မတ်မလီု၊ အဝ်ဂတ် ၂၀
ပ္ဍဲတွဵုရးမန် အလုံပွိုင်ဍုင်ကြပ်ဖအိုတ်တံဂှ် ကဝ်မယှေန်ပၞာန်သီအဝဵုတံ ပ္ဍဲဒဳဇြေမ်ပါ ၂၈ သွက်ဂွံစကၠောန်အာ ပေါဲရုဲမာဲဂှ် ပလေဝ်ပလေတ်စမံၚ် အိုတ်စောန်ရဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်ရ။
ကဝ်မယှေန်ပၞာန်ဝွံ သွက်ပေါဲရုဲမာဲဏံ ပ္ဍဲအလုံပွိုင်ဍုၚ်ကြပ်သီုဖအိုတ်တံဂှ် နတဲစမ်ၜတ်ကၠောန်ထၜးမံင် စက်ကဵုမာဲအဳလက်ထရဝ်နေတ်တံဂှ်ကီု ပံက်ခၞံဗဒှ် ကဝ်မယှေန်ပေါဲရုဲမာဲပါ် အရာပ်၊ ကွာန်တံသၟးဟွံက စနူကဵုပရေင်ဂီုကၠီုနာနာတံကီု ပလေဝ်ပလေတ်စမံင်အိုတ်ရ။
တုဲပၠန် ကဝ်မယှေန်ပေါဲရုဲမာဲကၟိန်ဍုၚ် သၟဝ်တဲကဝ်မယှေန်ပၞာန်ဝွံ သွက်ပေါဲရုဲမာဲ ၂၀၂၅ အလုံတွဵုးရးမန်သီုဖအိုတ် ၁၀ ပွိုၚ်ဍုၚ်ဂှ် ခုတ်စၟတ်လဝ် နဒဒှ်ဒေသဆန္ဒမာဲ လလောၚ်တြးလဝ် ပ္ဍဲအဝ်ဂတ် ၁၅ တေံရ။
ကဝ်မယှေန်ပၞာန်ဂှ် သွက်ပေါဲရုဲမာဲ မွဲတုဲမွဲ ကၠောန်သ္ပပလေဝ်ပလေတ်စမံင်အိုတ်တုဲ ပရေၚ်ကဵုတန်ဗတောန်နာနာ၊ ဟပဵုတိုန်ဇြဟတ်ပရေင်ဂီုကၠီုကီု စနူပံက်ကဝ်မယှေန် အရာပ်၊ ကွာန်တံလေဝ် ကၠောန်မံၚ် သာ်ဝွံ ညးဒေသတွဵုရးမန်မွဲတၠ ဟီုရ။
“ပြဟ်ဟ်ဏံ ပ္ဍဲပိုဲ ပရေၚ်ဍေံတံ ပလေဝ်ပလေတ်စမံၚ် မွဲတုဲမွဲရ၊ သွက်တန်ဗတောန်ပေါဲရုဲမာန် ဘက်ကော်မံင်မၞိဟ်၊ ဗက်စန်ဒက်မၞိဟ်၊ သွက်ဂွံမၚ်ရုဲမာဲ နကဵုပလောအ်တသာ်ဍီု ဟလိုင်လဝ်ဇြဟတ်နွံ၊ ရုၚ်နွံသီုဖအိုတ် ဟပဵုတိုန်ပရေင်ဂီုကၠီု၊ တုဲပၠန် သွက်ဂွံပံက် ကဝ်မယှေန် အရာပ်၊ ကွာန်ဍေံတံ ထဇက်မံၚ် အစဳဇန်ယျ” သာ်ဝွံ သ္ဂးရ။
