မတ်မလီု၊ အဝ်ဂတ် ၂၃
စိုပ်ကၠုၚ်ကၞောတ်ဒဳဇြေမ်ပါဏံ ပ္ဍဲကဵု စကၠောန်အာ ပေါဲရုဲမာဲသ္ကုတ်ကဵုသ္ကုတ်ဏံမ္ဂး နကဵု ဗော်ပရေၚ်ဍုၚ်ကွာန် လုပ်ပြိုၚ်မာဲတံ သွက်ဗော်ဇကု ညံၚ်ဂွံဆက်တန်တဴအာမာန် ကြေပ်ဂြတ်မံၚ် ဇဳဒိုဟ်ဏောၚ် ဗော်ကောန်ဍုၚ်အရၚ်လ္ၚဵု ဟီုကဵု ဌာန်ပရိုၚ် သြၚ်လောန်တိုၚ်မ်ရ။
အပ္ဍဲကဵု အခက်အခုဲဂမၠိုၚ်ဂှ်မ္ဂး စပ်ကဵုခုတ်စၟတ်လဝ် ဒၞာဲဒေသဆန္ဒမာဲတံကီု ပရေၚ်သြန်ဂအုံဗော်၊ ပရေၚ် သွက်သ္ဂောံဂွံအလံၚ်ညးစၞးကဵု ဗွဲမဂတာပ်အခိၚ် ညံၚ်ဂွံပၠုပ်စရၚ်မာန်၊ လၟိဟ်ကောန်ဗော်ညံၚ်ဂွံဖ္ဍိုက် ကဵု ပရေၚ်သွက်ဂွံပံက်အာ ရုၚ်ဗော်မာန်တံ ပါလုပ်ရ။
နကဵုဗော်ပရေၚ်ဍုၚ်ကွာန်တံဂှ် ကၠာဟွံကၠောန်ပေါဲရုဲမာဲဏီ အပ္ဍဲပွိုၚ် ၉၀ တ္ၚဲဂှ် အတိုၚ်စၟတ်လဝ် လၟိဟ်ကောန်ဗော်ကဵု ရုၚ်ဗော်တံ ပံက်တိုန်ဟွံမာန်မ္ဂး နကဵု ဥပဒေစၟတ်သမ္တီဗော် ၝောံပိုဒ် ၁၂ ဂှ် ကေတ်အာအရေဝ်ဏောၚ် နူကဵုကဝ်မယှေန်ပေါဲရုဲမာဲကၟိန်ဍုၚ် ပ္ဍဲအဝ်ဂတ် ၂၀ ဂှ် ကဵုလဝ်သမ္တီ နွံရ။
ဟိုတ်ဂှ်တုဲ နကဵုဗော်ပရေၚ်ဍုၚ်ကွာန် ညံၚ်ဟွံဂွံဒးဒုၚ်ပလီုဂှ် သွက်လၟိဟ်ကောန်ဗော်တံကီု ရုၚ်ဗော်တံကီု အတိုၚ်ခုတ်စၟတ်လဝ် ညံၚ်ဂွံဖဍိုက်ဗပေၚ်အာမာန် ဂစာန်ကၠောန်မံၚ်တုဲ စိုပ်ဂိတု သိပ်တေမ်ပါ ၇ ဏံမ္ဂး စွံအခိၚ်လက်ကရဴအိုတ် ဒးပတိုန်ထၜးကဵု ကဝ်မယှေန်ရောၚ်ဂှ် အပ္ဍဲကဵုတၚ်လလောၚ် ချူလဝ်နွံရ။
နကဵုဗော်ပရေၚ်ဍုၚ်ကွာန် သွက်ဂွံစန်ဒက်အာ အပ္ဍဲကဵုတွဵုရးကရေၚ် ပတိုန်လဝ်စၟတ်သမ္တီ ဗော်ပရေၚ်တဴတက်မန်ဂှ် အတိုၚ်စၟတ်လဝ် လၟိဟ်ရုၚ်ပေၚ်ၚ် သွက်ဂွံပံက်အာမာန် ဒးဂစာန်ဗဂေတ် ဖန်ဇန်မံၚ်အိုတ်စောန် က္ဍိုပ်သ္ကိုပ်ဗော်မွဲတၠ ဟီုရ။
