတၠပညာဖျေံသ္ဇိုၚ်အမေရိကာန်ဂှ် ဂကောံ “ပသစ္စသုၚ်ဆီ” ဏံဝွံ ဒှ်ဂကောံဒက်ပ္တန်လဝ် နကဵုအရီုဗၚ်စဵုဒၞါ အလဵုအသဳအဳရာန်ရောၚ် ဟီုကၠုၚ်လဝ်ရ။
နကဵုညးမပတှ်ေစှ်ေစိုတ် လ္တူကျာ်ထာဝရတအ် သွက်ဂွံဝေၚ်အာပၞာန်ဂျဳဟာတ်ဂှ် သၠးကၠေံလမျီု ကဵုဒါန်သြန် သွက်ဂွံပါလုပ်အိုတ်ဂှ် ဂကောံဏံ ဆဝ်မ္ၚုဟ်လဝ်ရ။
သွက်ဂွံကၠတ်ဂစိုတ်ထြာမ်ဂှ် ရံၚ်ကဵုပရေၚ်ဘာသာမ္ဂး စှ်ေကဵုဗဗွဲဓဝ်ရောၚ်ဂှ်လေဝ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံပသစ္စသုၚ်ဆီဂှ်ရ။
ပရေၚ်သ္ဂောံကၠတ်ဂစိုတ်ထြာမ်ဏံဂှ် ပ္ဍဲကဵုဗွိုၚ်ပရေၚ်ဘာသာ ကေုာံ ပ္ဍဲမဳဒဳယျာအဳရာန်တအ်ဂှ် ဒှ်ပရေၚ်မၞိဟ်ဟီုဂၠိုၚ်မွဲရ။
ယဝ်ရဂစိုတ်ကၠေံထြာမ်မာန်မ္ဂး ကလိဂွံသြန်ဒဝ်ဠာ ၄၀ ဒဿမ ၃ ပြကောဋိကိုဋ်ဏောၚ်တုဲ သ္အာၚ်နူဂှ်ပၠန် ဂွံစိုပ်ဌာန်ဒှ်တသိုက်ဏောၚ်တုဲ ဂွံဒုၚ်သ္ပစၟတ်သမ္တီ နဒဒှ်မၞိဟ်စဵုဒၞါဘာသာအေဿလာမ်ဏောၚ်ဂှ် ဂကောံပသစ္စသုၚ်ဆီဏံ ဟီုလဝ်ရ။
ပြဝဂကောံပသစ္စသုၚ်ဆီဏံဂှ် က္ဍိုပ်သ္ကိုပ်ဘာသာအဳရာန် ပ္ဍဲ ၁၀ တွဵုရး ထံက်ဂလာန်ကဵုဒၟံၚ်ဇြဟတ်ရာၚ် ဂွံတီကေတ်ရ။
Ref: The Jerusalem Posts