မတ်မလီု၊ အဝ်ဂတ် ၅
ဟိုတ်နူပေါဲဗတိုက် က္တဵုဒှ်လဝ် ပ္ဍဲကဵုတွဵုရးမန်တုဲ ရဲဒးပါဲဒဴလဝ်ဘဲပၞာန် မွဲချိုန်ခဏတံဂှ် ကဵုမံင်အထံက်ပင်သြန်ရောင် ကဝ်မယှေန်ပၞာန်တံ တြးဝါဒဟီုမံင်ကီုလဝ် နတဲနဇိုင်ဂှ် ရဲဂွံဒုင်လဝ်တဲသြန် ညိညိညညကီု အထံက်ပင် ဍိုက်က်ပေင်င်ကီု ဂွံဒုင်လဝ်တဲဟၟဲရဂှ် ညးဒးပါဲလဝ်ဘဲပၞာန်တံ ဟီုကဵု ဌာန်ပရိုင်သြင်လောန်တိုင်(မ်)ရ။
ပ္ဍဲအဝ်ဂတ် ၃ တုဲကၠုင်ဏံ ဒၞာဲၝောံခန်တွဵုရး ဍုင်မတ်မလီုဂှ် ပေါဲထံက်ပင်အလန်တတိယ သွက်ရဲဒးပါဲဒၞာဲဝါဲတံ နူကဵုကံင်သဳပၞာန် ကဵုလဝ်အထံက်ပင် စဳရေင်ပါ်ပရအ်ဏာ စပ်ကဵုသြန်ဂအုံ ဘဲဒဏ်အန္တရာဲသဘာဝနာနာတံ ကၠောန်ဗဒှ်လဝ်ရ။
ပ္ဍဲကဵုအခန်ကၞာဏံဂှ် ဝန်ဇၞော်ကၟိန်ဍုင် ဒံက်တာသဵုဝေန် နူကဵုဌာနဝန်ဇၞော် ပရေင်ဟံင်ပြာ် ဖျေံဒၞာဲဝါဲ တိုန်စိုပ်တုဲ သွက်ညးမဒးပါဲဒဴလဝ်ဘဲပၞာန် မွဲချိုန်ခဏ ၁၉၀၀၀ ပြင်တံဂှ် မွဲတၠ ၂၀၀၀၀ ဒကေဝ်၊ သွက်ပိဂိတု သီုဖအိုတ်လၟိဟ်သြန်ဗဒါဲ ၁၂၀၀ ပြကောဋိကိုဋ် ကဵုလဝ်အထံက်ပင်ရောင် ကံင်သဳပၞာန် ပတိတ်လဝ်ပရိုင်နွံရ။
ရဲဒးဂြိပ်ပါဲဒဴ အောပ်မံင်ပၞာန်မွဲတၠဂှ်တှ်ေ ပြဟ်ဟ်ဏံ ညးမွဲမှ ဟွံဂံင်ကလေင်စဴကွာန်ဏီတုဲ မၞိဟ်နွံဂှ်နွံ၊ မၞိဟ်ဟၟဲဂှ်ဟၟဲ ဒှ်မံင်၊ ကဝ်မယှေန်ပၞာန် ကဵုသြန်အထံက်ပင်ဟီုဂှ် ဟွံကေင်မိင်ဏီ ဂွံလဝ်ဟွံဂွံလဝ်ဏီပုဟ် သ္ဂးရ။
“ပ္ဍဲကွာန်ဂှ် ဗီုဏံရ၊ ကောန်ကွာန်သီုဖအိုတ် ကလေင်စဴသ္ရိရ ဟွံသေင်ဏီ၊ မၞိဟ်နွံဂှ်နွံ မၞိဟ်ဟၟဲဂှ်ဟၟဲ ဒှ်မံင်ဟဏံ၊ ပြဟ်ဟ်ဏံ ကဵုမံင်သြန်အထံက်ပင်ဟီုဂှ် မၞိဟ်ကရေက်လပါ်ဏံ ဟွံမိင်ပုဟ်၊ ဟွံဂွံသြန်အထံက်ဏီ” သာ်ဝွံ ဟီုရ။
တုဲပၠန် သွက်ရဲဒဴပၞာန်တံ ကဝ်မယှေန်ပၞာန် ကဵုမံင်သြန်အထံက်ပင် ဟီုမံင်ကီုလေဝ် သ္ကိုပ်အုပ်ဓုပ်အရာပ်/ကွာန်ဆေင်စပ်တံ ကဵုသမ္တီ ဆက်နင်ပရိုင်ဟၟဲဏီတုဲ ဒဵုကဵုလၟုဟ် အလုံကွာန်မွဲ ကောန်ကွာန်မွဲတၠမှ သြန်အထံက်ပင် ဟွံဂွံဒုင်လဝ်တဲဏီပုဟ် ညး ဆက်ဟီုရ။
