ရေဝ်၊ အဝ်ဂတ် ၇
တွဵုရးမန် ပ္ဍဲကဵုဍုင်ရေဝ် ကဝ်မယှန်ပၞာန်သီအဝဵု ပလီုကၠေံ အမိင်ပရေင်အုပ်ဓုပ်ပၞာန်တုဲ အမိင်ဒေသန္တရ ၁၇ တင် ထပ်ကလေင်ပတိတ်လဝ်ပၠန်ရဂှ် ညးဒေသတံ ဟီုလဴကဵု သြင်လောန်တိုင်မ်ရ။
လပါ်ကဝ်မယှေန်ပၞာန် ၜိုန်ရပလီုပလေအ်ထောံ ပရေင်အုပ်ဓုပ်ပၞာန်ကီုလေဝ် ဂကောံပကီုပရာတ် ဒၞာဲဒေသရေဝ်တံ နဲကဲနာနာ ဖန်ဖက်ရေင်တၠုင်မံင်နွံတုဲ မ္ဒးထပ်ပတိတ်ဏာ အမိင်ဒေသန္တရရောင် သ္ဂးလဝ်ရ။
အပ္ဍဲ အမိင်ဒေသန္တရတံဂှ်မ္ဂး ယြဴပူဂဵုလဵုဟွံဟီု ညးမတတ်ကၠောံအာကၠုင် အပ္ဍဲကဵုပွိုင်ဍုင်ရေဝ်တံဂှ် ဒးကေတ်လဝ် လိက်ထံက်ဂလာန် သ္ကိုပ်အုပ်ဓုပ်ကွာန်/အရာပ် သာ်ဂှ်ဟွံသေင် တၞးကာတ်ကောန်ဟွံပါမ္ဂး ၜက်တိတ်အာတရဴ နူကဵုကွာန်ဇကုဟွံဂွံရောင်ဂှ် တာဒၞာလဝ်ရ။
အပ္ဍဲကဵု အမိင်ဒေသန္တရ ကၠာတေံမ္ဂး ပ္ဍဲပွိုင်ဍုင်ရေဝ် ကွဳစက်ကဵု မၞိဟ်တံဂှ် စနူအခိင်ဗတမ် ၆ နာဍဳ ဒဵုကဵုတ္ရဲယး ၆ နာဍဳ အခေါင်အာကၠုင်ဟၟဲ ကၟာတ်ကၠုင်လဝ်တုဲ အခိင်လၟုဟ်ဏံမ္ဂး စနူဗတမ် ၈ နာဍဳ ဒဵုစိုပ်နူဂယး ၄ နာဍဳ အာကၠုင်တတ်ကၠောံဟွံဂွံ ပြံင်သၠာဲလဝ်အခိင်နွံ ဂွံတီရ။
ဟိုတ်နူပလီုကၠေံလဝ်ကဵုပရေင်အုပ်ဓုပ်ပၞာန်ဟီုဂှ် ပရူပရာသွက်ဂွံတင်ဂုဏ်ဟၟဲလးလး၊ သွက်ဇကု အခေါင်သၠးၜးဟၟဲဏီရောင် ညးဒေသရေဝ်မွဲတၠ ဟီုကဵုသြင်လောန်တိုင်မ်ရ။
“ပရေင်အုပ်ဓုပ်ပၞာန်ဂှ် ဍုင်ရေဝ် ဟွံပါရပုဟ်၊ အမိင်ဒေသန္တရဂှ် ကလေင်ပတိတ်လဝ်ပၠန်၊ ကလေင်ပတိတ်လဝ် ၝောံပိုဒ် ၁၈၈ ရ၊ ဗွဲတၟေင် မုလေဝ်ပြံင်သၠာဲတိုန်ဟၟဲပုဟ်၊ အခေါင်အရာသွက်ဇကု ဂွံလဝ်ပေင်င်ဟွံသေင်၊ ဟိုတ်ဂှ်တုဲ ဗွဲတၟေင် သွက်ဂွံဒးတင်ဂုဏ် ဟၟဲပုဟ်” သာ်ဝွံ သ္ဂးရ။