“ပြဟ်ဟ်ဏံ အပ္ဍဲကဵု ၜါပွိုၚ်ဍုၚ်ဂှ် ပိုဲတံဒှ်မံၚ်အခက်အခုဲ၊ ကအ်ကြိက်ကဵု လှာဒကှ် သီုကဵု ဗြဝတဳကီု။ ဒၞာဲဏံသီုဖအိုတ်ဂှ် အာကၠုၚ်ဟွံဂွံ ဒှ်မံၚ်၊ သွက်ဒၞာဲတံဏံ ပိုဲဂစာန်မံၚ်၊ ရုၚ်ဗော်တံ တောဲတုဲ ဒးပံက်ဟာ ဟွံသေၚ်မ္ဂး ရုၚ်ဗော်ဂှ် ဒးပံက်အာ ပ္ဍဲကဵုပွိုၚ်ဍုၚ်(ဒၞာဲဆေၚ်စပ်) ရဟာ အကြာမွဲၜါတ္ၚဲဏံ ပိုဲဗက်ဖန်ဇန်မံၚ်ဖိုဟ်၊ ယဝ်ရ ရုၚ်ဗော် ၅ ဒၞာဲ ပံက်ကဵုဟွံမာန်တှ်ေ ပိုဲတံခက်အာကဵု ၝောံပိုဒ် ၁၂ မာန်ရောၚ်” သာ်ဝွံ သ္ဂးရ။
နကဵုလၟိဟ်ကောန်ဗော်မ္ဂး ၜက်အာနူကဵု လၟိဟ်ခုတ်စၟတ်လဝ်ကီုလေဝ် သွက်ဂွံစၟဳစၟတ်အာ လၟိဟ် ၁၀၀ ပြၚ်ၚ် လပါ်ကဝ်မယှေန် ကလေၚ်ဖျေံနၚ်ပၠန်တုဲ လၟိဟ်ကောန်ဗော် သွက်ဂွံဒးထပ်ဗပေၚ် သှ်ေမံၚ် ၁၂၀ ပြၚ်ဏီ ညးဆက်ဟီုရ။
နကဵုဥပဒေ ပွမစၟတ်မ္တီဗော်ပရေၚ်ဍုၚ်ကွာန်ဂမၠိုၚ်ဂှ် ယဝ်ရဒှ် ဗော်စန်ဒက် အလုံကၟိန်ဍုၚ်မ္ဂး လၟိဟ်ကောန်ဗော် မွဲမအောန်အိုတ် ၅၀,၀၀၀ ဒးနွံတုဲ ပၞောဝ်ကဵုပွိုၚ်ဍုၚ်သီုဖအိုတ်မ္ဂး အောန်အိုတ် ပိဂအုံမွဲဂအုံဂှ် မ္ဒးပံက်လဝ် ရုၚ်ဗော်တံရောၚ်။
ဗော်စန်ဒက် အပ္ဍဲရးဒေသဇၞော်/ တွဵုရးမ္ဂး လၟိဟ်ကောန်ဗော် ဗွဲမအောန် ၁,၀၀၀ မ္ဒးနွံကီု ပၞောဝ်ကဵုပွိုၚ်ဍုၚ်သီုဖအိုတ်တုဲ အောန်အိုတ် ပ္ဍဲ ၅ ပွိုၚ်ဍုၚ်ဂှ် မ္ဒးပံက်အာ ရုၚ်ဗော်ရောၚ် ခၞံလဝ်သၞောဝ်နွံရ။
ဗော်ညဳသၟတ်မန် ပတိုန်လဝ်စၟတ်သမ္တီ နကဵုဗော်ပရေၚ်ဍုၚ်ကွာန် စန်ဒက် အပ္ဍဲတွဵုရးမန်ဝွံ အတိုၚ်စၟတ်လဝ် ဇြဟတ်ကောန်ဗော်ကဵု လၟိဟ်ရုၚ်ဗော်ဂမၠိုၚ် ပလေဝ်ထပေၚ်လဝ်တုဲတုဲရောၚ် သ္ဂးရ။
တုဲပၠန် ညးစၞးအလံၚ်အမာတ်တံဂှ် သွက်ဂွံပၠုပ်စရၚ် သှ်ေမံၚ် ပွိုၚ်သတ္တဟပြၚ်ဟေၚ် ဒှ်မံၚ်တုဲ တၚ်ဝါတ်တံဏံ ညံၚ်ဂွံတတ်ၜက်အာမာန် အဃောဂိုတ်ဂစာန်မံၚ်ရ သာ်ဝွံ ညးအခေါၚ်ဟီုဂးနွံ နာဲတာန်ယှိုဲ ဆက်ဟီုရ။
