နေဗျဳတဝ်၊ အဝ်ဂတ် ၂၀
သ္ကုတ် (၁) တ္ၚဲကၠောန်ပေါဲရုဲမာဲ လလောင်တြးဏာလဝ်တုဲ အတိုင်သ္ဇိုၚ်သၞောဝ်ပရေၚ်အုပ်ဓုပ်ဍုၚ် မအပ်ပြာပ်ကဵုလဝ် ပ္ဍဲအခန်ကဏ္ဍ ပရေၚ်ဍုၚ်ကွာန်ကောန်ဂကူဂှ် နကဵုဒပ်ပၞာန် ပါလုပ်အာတုဲ စဵုဒၞာအာ သၞောဝ်ဥပဒေဏံရောင် က္ဍိုပ်သ္ကိုပ်ပၞာန်ဟီုရ။
နဒဒှ် ဥက္ကဌ ကဝ်မယှေန်ပၞာန် က္ဍိုပ်သ္ကိုပ်ပၞာန်သီအဝဵု ဂအုပ်သ္ကိုပ်ပၞာန်ဇၞော် မေန်အံင်လှိုင် ကေတ်လဝ်တာလျိုင်ဝွံ ပ္ဍဲကဵု ဌာန်ဂအုပ်ရးပၞာန်ဒေသလဒေါဝ် ဒၞာဲဗွိုင်ဒပ်ပၞန် ဍုင်မဂွေ ပ္ဍဲအဝ်ဂတ် ၁၈ အခိင်မဆဵုလဝ် ကု ညးတာလျိုင်၊ သၞာဲဒါ ကောန်ဗြဴသ္ၚိဌာန်ကၟိန်အိန်ထံင်ဂမၠိုင်တံဂှ် ညး ဟီုဂးဏာလဝ်ရ။
ဆေင်စပ်ကဵု ပလေဝ်သ္ဇိုၚ်သၞောဝ် ပရေၚ်အုပ်ဓုပ်ဍုၚ်ဂှ် ဒၞာဲလ္ၚဵုတံ ဗီုမကိတ်ညဳကဵုစေဝ်ပၞောန် သွက်ဂွံဖန်ဖက်ရေင်တၠုင်ပလေဝ်အာဂှ် နကဵုဒပ်ပၞာန် တုပ်လဝ်စိုတ်နွံမံင်တုဲတုဲရောင် သ္ဂးရ။ ဆဂး ၝောံပိုဒ်လဵု တင်နၚ်လဵု ဗီုလဵု ပလေဝ်အာဂှ် ဟီုဂးသောင်ကလးလဝ်ဟၟဲရ။
သၞောတ်ဒဳမဝ်ကရေသဳ ဍာံဍာံပြပြ ကၠောန်ၜိုတ်ရေင်တၠုၚ်အာမ္ဂး နကဵုဒပ်ပၞာန် ပံင်တောဲအာကီုတုဲ တာလျိုင်ဒပ်ပၞာန်ဂှ် ဒှ်ပရေင်စဵုဒၞာဍုၚ်ဟေၚ် ဒှ်မံၚ်ရောၚ် က္ဍိုပ်သ္ကိုပ်ပၞာန် ဟီုရ။
အခိင်ပေါဲရုဲမာဲတုဲမ္ဂး နူကဵုဗော်ဂွံဇၞးအာမာဲ အခိင်ယိုက်ဂၠေင်အာ တာလျိုၚ်ဂှ် ညးစၞးဒပ်ပၞာန်တံလေဝ် ပါလုပ်ပ္ဍဲစၠတ်ထဝ်တုဲ ရေင်တၠုၚ်ကၠောန်အာပရေင်ကေၚ်ကာဍုင်ရောင် သ္ဂးရ။
တုဲပၠန် ဒပ်ပၞာန်ဂှ် သွက်ပရေၚ်ဍုၚ်ကွာန် ပါလုပ်ဖန်ဖက်အာဟွံသေၚ်တုဲ ပ္ဍဲအရာကေၚ်ကာဍုၚ် ဒၞာဲလၟေၚ်ကမၠောန် ပရေၚ်စဵုဒၞာဍုၚ်ဟေၚ် ယိုက်ဂၠေၚ်အာတာလျိုၚ်ရောၚ် က္ဍိုပ်သ္ကိုပ်ပၞာန် ဟီုဂးဏာရ။
