PDF တံ သွက်ဂွံဖျေံလွဟ် ဒပ်ပၞာန်ဗၟာ နူကဵုမက်ဆေအ်ဖုင်မွဲအဆံင် ဝေင်ပၞာန်စိုတ်ဓါတ် 

နေဗျဳတဝ်၊ အဝ်ဂတ် ၇

ပ္ဍဲကဵုတိဍာ် ဇြဟတ်ပၠန်ဂတးတံ ထိင်လဝ် ဒၞာဲတိဍာ်လ္ရဵုလ္ရဵုတံဂှ် လောန်ကၠုင် အပ္ဍဲဂိတုဂျူလိုင်တေံ ဒပ်ပၞာန်ဗၟာ ကလေင်ထိင်ကၠုင်မာန်တုဲ အခိင်ပရေင်ပၞာန်ဗၟာ ဂွံလဝ်စေဝ်လ္တူဏံ နကဵုဗီုပြင် ဝေင်ပၞာန်စိုတ်ဓါတ် မကိတ်ညဳကဵုအခိင် ကၠောန်ကၠုင်မံင်ရ။ 

ပ္ဍဲကဵုဍုင်မိုဝ်ဗြေဝ် (မိုးဗြဲ) နံင်ချိုဝ်ကဵု တပိက်ကျေန်(သပိတ်ကျင်း) ဂှ် ဒပ်ပၠန်ဂတးတံ အခိင်ဒးဗလးကၠုင်တဲလၟုဟ်ဏံ ကုလ္တူရဲ PDF ကဵု ဂကောံရပ်လွဟ်တံ ညံင်ဂွံကၠုင်ပံင်တောဲကု ဒပ်ပၞာန်ဗၟာ နူကဵုမက်သေဗ်ဖုင်မွဲအဆံင် လိက်ဇမၠိ (လိက်ဟလိ) SAC NEWS ပလံင်ဗစိုပ်မံင်ရ။ 

အပ္ဍဲလိက်ဟလိတံဝွံ သွက်ဂုဏ်ဖဵု ဂွံပံင်တောဲထမံက်အာရုပ်ရဴ ကုဂကောံရပ်လွဟ် PDF တံဂှ် နကဵုအလဵုအသဳကဵု ဒပ်ပၞာန်ကော်ဘိက်မံင် ဂးတုဲ တောဲလဝ်ကဵု Website Link MOI ပလံင်ဗစိုပ်လဝ်ဂှ်ရ။ 

စပ်ကဵုပရေင်ဏံဂှ် လပါ်ဒပ်ပၞာန်ဗၟာ အခိင်ဂွံတိုန်စေဝ်လ္တူ နကဵုပရေင်ပၞာန်ဂှ် ပကိတ်လဝ်ကဵုအခိင်တုဲ ကၠောန်မံင် ပရေင်ဝေင်စိုတ်ဓါတ်ဗီုဏံဂှ် လပါ်ဂကောံဇြဟတ်ပၠန်ဂတးတံ ဒးစွံသတိကွေံကွေံရောင် ဗိုလ်ဇၞော် CDM ဇြေန်ယျဝ် ဟီုရ။ 

“သဘာဝ သဘဴဓရ်ပၞာန် အခိင်လပါ်ဇကုဍိုန်လျစှ်ေကၠုင်တှ်ေ သီုကဵုအရာပရေင်စိုတ်ဓါတ်လဝ် သဝ်စှ်ေကၠုင်ရ၊ အခိင်ကာလလေဝ် လအ်အာယျတှ်ေ ဝေဒနာဗှ်သၞာသ္ရိဌာန် နွံတိုန်၊ ရဲဗှ်သၞာသ္ရိ ဒှ်ကၠုင်၊ ပ္ဍဲအကာဲအရာဏံဂှ် မွဲအခိင်ဓဝ် ဖျေံလဝ်ဗီုညံင်ဂွံကိတ်ညဳတုဲ ဗဂေတ်လှေအ်လှန် ဝေင်မံင်စိုတ်ဓါတ် ကောန်ဂကောံ ဒပ်ပၞာန်စဵုဒၞာညးဍုင်ကွာန် PDF တံ ဗီုပြင်နာနာ ကိုပ်ကၠာပထမ ဒးဟီုကၠာ၊ အဓိက ပကိတ်လဝ်အခိင်တုဲ ကၠောန်မံင်ဏောင်” သာ်ဝွံ သ္ဂးရ။  

