တနင်သဳ- အဝ်ဂတ် ၇
ပ္ဍဲရးတနင်သဳ ပွိုင်ဍုင်တနင်သဳ ကွာန်လေဝ်တံင်ယာ (လယ်တောင်ယာကျေးရွာ) ဂှ် ပေါဲဗတိုက်ဟၟဲမွဲလေဝ် ဟိုတ်နူဒပ်ပၞာန်ဗၟာ ပန်ကၠဟ်လဝ်ကဵုလွဟ်ဇၞော်တုဲ ဒးအာ ကောန်င္ရာ်တိက်မံင်အပ္ဍဲခရေင် မွဲတၠ ဒးချိုတ်အာရဂှ် ဂွံတီနူ ဒပ်ပၞာန်စဵုဒၞာညးဍုင်ကွာန်တံရ။
လောန်ကၠုင် အဝ်ဂတ် ၅ အခိင် ၁၀ နာဍဳဗတမ်ဂှ် ပေါဲဗတိုက်ဟၟဲကီုလေဝ် ဒၞာဲပွဳပွူကွာန် “လေဝ်တံင်ယာ” ဂှ် ဒပ်ပၞာန်ဗၟာ ပန်ကၠဟ်ဖျေံဏာ လွဟ်ဇၞော် ဟွံအောန်နူကဵု ၅ မ ဂးရ။
ဟိုတ်နူလွတ်ဇၞော် ဖတုံဟတိုဟ်အာတုဲ ကောန်င္ရာ်အယုက်မွဲသၞာံ တိက်မံင်အပ္ဍဲခရေင် မွဲတၠ ဒးချိုတ်အာဓဝါဲဂှ်ရ။ ဒပ်ပၞာန်ဗၟာတံ ဟိုတ်နူ ထေင်ခယျလဝ် ဒပ်ပၞာန်စဵုဒၞာညးဍုင်ကွာန် PDF တံ နွံမံင်အပ္ဍဲ “ကွာန်လေဝ်တံင်ယာ” ရောင် သ္ဂးရ။
ဇွကောန်င္ရာ်ဍောတ် ဒးဘဲလွဟ်ဇၞော်ချိုတ်အာလဝ်ဏံဂှ် စံင်ထောံ ပ္ဍဲအဝ်ဂတ် ၆ အခိင်နူဂယးဂှ် ဂွံတီရ။
လောန်ကၠုင် မေ ၈ တေံဂှ်လေဝ် ပ္ဍဲပွိုင်ဍုင်တနင်သဳ ပ္ဍဲကွာန် “ရာန်ဖို” (ရမ်းဖို) ဂှ် ဟိုတ်နူဒပ်ပၞာန်ဗၟာ ပန်လွဟ်ဇၞော်တုဲ ကောန်င္ရာ်ပါဲဒဴဘဲပၞာန် ၂ တၠ ဒးအာဝပ်ကီု သ္ရိဒၟံင်လေဝ် ပၟတ်တူလေင်ဆောံအာရဂှ် ဂွံတီရ။
ပရိုင်-သြင်လောန်တိုင်မ်
photo – Social Media