မတ်မလီု၊ ဂျူလာၚ် ၂၆
ပ္ဍဲတွဵုရးဍုၚ်မန် ဟိုတ်နူအသိၚ်လဗိုတ်ကျာဝဳဖာတုဲ ကျာမေလံၚ် ကေုာံ ကျာသ္ကာတ်ပိုက် ဒှ်ဒၟံၚ်တုဲ မၞိဟ်ဇီုကပိုက်ချိုတ်ကဵု သ္ၚိလီု ထပ်ဂၠိုၚ်ကၠုၚ်တုဲ နွံပၟိက်ကၠုၚ်ကဵု အရီုဗၚ်ဂၠိုၚ်ကၠုၚ်ရောၚ် ဂွံတီကေတ် ဇရေၚ်ဂကောံရီုဗၚ်ဟံၚ်ပြာ်မှာဇန်တအ်ရ။
စနူဂိတုဂျူလာၚ် ၂၃ တုဲကၠုၚ်ဏံတုဲ ပ္ဍဲကဵုတွဵုရးဍုၚ်မန် ပွိုၚ်ဍုၚ်ပံၚ်၊ သဓီု၊ ဇြပ်ဗု၊ ရေဝ်၊ ကျာ်ထဝ် ကေုာံ ပွိုၚ်ဍုၚ်မုဟ်ဍုၚ်တအ်ဂှ် ဟိုတ်နူကျာသ္ကာတ်ပိုက်တုဲ သ္ၚိမၞိဟ်မံၚ် ဟွံအောန်နူ ၅၀၀၀ လီုလာ်အာလဝ်တုဲ ညးဍုၚ်ကွာန်ကောန်အရာပ် ဒှ်ကၠုၚ် စဵုကဵုဇီုကပိုက်ချိုတ်ရ။
အတိုၚ်တၚ်နၚ် ဂွံလဝ် နူဂိတုဂျူလာၚ် ၂၅ အခိၚ်ဇိုၚ်သဝ်တ္ၚဲဂှ်မ္ဂး ဟိုတ်နူကျာသ္ကာတ်ပိုက်တုဲ ပ္ဍဲပွိုၚ်ဍုၚ်သဓီုဂှ် မၞိဟ်တြုံမွဲတၠ သ္ၚိဍိုက်ဂွံတုဲ ချိုတ်အာလဝ်ရ။
သ္အာၚ်နူဂှ်ပၠန် ဒၟါနူကျာမေလံၚ် ကျာသ္ကာတ်ပိုက်တံဂှ်တုဲ ပ္ဍဲတွဵုရးဍုၚ်မန် ၆ ပွိုၚ်ဍုၚ်ဂှ် ညးဍုၚ်ကွာန်ကောန်အရာပ် ဟွံအောန်နူ ၁၄ တၠ ဇီုကပိုက်ကလိဂွံလဝ်ဝပ်တုဲ ပ္ဍဲကဵုဏံ မွဲတၠဝွံ ဒးဂွိၚ်ဒၟံၚ်ကဵုဘဲအန္တရာယ်လမျီုရ။
ကောန်ဂကောံရီုဗၚ်ဟံၚ်ပြာ်မှာဇန် ဖျေံသ္ဇိုၚ်သဓီု မွဲတၠဂှ်တှ်ေ ဟိုတ်နူကျာသ္ကာတ်ပိုက်တုဲ ပရေၚ်လီုလာ်ဆောံလေၚ် ဂၠိုၚ်ဒၟံၚ်တုဲ စနူကဵုဒၞါဲမံၚ်၊ စၞစ၊ ဍာ်သုၚ်တအ်ဒှ်တမ် နွံပၟိက်ဒၟံၚ်ကဵု အရီုဗၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လီုအာဂှ်တှ်ေ ဂၠိုၚ်ကွေံကွေံ။ အဓိကဂှ်တှ်ေ နွံပၟိက်ဒၟံၚ်ဖအိုတ်ရဏောၚ်။ ဒၞါဲမံၚ်တအ်ဂှ်လေဝ် နွံပၟိက်တုဲ ဇွောံမစၞစတံဂှ်လေဝ် နွံပၟိက်မံၚ်။ ဂဥုဲဇဗတအ် မုတအ် သီုကဵုဍာ်ဂှ် ဟွံမွဲပုဟ်။ ဍာ်ရဂှ် ပိုယ်တအ် ဒးရာန်သုၚ်မံၚ်ကေတ်တ်။ ပြဟ်ဟ်ဏံ မုပရေၚ်ထံက်ပၚ် ဟွံမွဲပုဟ်။ ဗီုဇကုကဵုဇကု ခရိတ်ဇကုကဵုဇကုရ စမံၚ်” သာ်ဝွံ သ္ဂးရ။
ဟိုတ်နူကျာသ္ကာတ်ပိုက်တုဲ ပ္ဍဲပွိုၚ်ဍုၚ်ဗွဲမဂၠိုၚ်ဂှ် ပၟတ်ဓာတ်လလဳပိုတ်ကီု၊ လိုၚ်အေန်တာနိတ် လိုၚ်ပရေၚ်ဆက်စၠောံလ္ၚဵုတအ် ပိုတ်ကီု၊ ဟိုတ်နူတၞံဆုဇၞော်ဇၞော် ဒေါမ်တုဲ ဂၠံၚ်လ္ၚဵု အာကၠုၚ်ဟွံဂွံလေဝ် ဒှ်မံၚ်ရ။
ညးဍုၚ်ကွာန်ဒးဘဲကျာလ္ၚဵုတံဝွံ ပြဟ်ဟ်ဏံ ဒးဆုဲပြံၚ်မံၚ်ဒၟံၚ်ယာယဳ ပ္ဍဲဘာလကျာ်၊ ဇြပ်သ္ဘၚ်ဓဝ်၊ သ္ၚိမသကလောကောဒေံတအ်ဂှ်တုဲ ဒဵုကဵုအခိၚ်လၟုဟ် ဟွံဂွံဒုၚ်ကေတ်တဲ အရီုဗၚ်နူကံၚ်ဇြဳပၞာန်တအ်ဂှ် သ္ဂးအိုတ်ရ။
တွဵုရးဍုၚ်မန်ဝွံ လၟေၚ်သၞာံ စိုပ်ကၠုၚ်ရာသဳကသီုမ္ဂး ဘဲသဘာဝ ဍာ်ဇၞော်၊ ကျာသ္ကာတ်ပိုက်၊ ကျာမေလံၚ် လုပ်စိုပ်ကီု သီုကဵုတိဒဵုလာ်တအ် ဒှ်လေပ်တုဲ ညးဍုၚ်ကွာန်ကောန်အရာပ် ဇီုကပိုက်ချိုတ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