အတိုင်ညးဒေသတံဟီုမ္ဂး နကဵုကဝ်မယှေန်ပၞာန် ပ္ဍဲကဵုပတိတ်လဝ်အမိင်ဒေသန္တရ ယှအ်ဖျေံလဝ်အခိင်ဟီုဂှ် ပရေင်ပေါဲဗတိုက်ညိင်အာညိတုဲ ပြံင်လှာဲကဵုလဝ် အခိင်သၟးရ၊ ဗီုဗီုကၠာတေံ ဗၠးဗၠးၜးၜးဟၟဲဏီ အပ္ဍဲကဵု ပၞော်လုပ်တိတ်ဍုင်ဂှ် အတိုင်လၟေင်င်ရ စၟဳစၟတ်ကြီုတိုန်၊ ပရေင်အာတ်သြန်လေဝ် ဆက်နွံမံင် ဂွံတီလဝ်ရ။
အတိုင် ကဝ်မယှေန်ပၞာန်ပတိတ်လဝ် အမိင်ဒေသန္တရဂှ်မ္ဂး ဗီုကၠာတေံရ ညးတြုံၜါတၠ ဍိုက်မွဲကွဳလိုန်ဓါတ် ဍိုက်ဟွံဂွံ၊ ညဗြဴဂတ ညတြုံလက်ကရဴ ဍိုက်ဟွံဂွံ၊ မၞိဟ် ၃ တၠ ဍိုက်ကွဳလိုန်ဓါတ်ဟွံဂွံ ဖျေံလဝ်ပိုတ်တ်ရ။
တုဲပၠန် ဂၠံင်ဍာန်လ္ရဵုဂှ် ဗီုဗီုကၠာတေံရ ဟွံကဵုအခေါင် အာကၠုင်တတ်ကၠောံ ကၟာတ်လဝ်တုဲ ဒၞာဲဖျေံလဝ်ပရေင်ဂီုကၠီုတံဂှ် ဒဳအသိင်ညံင်ဟွံဂွံထတ်၊ ရဲစၟဳစၟတ်တံ ဗဒေါအ်တှ်ေ ညံင်ဟွံဂွံဂြိုပ်ထောံကီု မၞိဟ် ၅ တၠကဵု ပြင်နူကဵု ၅ တၠ ညံင်ဟွံဂွံကောံ ပတိတ်လဝ်အမိင်ရ။
စပ်ကဵု ကဝ်မယှေန်ပၞာန် ပတိတ်လဝ် အမိင်ဒေသန္တရတံဏံဂှ် ညးဍုင်ကွာန်တံ ဒဂေတ်ဗက်မံင် နွံကီုဟၟဲကီု အကြာအဝ်ဂတ် ၅ ကဵု ၁၁ ဏံဂှ် နဒဒှ်အခိင်ကဵုပညာ စၟဳစၟတ်အာရောင်ပိုင်ခြာလဝ်တုဲ အခိင်ကာလကဵုပညာဏံအိုတ်မ္ဂး နကဵုသၞောဝ်တန်ကြန်မံင်တံကီု နကဵုရာဇသာဒ်ဇၞော် ၝောံပိုဒ် ၁၈၈ ကီု ကေတ်အာအရေဝ်ဏောင် သ္ဂးလဝ်ရ။
အလုံတွဵုးရးမွဲ ပၞောဝ်အာကဵု ပွိုင်ဍုင်ဂမၠိုင်မ္ဂး ဍုင်ရေဝ်ဂှ် ဒှ်တိဍာ်ဇြဟတ်ပၠန်ဂတး ခိုဟ်တုဲ ခြာဟွံလံဟွံလံ လေံထံက်ပၞာန်ဗၟာတံ ဒးဒုင်င္ရးတး ပသောင်ထောံလဝ်နွံကီု မွဲလပါ်ကဵု မွဲလပါ် ပန်ပှော်မံင်ကဵု ဒပ်ကဝ်မယှေန်ပၞာန်တံ နွံမံင်ကီုရောင် ဂွံတီရ။
ပရိုင်-သြင်လောန်တိုင်မ်
photo – CJ