“လၟုဟ် တ္ၚဲသှ်ေ ဟွံဂၠိုၚ်ရ သွက်ဂွံပတိုန်စရၚ်ညးစၞးအလံၚ်အမာတ်တံဂှ် ပိုဲလေဝ် ဆက်ကော်မံၚ် ညးစၞးတံဖိုဟ်။ တုဲပၠန် အစောန်စရာဲ အလံၚ်အမာတ်ဂှ်လေဝ် အဃောရုဲစှ်မံၚ်ဖိုဟ် အကြာမွဲၜါတ္ၚဲဏံ ပိုဲဂဇအ်ဝိုၚ်ကောံဓရီုတုဲ ကလေၚ်သ္ပဒတန်ဏောၚ်။ ဗီုလဵုဟီုရော ပ္ဍဲပိုဲတံလေဝ် အခက်အခုဲနွံမံၚ် ဗွဲမဂၠိုၚ်ဏီ။ ညံၚ်ဂွံတတ်ၜက်အာမာန်ဂှ် ဂစာန်မံၚ်ဖိုဟ်” သာ်ဝွံ သ္ဂးရ။
ပေါဲရုဲမာဲ ကဝ်မယှေန်ပၞာန်သ္ကိုပ်သ္က သ္ကုတ် ၁ ဝွံ ပ္ဍဲဒဳဇြေမ်ပါ ၂၈ ဂှ် သွက်ဂွံစကၠောန်အာ ပ္ဍဲကဵုရးဒေသကဵု တွဵုရးဖအိုတ် ဒၞာဲကဵု ၁၀၂ ပွိုၚ်ဍုၚ်တုဲ သ္ကုတ်သှ်ေမံၚ်တံဂှ် ပြဟ်ဟ်ဏံ ဟွံဂွံလလောၚ်တြးဏီပုဟ်။
မွဲလပါ်ပၠန် သွက်ဂွံစပတိုန်အာယၟု အလံၚ်ညးစၞး စၠတ်ထဝ်နာနာတံဂှ် ကဝ်မယှေန်ပေါဲရုဲမာဲခုတ်စၟတ်လဝ် ပ္ဍဲသိပ်တေမ်ပါ ၈ တေံရ။
တုဲပၠန် မိက်ဂွံကလေၚ်ရုပ်သီ တၞးလိက်ဂမြၚ်ပတီ အလံၚ်ညးစၞးတံမ္ဂး သိပ်တေမ်ပါ ၁၂ ဂှ် စွံလက်ကရဴအိုတ် ရုပ်သီဏာမာန်တုဲ နူကဵုသိပ်တေမ်ပါ ၁၈ ဒဵုကဵု အံက်တဝ်ပါ ၁၄ ဂှ် ခုတ်စၟတ်လဝ် တ္ၚဲစၟဳစၟတ်ဂှ် ဂွံဆဵုရ။
လ္တူဏံ နကဵုဗော်လ္ၚဵုလ္ၚဵုတံဂှ် သ္ကုတ်ပေါဲရုဲမာဲသှ်ေမံၚ်တံကီု ပွိုၚ်ဍုၚ်ကဵု စၟတ်တ္ၚဲသွက်ဂွံကၠောန်ဗဒှ်အာ နူကဵုကဝ်မယှေန် ဟွံဂွံလလောၚ်တြးဏီတုဲ ပြဟ်ဟ်ဏံ သွက်ဂွံပတိုန်စရၚ် အလံၚ်ညးစၞးတံကဵု ပရေၚ် လမျီုဗော်သွက်ဂွံဆက်ဂျိုၚ်တဴအာဟေၚ် ဒးကဵုလဝ်ဖျုန်ရောၚ် သ္ဂးရ။
ပ္ဍဲဒၞာဲစၠတ်ထဝ်လဵု မူစိဒၞာဲ ဒးလုပ်ပြိုၚ်ရော သွဟ်နူကဝ်မယှေန်ပေါဲရုဲမာဲ ဟွံဂွံတီသွဟ်ကၠးကၠးဏီဂှ်ရ မုသ္ဂုတ်သွာတ်လေဝ် ဟွံဂွံဖျေံလဝ်ဏီပုဟ် သာ်ဝွံ က္ဍိုပ်သ္ကိုပ် ဗော်တဴတက်မန် ဟီုရ။