ကံင်သဳပၞာန်တံ နူကဵုအဝ်ပရေတာ ပရေင်ဆက်စၠောံတံ နကဵု မက်သေဗ်ဖုင် မွဲအဆံင် လိက်ဇမၠိ  SAC NEWS ဂှ် စနူဂျူလိုင် ၃၀ ပလံင်ဗစိုပ်ကၠုင်တုဲ Website တောဲပါကၠုင်လဝ် ယဝ်ရဍဵုဏာမ္ဂး “တင်ကော်ဘိက် ဖဵုသွက်ကၟိန်ဍုင်”ဂးတုဲ ဂွံဆဵုရောင်။ 

တင်ကော်ဘိက်သာ်ဏံဝွံ PDF ကဵု ဂကောံရပ်လွဟ်တံ ညံင်ဂွံကၠုင်ပံင်တောဲအာ ပ္ဍဲကဵုဂၠံင်တရဴ ပေါဲရုဲမာဲညိဂှ် ကော်ဘိက်လဝ်တုဲ ပါ်ဒကးဆီ အကြာဇြဟတ်ပၠန်ဂတး CRPH, NUG, PDF တံရ။

PDF တံကီု သီုကဵု ဂကောံရပ်လွဟ်ဂမၠိုင်တံကဵု အလဵုအသဳကံင်သဳပၞာန် မပ္တံဒပ်ပၞာန်ဗၟာ၊ ဂကောံရပ်လွဟ်ကောန်ဍုင်အရင်ဂမၠိုင် ဗော်ပရေင်ဍုင်ကွာန်ဗဗွဲသၞောဝ် ဒတူလာင်မံင် မွဲကရောံကု ညးဍုင်ကွာန်တံဂှ် တင်စၟဳစတုပ်သၟဟ်မံင်ရောင် သ္ဂးလဝ်ရ။

ဒုင်သ္ဇိုင်ကု ဒဳမဝ်ကရေသဳကဵု သၞောတ်ဖိတ်ဒရေဝ်တုဲ ရေင်တၠုင်အာ ပရေင်ဒက်ပတန်ကၟိန်ဍုင်ရောင် ဟီုပညုင်လဝ်တုဲ သွက်ဂွံကွာ်လ္တူဂၠံင်ဏံ အပ္ဍဲကဵုပၞော်ပါင်တြင်ဂှ် ဒှ်ပေါဲရုဲမာဲ ဗွဲမဓဝ်ယာသၠးၜးရောင် တြးလဝ်ဝါဒရ။ 

ဟိုတ်ဒှ်သာ်ဂှ်ရ စၟဳရံင်အာ ကၟိန်ဍုင်မွဲ သွက်ဂွံမံက်တိုန်မာန် ညံင်ဂွံလုပ်ကၠုင် တန်တဴမံင်စံင်အာဗွိုင်ဥပဒေ၊ လုပ်ကၠုင်အဝေါင် အပ္ဍဲသၞောဝ်တုဲ ရေင်တၠုင်ပတုဲဖဵု သွက်ဍုင် သွက်ဒေသမ္ဂး အလဵုအသဳကဵု ဒပ်ပၞာန် ဒုင်မံင်တၠုင်ရောင် ကဵုလဝ်သမ္တီရ။ 

ပရေင်အခက်အခုဲ၊ ပွမတာဒၞာလဝ် ပရေင်ပၠန်ဂတးတံဂှ် နဒဒှ် တင်ဒုင်စသိုင် တင်ဒုင်ဂိုင်ကေတ် ကောန်ဒပ်တံရောင်ဒှ်မံင်တုဲ က္ဍိုပ်သ္ကိုပ်တံ ပြံင်သၠာဲကဵုဟွံမာန်မ္ဂး ရဲစိုတ်ဓါတ်ဟွံခိုင်တံ လုပ်ပံင်အာကဵု ဒပ်ပၞာန်ဗၟာ ဗီုပြင်တံဏံ ဒှ်ကၠုင်မာန်ရောင် ညးအခေါင်ဟီုဂးနွံ ဒေသပၞာန်သၠုင်ကျာ ကရေင်ပၞာန်သၟိင်မြာ် ကိုမင်းသွေးသစ် ဟီုရ။ 

