မတ်မလီု၊ ဂျူလာၚ် ၂၇
ပ္ဍဲတွဵုရးဍုၚ်မန် ခရိုၚ်သဓီု ပွိုၚ်ဍုၚ်ကျာ်ထဝ်ကဵု ပွိုၚ်ဍုၚ်ၜဳကလေၚ်ဂှ် ဟိုတ်နူဒပ်ကံၚ်ဇြဳပၞာန် ပန်ကဵုလွဟ်ဇၞော်တုဲ ညးဍုၚ်ကွာန်ကောန်အရာပ်ၜါတၠ ချိုတ်အာလဝ်ရောၚ် ဂွံတီကေတ် ဇရေၚ်ခရိုၚ်သဓီု ဗော်သွးကောန်ဂကူကရေၚ် KNU ရ။
တုဲကၠုၚ်ဂိတုဂျူလာၚ် ၁၇ တေံ နူကဵုဒပ်အမၠံက်ကံၚ်ဇြဳပၞာန် ဖျေံသ္ဇိုၚ်ဒုၚ်သယိတ် ပွိုၚ်ဍုၚ်ကျာ်ထဝ် စၟတ် ၃၁၀ ဂှ် ပေါဲဗ္တိုက်ဟွံမွဲမွဲသာ် ပန်လဝ်လွဟ်ဇၞော် ပ္ဍဲကွာန်(သုံးခွ) ရ။
ဟိုတ်နူမကမ်လွဟ်ဇၞော် ဒတုံဗ္တိုဟ်ထ္ကးအာလဝ်တုဲ သဝ်အာကာ အာယုက် ၁၅ သၞာံ ဒၟံၚ်ကွာန်(သုံးခွ) ဂှ် ဒးလွဟ်ဇၞော်တုဲ လမျီုဒးအိုတ်အာရ။
သ္အာၚ်နူဂှ်ပၠန် ပ္ဍဲဂိတုဂျူလာၚ် ၂၃ တေံဂှ်လေဝ် ဒပ်ကံၚ်ဇြဳပၞာန် ပန်ကၠုၚ်လဝ်လွဟ်ဇၞော် ပ္ဍဲကွာန်အလူလေ ပွိုၚ်ဍုၚ်ၜဳကလေၚ်ဂှ်တုဲ နဝ်ခေန်နာန်မိုဲ အာယုက် ၁၅ သၞာံ ဒးလွဟ်ဇၞော်တုဲ ချိုတ်အာလဝ်ရောၚ် သ္ဂးရ။
အပ္ဍဲကဵုဒပ်ကံၚ်ဇြဳပၞာန် ပန်ကၠုၚ်လွဟ်ဇၞော်ဂှ် သ္ၚိညးဍုၚ်ကွာန်ဒေသ မသုန်မ ဇီုကပိုက်လီုလာ်အာလဝ်တုဲ ကၠအ်ထၜိုတ်ကဵု ကၠအ်ဂူယာလ္ၚဵု လီုလာ်အာနွံရောၚ် ဂွံတီကေတ်ရ။
တုဲကၠုၚ်ဂိတုဂျူလာၚ် ၂၁ တေံဂှ်လေဝ် ဒပ်ကံၚ်ဇြဳပၞာန် ကၠုၚ်စိုပ်ထောံလဝ်မခတိုဟ် လျိုၚ်ပံၚ် ၅၀၀ နကဵုက္ၜၚ်ကျာဂျက်ဖိုက်တာ ပ္ဍဲကွာန်(ဆောၚ်နိုၚ်ကြီး) ပွိုၚ်ဍုၚ်ကျာ်ထဝ်ဂှ်ကီုလေဝ် မၞိဟ်ဇီုကပိုက်ကလိဂွံဝပ် ဟွံမွဲပုဟ်ဂှ် သ္ဂးရ။
ပ္ဍဲကဵုကွာန် မၞုံပ္ဍဲခရိုၚ်သဓီု KNU ဂှ် ဟိုတ်ဟွံမွဲမွဲသာ် ကံၚ်ဇြဳပၞာန် ပန်ကၠုၚ်လွဟ်ဇၞော် ထောံမံၚ်မခတိုဟ် နူကဵုပၞာန်ကျာတအ်ဂှ်တုဲ ညးဒေသဂမၠိုၚ်ဝွံ ဒးမံၚ်တန်တဴဒၟံၚ် သီုဖေက်သီုလကိုတ်တုဲ ဇီုကပိုက်ကၠုၚ် သီုကဵုပရေၚ်စသုၚ်မံၚ်စံၚ်သ္ၚိကၟိန်တအ်ရ။
အပ္ဍဲဂိတုဂျောန်တုဲကၠုၚ်တေံ ပ္ဍဲခရိုၚ်သဓီု KNU ဂှ် ဟိုတ်နူကံၚ်ဇြဳပၞာန် ပန်ကၠုၚ်လွဟ်ဇၞော်တုဲ ညးဍုၚ်ကွာန်ကောန်အရာပ်မွဲတၠ ချိုတ်တုဲ ထပှ်တၠ ဇီုကပိုက်ကလိဂွံလဝ်ဝပ်တုဲ ဘာလကျာ်ကဵု သ္ၚိဒၟံၚ် ၁၁ မ လီုအာလဝ်ရ။
ပရိုၚ်−သြၚ်လောန်တိုၚ်(မ်)
ဗီုရုပ်−CJ