ကြုက်ကဵု အေန္ဒိယတံ ထံက်ပင်မံင်ကပေါတ်လွဟ်ပၞာန် ကုဂကောံပၞာန်ဗၟာ

နေဗျဳတဝ်၊ အဝ်ဂတ် ၁၆

ဍုင်ဇိုင်ဝုတ်ဒိုဟ်ဗၟာ လပါ်ဗၟံက်ကဵုပလိုတ် ဒှ်မံင် ဍုင်ကြုက်ကဵု အန္ဒိယ နကဵုဍုင်ဇြဟတ်ဇၞော် ၂ ဍုင်ဏံဝွံ ကုလ္တူဂကောံပၞာန်ဗၟာဂှ် ထံက်ပင်ကဵုမံင် ကပေါတ်လွဟ်ပၞာန်နာနာတံရောင် Justice For Myanmar ကဵု ဂကောံမှာဇန်တအာင် ၆ ဂကောံတံ ပ္ဍဲအဝ်ဂတ် ၁၄ တေံ ဗတိတ်လဝ် လိက်လလောင်တြးရ။

ကပေါတ်လွဟ်ဂတာပ်ခေတ်ကဵု နဲကဲပညာတံကီု အလဵုအသဳကြုက်တံထံက်ပင်ကဵုမံင် ဂကောံပၞာန်ဗၟာတုဲ ပွကေင်ကာ အမှုရာဇဝတ်ပၞာန်ကဵု လ္တူမၞိဟ်ဂၠးကဝ် အမှုရာဇဝတ်နာနာ ဒပ်ပၞာန်ဗၟာတံ သွက်ဂွံဖန်ဇန်အာမာန်ဂှ် ထပ်လံင် ဗပေင်စုတ်ကဵုမံင်ရောင် ဂကောံမှာဇန်တအာင်တံ သ္ဂးရ။

မွဲလပါ်တေံပၠန် ပံင်တောဲလဝ်ကဵု ဂကောံပၞာန်တုဲ အလဵုအသဳကြုက်ဝွံ ဒၞာဲဒေသ ဒပ် TNLA တအာင်ထိင်လဝ်တံဂှ် ညံင်ဂွံကလေင်ပအပ်ကဵု နကဵု ပရေင်ဍုင်ကွာန်၊ ပရေင်ပၞာန် ကဵုမံင်ဇြဟတ်ဟရိုဟ် ကၟာတ်ဒၞာတာလဝ် ပရေင်ကူသာန်သွံရာန် ဒေသပယျဵု မပ္တံကဵု စၞစသုင်ဂမၠိုင် ဂဥုဲဇဗနာနာတံဂှ် ထပိုတ်ကၠုင်လဝ်နွံရ။

ဟိုတ်ဂှ်ရ ကၠေင်ၜင်ကျာကဵု ကပေါတ်လွဟ်ပၞာန်နာနာသာ်တံကီု တၠကမၠောန်တံကဵု ဍုင်ဇိုင်ဝုတ်ဒိုဟ် သီုဖအိုတ်တံကီု ညံင်ဂွံဒေါအ်ထောံ ပရေင်ထံက်ပင်တံဂှ် ဂကောံမှာဇန်တအာင် ၆ ဂကောံတံ အာတ်မိက်ဖတိုက်ဖအောဝ်လဝ်ရ။

နကဵုအလဵုအသဳ အန္ဒိယဂှ်ပၠန် ဗတောန်ကွတ်ဗကတ်ပကေင် ကဵုမံင်ကွတ်ပၞာန်ကု သၞာဲဒါဒပ်ပၞာန်ဗၟာ ပ္ဍဲကဵုဍုင်အန္ဒိယတံဂှ်တှ်ေ ညံင်ရဴကဵုမံင်ဇြဟတ်ပရေင်ပကီုပရာတ် လဝေင်ပၞာန်ဗၟာတံရောင် Justice For Myanmar- JFM သ္ဂးရ။

ဗွဲကြဴ ၂၀၂၁ ဏံ ဒပ်ပၞာန်ကျာအန္ဒိယကီု ညးတၠကမၠောန် အဆံင်ဍုင်တံကီု နူကဵုကာန်ပဏဳပုဂ္ဂိလတံ မွဲအဆံင် ပလံင်ဗစိုပ်နင်ကဵု ဂကောံပၞာန်ဗၟာ မပ္တံကဵု ကပေါတ်လွဟ်လက်နက်ဂမၠိုင်၊ ကပေါတ်ပၞာန်-အရာပ် စကာသုင်စောဲမာန် သီုၜါလပါ်တံကီု နဲကဲကွတ်ပညာတံကဵု ပရေင်ထံက်ပင် သွံလဝ်ကဵု ကၠေင်ဍေင်တံနာနာသာ် အပ္ဍဲအခန်ကဏ္ဍဇၞော်ဇၞော်တံ ပါလုပ်မံင်ဂွံတီရ။