“ရဲစိုတ်ေဓါတ်ဟွံခိုင်တံ မွဲတုဲမွဲ အာဖျေံလွဟ်၊ လုပ်ပံင်တောဲ ဒှ်အာဗီုဏံမာန်၊ ပ္ဍဲပရေင်ပၠန်ဂတး ညးပါလုပ်ကၠုင်လဝ် ဗွဲမဂၠိုင်တံဂှ် ပရေင်ဒုင်စသိုင် အဓိကပါမံင်ရ၊ ပရေင်ဒုင်စသိုင်တံဂှ် နဒဒှ်ဗီုပြင် တင်ဒုင်ဂိုင်ကေတ်ရောင် က္ဍိုပ်သ္ကိုပ်တံ ပြံင်သၠာဲကဵုဟွံမာန်မ္ဂး ပရေင်အခက်အခုဲနွံမံင်ပ္ဍဲပၠန်ဂတး ပွမတာလဝ်ဒၞာနာနာသာ်တံဂှ် ညာတ်တုဲ စိုတ်ဓါတ်ဍိုန်လျလီုလာ် ပရေင်ဒုင်စသိုင် ကၠေံအာမ္ဂး ဟွံမံင်တန်တဴအကြာဗွိုင်ပၠန်ဂတးတုဲ ၜးတိတ်အာဗွိုင်မ္ရးရ။  အရာဏံဂှ်လေဝ် သဘာဝဒှ်မာန်မံင်ရ သၞတံဂှ် ပါ်ဒကးဆီတုဲ စန်ဒက်ဏောင်” သာ်ဝွံ သ္ဂးရ။ 

ဂကောံလလောင်ပရိုင် ကံင်သဳပၞာန်ကော်ဘိက်လဝ်ဂှ်တှ်ေ ရဲ PDF ကီု နကဵုဂကောံရပ်လွဟ်တံဝွံ ဆန္ဒပံင်တောဲကုအလဵုအသဳ၊ ဒပ်ပၞာန်နွံမ္ဂး ဒၞာဲဒပ်ပၞာန်နွံကြပ်အိုတ်၊ ဒၞာဲညးတာလျိုင်ဒေသပရေင်အုပ်ဓုပ်တံနွံဂှ် ကေတ်အာအဆက် ပညဳပညပ်အာမာန်ရောင် သ္ဂးရ။ 

ပရူဏံဂှ် ကၠာအယုက်ကံင်သဳပၞာန်ဟွံအိုတ်ဍင် လောန်ကၠုင်ဂျူလိုင် ၅ တေံရ တြးဝါဒစုတ်ကၠုင်လဝ် အပ္ဍဲလိက်ပရိုင်တံတုဲ ဗွဲကြဴဏံ နူကဵုမက်သေဗ်ဖုင်မွဲအဆံင် လိက်ဇမၠိ (လိက်ဟလိ) SAC NEWS တံ ထပ်ပလံင်ဗစိုပ်ကၠုင်ရ။ 

မွဲလပါ်ပၠန် ဒပ်ပၞာန်ဗၟာ အခိင်ဝေင်မံင်ပၞာန်ထပက်ဏံ ညးမကၠိုဟ်တိုန် လၟေင်ပရေင်ကမၠောန်ၜိုဟ်လလမ် မပ္တံကဵု TNLA, DPLA ကဵု PDF မာန်တလေဝ် အပံင်ဖအိုတ် ၁၁၈ တၠတံဂှ် အကြာဂျူလိုင် ၁၇-၂၉ ဂှ် လုပ်ကၠုင်ဗွိုင်သၞောဝ်နွံကၠုင် တြးလဝ်ဝါဒရ။

လ္တူဏံ ရဲပံင်တောဲအာကဵုဒပ်ပၞာန်တုဲ ဖျေံလွဟ်တံဂှ် ကောန်ဒပ်ညးတံဟွံသေင်ရောင် ဂကောံပၠန်ဂတးဆေင်စပ်တံ ကလေင်လလောင်တြးလဝ်ရ။ 

ရဲခါတ်အကာဲပရေင်ပၞာန်တံ ညာတ်ဂှ်တှ်ေ ကောန်ဂကောံရပ်လွဟ်ပၠန်ဂတးဗွဲမဂၠိုင်ဂှ် အဝဲသၟတ်လေဝ်ဒှ် ဟွံစၟဳစတော်ခယျ လဝ်မွဲသာ် ပရေင်တိဍာ်ဒေသလ္ရဵု ဒးဆောံလေင်အာဗက်ဟွံဂတာပ် နကဵုလောကဓရ် ဒးဒုင်ဇီုကပါ်ကၠုင်ကဵု ပရေင်စိုတ်ဓါတ်စှ်ေတံရ သာ်ဝွံ ထံက်ထၜးလဝ်ရ။ 