“ပြဟ်ဟ်ဏံ ဗော်ပိုဲဂွံဆက်ဂျိုၚ်တဴအာ အောန်အိုတ် မူစိဒၞာဲ ပိုဲဒးလုပ်ပြိုၚ်အာရော UEC ဟွံကဵုသွဟ်ကဵုပိုဲဏီ၊ ဥပဒေ ပတိတ်လဝ်ဏံ ပိုဲလေဝ် ဟွံသောၚ်ကၠးဏီပုဟ်၊ အပ္ဍဲစၠတ်ထဝ်မွဲမွဲ ဒးလုပ်ပြိုၚ်အာရောၚ် တၚ်ဏံနွံမွဲတၚ်၊ စၠတ်ထဝ်မွဲမွဲ ဂးလဝ်တှ်ေ သီုအလုံတွဵုရးမွဲဏံ ၇ ပွိုၚ်ဍုၚ်နွံမံၚ်တုဲ နွံမံၚ်ပၟိက်ကဵု ညးစၞး ၁၄။ ပ္ဍဲဏံ စၠတ်ထဝ်ကောန်ဂကူကဵု စၠတ်ထဝ်ညးဍုၚ်ကွာန်တံ ဟွံပါဏီပုဟ်။ စၠတ်ထဝ်မွဲမွဲဟီုဂှ် မိက်ဂွံသ္ဂးဟာ ပွိုၚ်ဍုၚ်မွဲမွဲဂှ် စၠတ်ထဝ်မွဲ မိက်ဂွံသ္ဂးဟာ သာ်ဂှ်ဟွံသေၚ် ပရေၚ်ကောန်ဍုၚ်အရၚ်မွဲတၠဓဝ်ဂှ် စၠတ်ထဝ်မွဲ မိက်ဂွံသ္ဂးဟာ။ တၚ်နၚ်တံဏံ ပိုဲဟွံသောၚ်ကၠးဏီတုဲ ဆက်သၟာန်လဝ် UEC နွံမံၚ်” သာ်ဝွံ သ္ဂးရ။
နကဵု ဥပဒေပွမပတိုန်စရၚ်ဗော်ပရေၚ်ဍုၚ်ကွာန်ဂမၠိုၚ်ဝွံ ဗော်စန်ဒက်အလုံကၟိန်ဍုၚ်မ္ဂး ပၞောဝ်ကဵုစၠတ်ထဝ် သီုဖအိုတ်တုဲ ပ္ဍဲဒၞာဲဒေသဆန္ဒမာဲကဝက် မ္ဒးလုပ်ပြိုၚ်အာကီု ဗော်စန်ဒက် ရးဒေသဇၞော်၊ တွဵုရးတံမ္ဂး ဗွဲမအောန်အိုတ် ဒၞာဲဒေသဆန္ဒမာဲမွဲမွဲဒၞာဲ မ္ဒးလုပ်ပြိုၚ်အာရောၚ်။
အတိုၚ်သၞောဝ်ဥပဒေ ခုတ်စၟတ်ခၞံလဝ်ဏံ ယဝ်ရ ဗော်ဇကုလုပ်ပြိုၚ်ဟွံမာန်မ္ဂး နကဵုဗော်ပရေၚ်ဍုၚ်ကွာန်ဂှ် သွက်ဂွံဆက်တဴအာ အခေါၚ်ဟၟဲရောၚ် ချူထမံက်လဝ်နွံရ။
ပ္ဍဲကဵုပေါဲရုဲမာဲဝွံ သအာၚ်နူကဵု စၠတ်ထဝ်ညးဍုၚ်ကွာန်တုဲ သွက်စၠတ်ထဝ်ကောန်ဂကူကဵု စၠတ်ထဝ် ရးဒေသဇၞော်၊ တွဵုရးတံဝွံ သၞောတ် ညးဂွံမာဲဂၠိုၚ်အိုတ်ဇၞး FPTP ကဵု သၞောတ်ညးစၞးသ္ပစၞး PR တံ ပံၚ်ပစပ်ကၠောန်အာရောၚ် လလောၚ်တြးလဝ်ရ။
ပရိုၚ်- သြၚ်လောန်တိုၚ်မ်
Photo – Social Media