ၜၚ်ကံက်၊ ဂျူလာၚ် ၂၆
ဟိုတ်နူပရေၚ်ဗ္တိုက် အကြာသေံကဵု ကာမ္ဗောဒဳယျာဂှ်တုဲ မၞိဟ်မွဲကိုဋ်ပြၚ် ဒးဂြိပ်ဒဴလဝ်ရောၚ် အလဵုအသဳၜၚ်ကံက် ဟီုလဝ် ပ္ဍဲဂိတုဂျူလာၚ် ၂၅ တေံရ။
အကြာဒပ်ပၞာန်ၜါဍုၚ်ဏံ ဗ္တိုက်ဒၟံၚ်ညးသ္ကအ်တုဲ အခိၚ်လၟိဟ်မၞိဟ်ချိုတ် ဂၠိုၚ်တိုန်ကၠုၚ်ဂှ် ညံၚ်ပရေၚ်ဂၠါဲသၞ ပရေၚ်ဗ္တိုက်တံဏံ ဂွံဒေါအ်ဒေၚ်အာဂှ် ဍုၚ်သ္အာၚ် ဍုၚ်ဇြဟတ်ဇၞော်ဂမၠိုၚ် ဖတိုက်ဖ္အောဝ်လဝ်ရ။
ပရေၚ်ကယျာန်ဓဝါန်ပယျဵု ဒှ်ဒၟံၚ်အခိၚ်ကာလဗွဲမလအ်လဂှ် ပ္ဍဲဂိတုဂျူလာၚ် ၂၄ တေံ ပြံၚ်လှာဲဒှ်အာလွေဟ် ပရေၚ်ဗ္တိုက်ဇၞော်ကဵုဇြဟတ် သီုကဵုက္ၜၚ်ကျာဗတိုက်၊ လွဟ်ဇၞော်၊ ကွဳစက်ခြပ်ပသဲ၊ သီုကဵုကောန်ဒပ်ဗလးတိတံဂှ်တုဲ စပ်ကဵုပြဒ္ဒညာဏံတုဲ ပ္ဍဲဂိတုဂျူလာၚ် ၂၅ အခိၚ်ဇိုၚ်သဝ်တ္ၚဲဂှ် ကံၚ်ဇြဳဂီုကၠီုကုလသမဂ္ဂ စဳဇန်လဝ် သွက်ဂွံကၠောန်ဗဒှ်ပေါဲကောံဓရီုကာတၟေၚ်ရ။
မၞိဟ်မွဲကိုဋ်ပြၚ် မၞုံပ္ဍဲကဵုပယျဵု တွဵုရး ၄ ဂှ် ပလံၚ်ဗစိုပ်လဝ် ပ္ဍဲဗ္ဒိုပ်ဇူဒီုဗွဲယာယဳ ၃၀၀ ဒၞါဲဂှ် ဝန်ဇၞော်ကာအပ္ဍဲဍုၚ် ဍုၚ်သေံ ဟီုရ။
ဟိုတ်နူပရေၚ်ဗ္တိုက် ဍုၚ်ကာမ္ဗောဒဳယျာဂှ်တုဲ ကောန်ပၞာန်သေံမွဲတၠ၊ ကောန်အရာပ် ၁၃ တၠ ဒးချိုတ်အာလဝ်ရောၚ် ဌာနဝန်ဇၞော်ပရေၚ်ထတ်ယုက်သေံ ထ္မံက်ထ္ၜးလဝ်ရ။
ပ္ဍဲကဵုဍုၚ်ကာမ္ဗောဒဳယျာ ဍုၚ်သာမ်ရာအောန် ခြာဒၟံၚ်ကဵုပယျဵု ၜိုတ် ၂၀ ကဳလောမဳတာဂှ် ပ္ဍဲဂိတုဂျူလာၚ် ၂၅ အခိၚ်နူဂယးဂှ် ဂွံမိၚ်ကေတ်လဝ် ဗြုရမျာၚ်လွဟ်ဇၞော်ရောၚ် အ္စာပရိုၚ်ဂမၠိုၚ် ဟီုရ။
မွဲဒမြိပ်ပယျဵု မၞုံဇမၠိၚ် ၈၀၀ ကဳလောမဳတာ အကြာဍုၚ်ဇိုၚ်ဝုတ်ဒိုဟ်ၜါဏံ ကၟဳထဳအာတရဴဂေတ်ဂၠးတိ ဂၠိုၚ်ကဵုပြကောဋိကိုဋ် ကၠုၚ်စိုပ်ဂေတ်ဝေၚ်လေပ်ဂှ် စပ်ကဵုဒေသလ္ၚဵုတအ်တုဲ ဒှ်ဒၟံၚ်ပရေၚ်ကယျာန်ဓဝါန် လအ်ကၠုၚ်ဣရ။
ဒေသပယျဵုလ္ၚဵုဂှ်တှ်ေ ညးပိုၚ် အဲပိုၚ် ဟီုဒၟံၚ်တုဲ အပ္ဍဲပေါဲဗ္တိုက် ဒှ်လဝ် အကြာသၞာံ ၂၀၀၈ ကဵု ၂၀၁၁ ဂှ် မၞိဟ် ၂၈ တၠ ဒးချိုတ်အာလဝ်တုဲ မၞိဟ်ဂၠိုၚ်ကဵုလ္ၚီ ဒးဂြိပ်ဒဴလဝ်ရ။
ရုၚ်သၞောဝ်ဓဝ်ကုလ သောၚ်ကလးကဵုလဝ် ပြဒ္ဒညာဏံ ပွိုၚ်စှ်သၞာံပြၚ်ကီုလေဝ် ပ္ဍဲဂိတုမဂှ်ေ ဒှ်လဝ်ပရေၚ်ဗ္တိုက်တုဲ ကောန်ပၞာန်ကာမ္ဗောဒဳယျာမွဲတၠ ချိုတ်တုဲ အသိၚ်သၠုၚ်တိုန်ကၠုၚ် စဵုကဵုဒှ်ပရေၚ်ဗ္တိုက်လၟုဟ်ရ။
အပ္ဍဲအကြာဏံ ပရိုၚ် သ္ကိုပ်ဝန်ဇၞော်တြေံကာမ္ဗောဒဳယျာ ဟောန်သာန် ဂြိပ်တိတ်အာယျဂှ် ဌာန်ပရိုၚ်ကာမ္ဗောဒဳယျာဂမၠိုၚ် တးပါဲလဝ်တုဲ ထ္မံက်ထ္ၜးကၠုၚ် သီုကဵုဗီုရုပ် ဟောန်သာန်ကောပ်ကာဲဒၟံၚ်ပရေၚ်ပၞာန်ရ။
အကြာၜါဍုၚ်ဏံဂှ် ဇြဟတ်ပၞာန် တၞဟ်ခြာမံၚ်နွံတုဲ ဍုၚ်သေံဂှ်တှ်ေ ဇြဟတ်ပၞာန်ကီု ဇြဟတ်လွဟ်ကီု နူလ္ပာ်နာနာဂှ် ခိုဟ်ဒၟံၚ်နူကဵုဍုၚ်ကာမ္ဗောဒဳယျာရ။
Ref: AFP