အခိင်ဇၞးကျဟွံပိုတ်သ္ကုတ်ဍင် ဗီုလၟုဟ်ဏံ လပါ်ဂကောံဇြဟတ်ပၠန်ဂတးတံ ဂွံဆက်အာဂတမာန် မူဝါဒကီု ပရေင်သၠုင်စိုတ်ဓါတ်ကဵု လဝေင်ပၞာန်စိုတ်ဓါတ်တံ ပၟိက်ဇၞော်ကွေံရောင် ကဵုလဝ်ကသပ်ရ။ 

“လၟုဟ်လပါ်ကံင်သဳပၞာန်တံလေဝ် လပါ်ဍေံတံ နကဵုပရေင်ပၞာန် အကာဲအရာဟွံစှ်ေဗီုတုဲ ဍိုက်ဗတိုက်ကၠုင်ကဵု သီုဝေင်နဲကဲ ပရေင်စိုတ်တံရ။ ဟိုတ်ဂှ်ရ ပ္ဍဲကဵုလပါ်ကောန်ဒပ်ပိုဲ ဂလာန်ပတေဟ် ပရေင်ဒုင်ကေတ် စိုတ်ဓါတ်တုဲတှ်ေ လပါ်ပၞာန်ဗၟာ ဗီုလဵုလီုလာ်စာ်ထောင်မံင်တံ၊ အကာဲအရာနာနာဏံ မူဝါဒပိုဲဒးဆက်ကွာ်အာ ပရေင်ပလေဝ်ပလေတ် စိုတ်ဓါတ်၊ ပွမလဝေင်ပၞာန်စိုတ်ဓါတ်တံ ပရေင်စိုတ်ဓါတ်ညံင်ဂွံခိုင်ကၠိုက်တိုန် ဒးကလေင်ဖန်ကဵုထေက်ရောင် မိက်ဂွံကဵုကသပ်” သာ်ဝွံ သ္ဂးရ။

ပြဟ်ဟ်ဏံ ဒၞာဲတိဍာ် ရဲဇြဟတ်ပၠန်ဂတးတံ ထိင်ချုက်လဝ်တံကီု ဒၞာဲတိဍာ်လ္ရဵု ပရေင်ပၞာန်ၜါလပါ် တေင်ဂြတ်မံင်ညးသ္ကံကီု၊ ဒၞာဲဒေသထိင်ကြာပ်လဝ်ပေင်င်ဟွံမန်တံဂှ် ဒပ်ပၞာန်ဗၟာ ကလေင်ပလန်ဝေင်ပၞာန်ထပက် သီုကဵုပၞာန်ကျာတံ ညံင်ဂွံရီုဗင်အာ ပလေဝ်စမံင်အိုတ်ယျ။ 

တင်ရန်တၟံဂှ်တှ်ေ သွက်ဂွံထိင်ချုက်အာ ပရေင်ပေါဲဗတိုက်ရပ်လွဟ်ကဵု ပရေင်ဒေသညိင်ဝပ် ပရေင်သၞောဝ်ဥပဒေ အုပ်လဒမ်လဝ် ဗွဲမစိုပ်တရဴ ညံင်ဂွံကၠောန်အာမာန် ထၜးလဝ်ဟိုတ်တုဲ ခုတ်ပိုင်ခြာလဝ် အပ္ဍဲကဵုပွိုင် ၉၀ တ္ရဲဏံရ။ 

သွက်အရာပရေင်ဏံ နူကဵုကံင်သဳပၞာန် အဝဵုပိတန် ဒုင်အပ်ပြာပ်ဂွံလဝ်ကု ကံင်သဳပရေင်စဵုဒၞာကောန်ဂကူကဵု ဂီုကၠီုဝွံ ပ္ဍဲဒၞာဲရးဒေသဇၞော်ကဵု တွဵုရး၊ ပ္ဍဲကဵုပွိုင်ဍုင် ၉ ဒၞာဲ ၆၃ ပွိုင်ဍုင်တံဂှ် လလောင်တြး အကာဲအရာ ကာမံက်တိုန်တုဲ သွက်ဂွံရပ်စပ်စကာအာ အမိင်ပရေင်အုပ်ဓုပ်ပၞာန် ပ္ဍဲအဝ်ဂတ်မံက်ဏံ ပအပ်လဝ်ကဵုအဝဵု ကုဒပ်ပၞာန်ရောင် ဂွံတီရ။  

ပရိုင်-သြင်လောန်တိုင်မ်

photo – MOI