ညးပါဲဒဴဘဲပၞာန် မွဲတၠပၠန် ပြဟ်ဟ်ဏံ ဒၞာဲမံင်ဟၟဲတုဲ ရဲဒဴပၞာန်တံ ဒးကလေင်စဴကၠုင်ကွာန် လုပ်ကွာန်တုဲ ဒးကလေင်မံင်ဒၟံင်၊ ကဝ်မယှေန်ပၞာန် ကဵုအထံက်ပင်သွက်ပိဂိတု ဟီုမံင်ကီုလေဝ် ဍာံဍာံဂှ် ဂွံသြန် ၜါဠက်ဒကေဝ်ဓဝ် ဂးရ။
“ကလေင်စဴမံင်အပ္ဍဲကွာန်၊ မုဒှ်ရောဟီုတှ်ေ ဒၞာဲမံင်ဟၟဲ၊ ဒၞာဲမံင်ဟၟဲဟီုဂှ် ဍာ်လေဝ်ဇၞော်အိုတ်စောန်၊ သိုင်လဝ်တာဲဂှ် ဍာ်စိုပ်မံင်ကဝက်ယျ၊ ဍာ်ဗၠိုက်အာ ဒၞာဲမံင်ဟၟဲတုဲ အာဗက်မံင်ဘာလကျာ်ၢ ပိုဲမၞိဟ်မွဲတၠ ဂွံသြန် ၂ ဠက်ဓဝ်ရ” ဟီုရ။
စပ်ကဵုသြန်အထံက်ပင်ဟီုတှ်ေ သ္ကိုပ်အုပ်ဓုပ်ကွာန်/အရာပ် သၟဝ်တဲကဝ်မယှေန်ပၞာန်တံဂှ် မသကလောကောဒေံဍေံတံရဟေင် စွံအဓိက ကဵုလဝ်သြန်အထံက်ပင် ဍိုက်က်ပေင်င်တုဲ ရဲဒဴပၞာန်တၞဟ်ဟ်တံဂှ်တှ်ေ ၜိုတ်ဍေံတံမိက်ဂွံကဵုရ ကဵုမံင်ရောင် ညးတေံဆက်ဟီုရ။
သြန်အထံက်ပင် ကဵုမံင်သွက်ရဲဒဴပါဲဘဲပၞာန်တံဂှ် ဟိုတ်နူကဵု က္ဍိုပ်သ္ကိုပ်ပၞာန် ဂအုပ်သ္ကိုပ်ပၞာန်ဇၞော် မေန်အံင်လှိုင် ကၠောန်လဝ် ပရေင်ပကီုပရာတ်တုဲ သွက်ရဲဒဴပါဲဘဲပၞာန် မွဲချိုန်ခဏ မွဲတၠမ္ဂး သွက်မွဲဂိတု ကဵုအထံက်ပင် ၜါဠက်ဒကေဝ်ဏောင် ပ္ဍဲဖေဖဝ်ဝါရီ ၁၁ ကာလဆဵုဂဗလဝ်ကု သ္ကိုပ်ဝန်ဇၞော် ရးဒေသဇၞော်ကဵု တွဵုရးဂမၠိုင် ဒၞာဲနေဗျဳတဝ်တုဲ ကေင်ဟီုဂးလဝ်နွံဂှ်ရ ကဵုကၠုင်အထံက်ပင်တံ ဂွံတီရ။
တုဲပၠန် ဟိုတ်နူပရေင်ပကီုပရာတ်ကဵု ရပ်လွဟ်တဝ်စၞေဟ်နာနာ က္တဵုဒှ်မံင်ဂှ်ရ စပ်ကဵုညးဍုင်ကွာန် မ္ဒးဆောံလေင်လဝ်ဂမၠိုင်တံဂှ် လုပ်အဝေါင် အန္တရာဲဘဲဒဏ်သဘာဝတုဲ မ္ဒးကဵုအထံက်ပင်ဗီုဏံဂှ်ကီု၊ အထံက်ပင်ဝွံ သၞာံ ၂၀၂၅ နူကဵုဂျာန်နဝါရီ ဒဵုကဵုဒဳဇြမ်ပါတေံ ဆက်ကဵုအာဏောင် က္ဍိုပ်သ္ကိုပ်ပၞာန် ဟီုဂးလဝ်ရ။
ပ္ဍဲတွဵုရးမန် ဒၞာဲဂကောံပၠန်ဂတးတံဇြဟတ်ခိုဟ် ကျာ်ထဝ်၊ ၜဳကလေင်၊ သဓီု၊ ကျာ်မြဟ်၊ ဇြပ်ဗုကဵု ပွိုင်ဍုင်ရေဝ်တံဂှ် အကြာဒပ်ပၞာန်ကဵု ရဲပၠန်ဂတးတံ မွဲလပါ်ကဵုမွဲလပါ် ခြာဟွံလံဟွံလံ ပန်ပှော်မံင်မွဲဏှမွဲဏှ နွံမံင်တုဲ ရဲဒးပါဲမံင်ဘဲပၞာန် လၟိဟ်နွံမံင်ကဵုဠက်ရောင် ဂွံတီရ။
ပရိုင်- သြင်လောန်တိုင်(မ်)
photo – MOI