တုဲပၠန် အကြာ အရာပ်ကဵု ကွာန်တံပၠန် ဂကောံအုပ်ဓုပ်သၟဝ်တဲ ကဝ်မယှေန်ပၞာန်တံဂှ် ပ္ဍဲကဵုပေါဲရုဲမာဲ ညးဍုၚ်ကွာန်တံ ညံၚ်ဂွံပံၚ်တောဲပါလုပ်အာ ဗက်ဆဝ်ဗ္ၚုဟ်ကီု ယဝ်ရပလာတ်ပထုဲပေါဲရုဲမာဲမ္ဂး ရပ်ဏောင် ဘပဠမံင်လေဝ် နွံမံၚ်ရ။
သွက်ပေါဲရုဲမာဲဂှ် ကဝ်မယှေန်ပၞာန် ပလေဝ်ပလေတ်မံင်ကီုလေဝ် သွက်ဗော်ဇကု အရင်ဂွံရုဲညးစၞးမာန်ကီု ပ္ဍဲကဵု သၞောတ်ရိုဟ်လၟိဟ်မာဲတံ တင်ကော်ဆောတံ နွံသၟးဟွံက စပ်ကဵုပရေင်ဂီုကၠီုကီု ကိစ္စသြန်ဂအုံတံကီု အခက်အခုဲနာနာ နွံမံင်ဏောၚ် ညးအခေါၚ်ဟီုဂးနွံ ဗော်ညဳသၟဟ်မန် MUP နာဲတာန်ယှိုဲ ဟီုရ။
“တၚ်ကော်ဆောပိုဲ နွံမံင်တၟာဟလိုင်၊ တၚ် ၁ ပ္ဍဲကဵုဒၞာဲရုဲစှ်အလံၚ်အမာတ်ဂှ် အခက်အခုဲနွံမံၚ်၊ တင် ၁ တန်တဴကဵု သၞောတ်နဲကဲရိုဟ်လၟိဟ်မမာဲဂှ် တၚ်ကော်ဆောသွက်ပိုဲ နွံမံၚ်၊ တုဲပၠန် ကိစ္စပရေင်ဂီုကၠီုကီု သြန်ဂအုံဗော်ဂှ်လေဝ် အခက်အခုဲဂၠိုၚ်မံင်” သာ်ဝွံ သ္ဂးရ။
နကဵုဂကောံဇြဟတ်ပၠန်ဂတး မချဳဒရာၚ်မံင် ပ္ဍဲဒေသတံဂှ်တှ်ေ ပေါဲရုဲမာဲအလီ ကဝ်မယှေန်ပၞာန် ကၠောန်ကဵုဏံ ညးဍုၚ်ကွာန်တံ ညံင်ဟွံဂွံပါလုပ်ကီု နကဵုဗော်ပရေၚ်ဍုၚ်ကွာန်တံလေဝ် ညံင်ဟွံဂွံပံၚ်တောဲ ပ္ဍဲပေါဲရုဲမာဲ ကဝ်မယှေန်ပၞာန်ကၠောန်ဏံဂှ်ကီု ဖတိုက်ဖအောဝ်လဝ်ရ။
အပ္ဍဲကဵုတွဵုရးမန် သီုအလုံ ၁၀ ပွိုင်ဍုၚ် ကဝ်မယှေန်ပၞာန် ၜိုန်ရခုတ်စၟတ်လဝ်ကီုလေဝ် ဒၞာဲဂကောံဇြဟတ်ပၠန်ဂတးတံ ဇြဟတ်တဴ ပ္ဍဲပွိုၚ်ဍုၚ် ကျာ်ထဝ်၊ ၜဳလေင်၊ သဓီု၊ ကျာ်မြဟ်၊ ဇြပ်ဗုကဵု ပွိုင်ဍုင်ရေဝ်တံဂှ် ပေါဲရုဲမာဲ ဍိုက်က်ပေင်င် ကၠောန်အာဟွံမာန်ပုဟ် သာ်ဝွံ ညးလ္ၚတ်တံ ပါ်ပါဲလဝ်ရ။
ပရိုၚ်-သြၚ်လောန်တိုၚ်မ်
Photo – MOI