ၜၚ်ကံက်၊ ဂျူလာၚ် ၂၅
ပရေၚ်ဗ္တိုက် အကြာသေံ−ကာမ္ဗောဒဳယျာ ကလေၚ်စကၠုၚ် ပ္ဍဲဂိတုဂျူလာၚ် ၂၄ ပယျာံဂယးပြဟ်ဏံဂှ် အသိၚ်သၠုၚ်ကၠုၚ်မံၚ်တုဲ ဍုၚ်နာနာဂမၠိုၚ် လလောၚ်ပ္တိတ်လဝ် တၚ်ကဵုသတိ မဆေၚ်စပ်ကဵုကောန်ဍုၚ်ညးတအ်အိုတ်ရ။
ပပ္တံနူဂိတုဂျူလာၚ် ၂၄ ဏံတုဲ အခိၚ်သၟိၚ်တၠအဝဵုသေံ ကဵုမၞိဟ်ဒေသ နွံဒၟံၚ်ပ္ဍဲဒၞါဲပဋိပက္ခတအ် ဆုဲပြံၚ်ကၠေံဒၞါဲဗၠးဘဲတအ်ဂှ် နကဵုကောန်ဍုၚ်အမေရိကာန် နွံဒၟံၚ်ပ္ဍဲဒေသတအ်ဏံ ဟွံသေၚ်မ္ဂး ယဝ်နွံဗ္ဒါဲဂှ်မ္ဂး သွက်ဂွံကေတ်ကသပ် ဇရေၚ်သၟိၚ်တၠအဝဵုသေံတံဂှ် ရုၚ်ကလုတ်အမေရိကာန် ဖျေံသ္ဇိုၚ်ဍုၚ်သေံ ကဵုလဝ်သတိရ။
ရုၚ်ကလုတ်သေံ ပ္ဍဲဍုၚ်ပဏမ်ဖေန် ဍုၚ်ကာမ္ဗောဒဳယျာဂှ် နကဵုကောန်ဍုၚ်ညးတအ် ယဝ်ပၟိက်ဟွံဇၞော်မ္ဂး သွက်ဂွံတိတ်စ္ဍးကၠေံနူဍုၚ်ကာမ္ဗောဒဳယျာ ဗွဲမပြဟ်ဂှ် လလောၚ်တြးလဝ်ရ။
ရုၚ်ကလုတ်ကြုက် ပ္ဍဲဍုၚ်ကာမ္ဗောဒဳယျာဂှ်လေဝ် သွက်ဂွံပါဲဒလေတ် ဒေသပယျဵုပဋိပက္ခဒှ်မံၚ်ဂှ်ကီု သွက်ဂွံဆက်မံၚ် နကဵုသတိအိုတ်ဂှ် ကဵုသမ္တီလလောၚ်တြးလဝ်ရ။
ဌာနဝန်ဇၞော်ကာဍုၚ်သ္အာၚ်ကြုက်ဂှ်တှ်ေ စပ်ကဵုပရေၚ်ကြံၚ်မ္ၚိုဟ် အကြာၜါဍုၚ်ဏံ အသိၚ်မသၠုၚ်ကၠုၚ်မံၚ်ဂှ်တုဲ ဒဒှ်ရဒှ်ဓဝိၚ်ဂှ် ဟီုလဝ်တုဲ သွက်ဂွံထိၚ်အာပရေၚ်ဆက်ဆောံ သီုကဵုဒတုဲဖဵုဍာ်ဇမၠိၚ် သွက်ၜါဍုၚ်ဂှ် ပၟိက်ဇၞော်ရောၚ် ထ္မံက်ထ္ၜးလဝ်ရ။
ပွန်ပရေၚ်ပၞာန်ကာမ္ဗောဒဳယျာ နွံမွဲဒမြိပ်ပယျဵုဒှ်ဒၟံၚ်ပရေၚ်ကယျာန်ဓဝါန်ဂှ် ဍုၚ်သေံ ဗ္တိုက်ကၠုၚ်မံၚ်ကဵု ပၞာန်ကျာရ။
နူဌာနဝန်ဇၞော်ကာစဵုဒၞါ ကာမ္ဗောဒဳယျာ ဗျိပၠုတ်ပတိုန်ကၠုၚ်ဒုဟ် ပရေၚ်ဍုၚ်သေံ ဗ္တိုက်လဝ်ကဵုပၞာန်ကျာဂှ်တုဲ ဒှ်ပွဖံက်ပကဝ်အဝဵုအပိုၚ်အခြာကၟိန်ဍုၚ် ကေုာံ ဖံက်ပ္ကဝ်သၞောဝ်ဍုၚ်သ္အာၚ်ဏောၚ်ဂှ် ဟီုလဝ်ရ။
ပ္ဍဲကဵုပယျဵုဂှ် ကြဴနူကောန်ပၞာန်သေံမွဲတၠ လိုန်ဒးမာၚ် ဇိုၚ်ပိုတ်အာတုဲ ဂွံမွဲတ္ၚဲဂှ် ပရေၚ်ဗ္တိုက်အကြာၜါဍုၚ်ဏံ ကလေၚ်ကၠုၚ်မွဲဝါပၠန်ရ။
ဍုၚ်သေံ ထဍေၚ်ပတိတ်လဝ် အမာတ်ကလုတ်ကာမ္ဗောဒဳယျာတုဲ ဟိုတ်နူကလေၚ်ကော်လဝ်အမာတ်ကလုတ်ညးတံ နွံဒၟံၚ်ပ္ဍဲဖဏံဖေန်ဂှ်တုဲ ပရေၚ်ဆက်ဆောံအကြာၜါဍုၚ်ဏံ အပ္ဍဲပွိုၚ်ဂၠိုၚ်ကဵုစှော်သၞာံဂှ် ဒှ်ကၠုၚ်လဝ်အကာဲအရာပရေံအိုတ်ရ။
စပ်ကဵုပရေၚ်ဗ္တိုက်သာ်ဏံတုဲ သီုၜါဍုၚ်ဂှ် တးပါဲလဝ် ညးမွဲမှဗတိုက်လဝ်ကၠာဟွံသေၚ်တုဲ ဟိုတ်နူဒးဒုၚ်ဗ္တိုက်တုဲ ကလေၚ်ဗတိုက်လဝ်ရောၚ် ဂးတုဲ ဟီုဒၟံၚ်အိုတ်ရ။
အပ္ဍဲပရေၚ်ပန်ပှော် အလန်ပထမဂှ် ကောန်ပၞာန်ကာမ္ဗောဒဳယျာမွဲတၠ ချိုတ်အာလဝ်တုဲ သ္ကိုပ်ဝန်ဇၞော်တြေံ ကာမ္ဗောဒဳယျာ ဟောန်သာန်ကဵု သ္ကိုပ်ဝန်ဇၞော်သေံ ဗဴဓံၚ်ဓာန်တအ် တက်လဝ်ကျာ သဳကၠဳလဝ် နကဵုဖုၚ်ဂှ် မံက်ပြးအာတုဲ ဗဴဓံၚ်ဓာန် ဒးဒေါအ်ဇူလဝ်ရ။
အကြာသေံကဵုကာမ္ဗောဒဳယျာဂှ် ပရေၚ်ဆက်ဆောံပံၚ်တောဲရေၚ်တၠုၚ်တအ်လေဝ် နွံတုဲ ပရေၚ်ပြိုၚ်ပ္ကာန်တအ်လေဝ် နွံဒၟံၚ်ရ။
Ref: CNN