ပြဟ်ဟ်ဏံ သွက်ဂကောံပၞာန်တံဂှ် ယာန်ကျာမၞိဟ်ဟွံဒးဒဳ (UAVs) ကဵု ကပေါတ်ဗက်ဂၠာဲဒၞာဲဇိုင် ယာန်ကျာပဝ်သၠုင်သဝ် LLLWR ကော်ခဴစ ရေဒါစဵုဒၞာဒရုင်သၞမွဲမ သွက်ဂွံသွံကဵုမာန် ပရေင်ပံင်တောဲ ကာပၞုက် အကြာညးတံၜါလပါ် မံက်တိတ်ကၠုင်လဝ်ရ။

ကာန်ပနဳအန္ဒိယ Astra Microwave Products Ltd ကဵု ဂကောံပၞာန်ဗၟာ ကာန်ပနဳ ကၠောန်စအကြာ Light Head Group of Companies Limited ညးတံအကြာၜါလပါ်ဝွံ တၠုင်လအာ ဘိုအ်ဂွံကၠောန်ၜိုတ်ရေင်တၠုင်အာ ပရေင်ကာပၞုက် စပ်ကဵုအကာဲအရာပရေင်ပၞာန် သ္ပဒတန်မာန် လိက်မွဲကၞပ် မံက်တိတ်ကၠုင်လဝ် သ္ဂးရ။

ကာန်ပနဳ Astra ကဵု Defence Research and Development Organization ဒှ်မံင် ကာန်ပနဳ ဌာနပရေင်စဵုဒၞာအလဵုအသဳအေန္ဒိယ မွဲဒကုတ်မွဲသကူတံ အရာဖန်ဗဒှ်ကၠောန်ပတိတ် ရေဒါကဵု နဲကဲသၞောတ်မကမ်သၠောဝ်တံတုဲ ပံင်ဖက်ရေင်တၠုင်မံင်တံဂှ်မ္ဂး အပ္ဍဲကဵု ပရေင်ရာဇဝတ်ပၞာန်ဗၟာဇၞော်ဇၞော်တံဂှ် နကဵုကသပ်အေန္ဒိယလေဝ် မွဲနဲမွဲဗီု ပါလုပ်မံင်ကီု JFM ထံက်ထၜးလဝ်ရ။

ဝန်ဇၞော်ပရေင်စဵုဒၞာအေန္ဒိယ ပ္ဍဲသၞာံ ၂၀၂၃ တေံ ကၠုင်ဍုင်ဗၟာတုဲ ဆဵုဂဗလဝ်ကု ညးတာလျိုင် ပရေင်ပတိတ်ကပေါတ်ပၞာန်ကဵု က္ဍိုပ်သ္ကိုပ်ပၞာန်ဇၞော်အိုတ်တံဟီုဂှ် နကဵုအလဵုအသဳအန္ဒိယဝွံ ဗီုပြင်ပရေင်ကၠောံဍမံင်ကဵု ဂကောံပၞာန်ဗၟာ ချိုတ်ပၠိုတ်မံင်ရောင် ထၜးလဝ်သက်သဳရ။

ဟိုတ်ဂှ်ရ နကဵုအလဵုအသဳအေန္ဒိယဝွံ ပရေင်သွံမံင်ကပေါတ်ပၞာန်ကဵု စပ်ကဵုပရေင်ပၞာန်ပံင်တောဲရေင်တၠုင် ကုဇရေင်ဂကောံပၞာန်ဗၟာ သီုဖအိုတ်တံဂှ် ညံင်ဂွံဒေါအ်ထောံပိုတ်တ်ကီု လ္တူညးမပါလုပ် ဆေင်စပ်မံင် တၠယှေဝ်ယာတံကီု ညးစအကြာသၟာသွံလွဟ်တံကီု ပရေင်ကဵုဒုဟ်ဒဏ်ကီု ပရေင်ကၟာတ်လဒဵုနာနာတံကီု မ္ဒးဖျေံအာရောင် JFM ဖတိုက်ဖအောဝ်လဝ်ရ။


ပရိုင်-သြင်လောန်တိုင်မ်

Photo – MOI