သဓီု၊ အဝ်ဂတ် ၆

ပ္ဍဲတွဵုးရးမန် ပွိုင်ဍုင်သဓီု သၟတ်နူကွာန် ပတိင်ယိုဝ် (ပုသိမ်ရိုး) ကောန်ပၞာန်ဗၟာ ရပ်ဏာလဝ် ၂၀ တၠတံဂှ် ဟွံဗလးကဵုတုဲ ပလံင်ဗစိုပ်လဝ် ဒၞာဲဌာန်ပကောံ ကောန်ပၞာန်ရဂှ် ညးကြပ်ကဵုကၟိန်အိန်ထံင်ညးတံ ဟီုကဵုဌာန်ပရိုင် သြင်လောန်တိုင်(မ်) ရ။

ပ္ဍဲကွာန်ပတိင်ယိုဝ် ဂကောံဒပ်မင်ကင်ကွာန် (ပြည်သူ့စစ်) ၂ ဒးဒုင်ပန်ဂစိုတ်လဝ်တုဲ ကောန်ပၞာန်ဗၟာတံ လုပ်ကၠုင်ကွာန်ကဵု ဇြဟတ်ပေင်င်ဂှ် ကောန်ကွာန်မၞိဟ်ဍောတ်ဇၞော်ဟွံရုဲ ရပ်ဏာမံင်ရ။

အပ္ဍဲကဵုရပ်ဏာလဝ် ညးဒေသတံဂှ်တှ်ေ ညးတြုံအာယုက် ၃၇ သၞာံ လပါ်လ္တူ ၜိုတ် ၁၅ တၠတံဂှ် ကလေင်ဗလးကဵုကီုလေဝ် သၟတ်လုပ်အဝဲလုပ်အဝေါင် ယိုက်ဝန်ပၞာန်တံဂှ် ဆက်ရပ်ထိင်လဝ်ရ။

သၟတ်ဒးဒုင်ရပ်လဝ်တံဂှ် ဆက်ပလံင်ရပ်ထိင်လဝ် ဒၞာဲကဵု ဘာပကတ်ပကေင်ကွတ်ပၞာန် စၟတ်(၉) နွံမံင်ဍုင်သဓီုတုဲ ပ္ဍဲကဵုဘာပကတ်ကွတ်ပၞာန် လၟေင် (၁၆) ဂတဏံ သွက်ဂွံစုတ်တိုန်ဘာပၞာန် ကဵုသ္ပကောန်ပၞာန်ရောင် ဂွံတီရ။

မိမကၟိန်အိန်ထံင် ညးမဒးဒုင်ရပ်လဝ်တံ ကာလအာဗက်သၟာန်ပရိုင် ပ္ဍဲဘာပၞာန် စၟတ်(၉) ပၠန်ဂှ် သၟတ်တံဏံ လုပ်မံင်အဝေါင် ဒးယိုက်ဂၠေင်တာလျိုင်ပၞာန်ဂှ်ရ ညးတံကော်ဏာလဝ်ရောင် ကလေင်နင်ပရိုင်ရ။

လောန်ကၠုင် ဂျူလိုင် ၂၆ တေံ ကောန်ဂကောံဒပ်ပၞာန်ဗၟာ ဒပ်မင်ကင်ကွာန် ၂ တၠဂှ် ကရပ်ဗဒါဲဘာဗတောန်လိက် ကွာန်ပတိင်ယိုဝ် ရဲဒပ်ဂကောံပၠန်ဂတးတံ ပန်ဂစိုတ်လဝ်ရ။

တုဲပၠန် ပ္ဍဲဂျူလိုင် ၃၀ ဂှ် ဒပ်ပၞာန်ဗၟာတံ နကဵုဇြဟတ်ပေင်င် မွဲအသိင်ဓဝ် လုပ်ကွာန်ဂၠိုက်ဂၠာဲနာနာသာ်တုဲ ရပ်ကော်ဏာ သၟတ်ရဲဒေသတံ ပကောံကေတ် နဒဒှ်ကောန်ပၞာန် မဒှ်ရ။

ပရိုင်- သြင်လောန်တိုင်(မ်)

Photo – CJ

Leave a Reply

Your email address will not be published. Required fields are marked *