ဇြပ်ဗု၊ အဝ်ဂတ် ၁၆
ပ္ဍဲကဵုတွဵုရးမန် ပွိုင်ဍုင်ဇြပ်ဗု ကရပ်ဗဒါဲကွာန်ဝါဟမိတ် လ္တူဂၠံင် ရေဝ်-ဇြပ်ဗုဂှ် ရပ်ထိင်ဂွံလဝ် အစာၝောံ Non CDM ၄ တၠရဂှ် ညးတာလျိုင် ဒပ်စဵုဒၞာရေဝ် YPDF ဗိုလ်ယာန်နိုင် ဟီုလဴကဵု ဌာန်ပရိုင်သြင်လောန်တိုင်မ်ရ။
ပ္ဍဲအဝ်ဂတ် ၁၄ ပယျာံနူဂယးၜိုတ်အခိင် ၈ နာဍဳဂှ် လ္တူဂၠံင် ရေဝ်-ဇြပ်ဗု အတိုင်ဂွံလဝ်ပရိုင်ဂှ်ရ ဒပ်ပၞာန်စဵုဒၞာညးဍုင်ကွာန်ရေဝ်ကဵု ဒပ်မဟာမိတ်ပံင်ကောံလဝ်တံ ဗက်ကၟာတ်ဆိုအ်ဒၞာတုဲ ရပ်ဂွံနင်လဝ် သ္ဂးရ။
သွက်ဂွံအာတိုန်တန်ဗတောန် စပ်ကဵုပေါဲရုဲမာဲတုဲ အစာၝောံ Non CDM ၄ တၠဏံ နကဵုကွဳစက် အဃောအာမံင်တရဴဂှ် ရပ်ဂွံနင်လဝ် သ္ဂးရ။
အစာၝောံ ဒးဒုင်ရပ်လဝ်တံဂှ်တှ်ေ ညးမကေတ်မံင်တာလျိုင် ပ္ဍဲကဵုပွိုင်ဍုင်ရေဝ် ဘာဗတောန်လိက် ဍုင်လၟိုင်၊ ကွာန်တၟံကၞေင်၊ ကွာန်နှေဟ်ခြင်ကဵု ကွာန်မုဟ်ဒဵု မဒှ်အစာၝောံ Non CDM ဒေါ်ဇာခြည်သော်၊ ဒေါ်နော်သိန်းကြည်၊ဒေါ်ခင်လေးမွန် ကဵု ဒေါ်အင်ကြင်းဦး တံရ။
အစာၝောံတံဏံဂှ် ဒဵုကဵုကာလအပိုင်အခြာမွဲမွဲ ရပ်ထိင်လဝ်ဏောင် ဒှ်တုဲ ဗွဲကြဴ ထပက်လိက်ဒုင်ဝန်တုဲမှ ကလေင်ဗလးကဵုပၠန်ရောင် ဗိုလ်ယာန်နိုင် ဟီုရ။ (ဆဂး ပြဟ်ဟ်ဏံ အစာၝောံ ၄ တၠဏံ ကဵုထပက်စၟတ်တဲ ဒုင်ဝန် ဟွံကဵုအရီုဗင်ပေါဲမာဲဂးတုဲ ဗိုလ်ယာန်နိုင် ကလေင်ဗလးကဵုဏာ ပရိုင်တိတ်ကၠုင်ယျ)
ဟိုတ်ဂှ်ရ နကဵု အစာဘာ အစာၝောံဂမၠိုင်ကီု သီုကဵုသၞာဲဒါဂမၠိုင်တံဂှ် လ္ပဘိုင်ကဵုအရီုဗင် ပေါဲရုဲမာဲ ကဝ်မယှေန်ပၞာန်ဗၟာတံညိ တင်လလောင် ကဵုလဝ်သတိတံဂှ် ညံင်ဂွံဒဂေတ်ဗက်အာ ညိဂှ် ဗိုလ်ယာန်နိုင် ဖတိုက်ဖအောဝ်ဏာရ။
အကြာဂၠံင်ကွဳစက် ရေဝ်-ဇြပ်ဗုတံဂှ် ဒပ်ပံင်တောဲ ဂကောံပၠန်ဂတးတံ ခြာဟွံလံဟွံလံ ကၟာတ်ဒၞာတုဲ ဗက်ဂၠိုက်ဂၠာဲစၟဳစၟတ်မံင် နွံရ။
ပရိုင်-သြင်လောန်တိုင်မ်
Photo – MSRF