နကဵုသ္ဇိုၚ်သၞောဝ် ပရေၚ်အုပ်ဓုပ်ဍုၚ် ပေါဲရုဲမာဲဗော်ဇဳကၠောန်မ္ဂး ညးစၞးစၠတ်ထဝ် ဒပ်ပၞာန် ၂၅% တံဂှ် ဟွံဒးရုဲစှ်မွဲသာ် ပၞောဝ်ကဵုစၠတ်ထဝ်တုဲ ဂွံလဝ်ခုၚ်ဒၞာဲ မွဲမွဲခုင်တုဲ ဂွံပါလုပ်ပ္ဍဲပရေင်ဍုင်ကွာန်ဂှ် ဂွံလဝ်အခေါၚ်ရ။
ဟိုတ်ဂှ်ရ ပ္ဍဲကဵုသၞာံ ၂၀၂၁ ဒပ်ပၞာန်သ္ပက္ဍိုပ် ပရေၚ်သီအဝဵုတံ အတိုင်နွံပၟိက် စကာမံင် သ္ဇိုၚ်သၞောဝ်ပရေၚ်အုပ်ဓုပ်ဍုၚ်တုဲ နကဵုအကာဲအရာ ပရေင်ကာမံက်တိုန် ပွိုၚ် ၄ သၞာံပြၚ် အုပ်ဓုပ်ကၠုၚ်လဝ်တုဲ သွက်ဂွံကၠောန်ပေါဲရုဲမာဲပၠန် ဂစာန်ဖျေံမံၚ်ဗီုရ။ သွက်ပရေၚ်ဏံ ပေါဲရုဲမာဲ သ္ကုတ်(၁) ဂှ် ခုတ်စၟတ်ကၠောန်အာ ပ္ဍဲဒဳဇြမ်ပါ ၂၈ တေံရ။
ပ္ဍဲပေါဲရုဲမာဲဏံ ညံင်ဟွံဂွံခၠန်အာ ကဵုမာဲအိုတ်ညိဂှ် ဖတိုက်ဖအောဝ်ဏာ ကောန်ဒပ်ဂမၠိုၚ်တံတုဲ ဒပ်ပၞာန်ဝွံ ဟိုတ်နူ ဒှ်မံင်သ္ကုတ်အပိုင်အခြာဍုင်ဂှ်ရ ပိုန်ဟာန်သ္ၚိဌာန်ဒြပ်ရတ်လမျီုညးဍုၚ်ကွာန်တံ ညံင်ဂွံဂီုကၠီုမာန် ကဵုအာပရေင်စဵုဒၞာဂှ် က္ဍိုပ်သ္ကိုပ်ပၞာန် ဟီုလဝ်ရ။
နတဲဂှ်တှ်ေ ဒပ်ပၞာန်ဝွံ လ္တူညးဍုၚ်ကွာန် ထၜးလဝ်ဆန္ဒ ၜိုဟ်ဟ်သြိုဟ်ဟ်တံဂှ် နကဵုဇြဟတ်လွဟ်သ္ပမာန် ပန်သၠေက်သရိုဟ်ကၠေံကၠုၚ်လဝ်ကီု သီုကဵု ပိုန်ဟာန်သ္ၚိဌာန်ဒြပ်ရတ်လမျီုညးဍုၚ်ကွာန်တံဟွံက မပ္တံ စမြိုင်ကျာ်ဘုတ်ဘာကီု ရုၚ်ဂဥုဲ၊ ဘာဗတောန်လိက်ဂမၠိုၚ်လေဝ်ဟွံသှ်ေ နကဵုလွဟ်ဇၞော် ပၞာန်ကျာတံ ဗတိုက်မံင်ဆက်ဆက်ဂှ် ဒပ်ပၞာန်တံ ကၠောန်သ္ပမံင်ဖိုဟ်ရောၚ် လိက်ဒုၚ်စဳရေၚ် ကုလသမဂ္ဂတံ လလောင်ပတိတ်လဝ်နွံရ။
ပရိုၚ်-သြၚ်လောန်တိုၚ်မ်
Photo – MOI