တနၚ်သဳ၊ အဝ်ဂတ် ၂၅
ကဝ်မယှေန်ပၞာန် ဂစာန်မံၚ် သွက်ဂွံကၠောန်အာ ပေါဲရုဲမာဲဂှ် ပ္ဍဲရးတနၚ်သဳ သွက်ဂွံကလေၚ်ထိၚ်ဒဝ် ဒေသတိဍာ် ဒၞာဲပွိုၚ်ဍုၚ်တံမာန် ထပ်ထပေၚ်မံၚ် ဇြဟတ်ပၞာန်ရဂှ် ဂွံတီကေတ် နူဂကောံသုတေသနဒေသ FE5 Thanintharyi ရ။
ပ္ဍဲရးတနၚ်သဳ ၁၀ ပွိုၚ်ဍုၚ် သွက်ဂွံကၠောန်အာပေါဲရုဲမာဲ ကဝ်မယှေန်ပၞာန် စဳဇန်မံၚ်ကီုလေဝ် နကဵု ရံၚ်အာအကာဲအရာ တိဍာ်တံတုဲ သ္ကုတ် ၁ ဂှ် ပ္ဍဲကဵု ကအ်သံၚ်၊ ထဝါဲ၊ ဗိက်ကဵု ပွိုၚ်ဍုၚ်ဘုက်ပျေန်တံဂှ် စိုပ်ဂိတုဒဳဇြေမ်ပါ ဟွံသေၚ်မ္ဂး ပ္ဍဲဂိတုဂျာန်နဝါရဳ ၂၀၂၆ တေံ ရန်လဝ် သွက်ဂွံကၠောန်အာ ပေါဲရုဲမာဲရ။
မွဲလပါ်ဂှ် ပ္ဍဲအလုံရးဒေသဇၞော်ဖအိုတ် သီုကဵု ၁၀ ပွိုၚ်ဍုၚ် သွက်ဂွံကၠောန်အာမာန် စဳဇန်လဝ်ကီုလေဝ် ဒၞာဲဒေသဗွဲမဂၠိုၚ် ဒပ်ပၠန်ဂတးဂမၠိုင် ကေတ်လဝ်ဒၞာဲတုဲ ဒၞာဲပေၚ်ၚ်ဂှ် ဒှ်ကၠောန်မာန်ဟွံသေၚ်ပုဟ် ဟီုဂးမံၚ်နွံရ။
သွက်ဂွံဟလိုၚ်ဇြဟတ်ပၞာန်ဂှ်လေဝ် ၜက်ၜေတ်လဝ်နူကဵု သၞောဝ်ဥပဒေယိုက်ဂၠေၚ်ပၞာန်တုဲ ပကောံကံက်ကေတ်မံၚ် ကောန်ပၞာန်တၟိဂှ်ကီု နကဵုနဲကဲဗီုပြၚ်နာနာသာ် ရပ်ကေတ်မံၚ် သၟတ်ပ္ဍဲဒေသတံတုဲ နနဲအဓ္ဓမ ကဵုလုပ်ယိုက်ဂၠေၚ် ကောန်ပၞာန်တံနွံမံၚ်ဏောၚ် FE5 Thanintharyi သ္ဂးလဝ်ရ။
လောန်ကၠုၚ်ဂိတုဂျူလိုင်တေံ လ္တူဍုၚ်ဗိက်ကဵု ထဝါဲတံဂှ် ထ္ၜးဟိုတ်တေၚ်စရၚ်ကၟုဲဂးတုဲ အခိၚ်ဗတမ် ဗက်လုပ်ဂၠာဲစၟဳစၟတ် ပ္ဍဲသ္ၚိဌာန်ညးဍုင်ကွာန်ဂမၠိုၚ် ကော်ရပ်ဏာသၟတ်တံတုဲ ကဵုလုပ်ယိုက်ဂၠေၚ်ပၞာန် သၟးဟွံက အပ္ဍဲပၞော်လုပ်တိတ်ဍုၚ် ဒၞာဲသၞေဟ်ကၚ်တံဂှ်လေဝ် စၟဳစၟတ်မံၚ်သၟတ်တံ သွက်ဂွံယိုက်ဂၠေၚ်ပၞာန် ရပ်ဏာနဲအဓ္ဓမတံဂှ် ကၠောန်လဝ်ဆက်က်နွံ သ္ဂးရ။
နကဵုတၚ်နင် လလောၚ်လဝ် ကဝ်မယှေန်ပေါဲရုဲမာဲကၟိန်ဍုၚ် UEC ကဝ်မယှေန်ပၞာန်ဂှ်တှ်ေ အခိၚ်သီအဝဵုတုဲဏံ နကဵုဗော်ပရေၚ်ဍုၚ်ကွာန် ကလေၚ်ပတိုန်လဝ်စၟတ်သမ္တီဗော် ကုဇရေၚ် ကဝ်မယှေန်ပေါဲရုဲမာဲဂှ် ၅၆ ဗော်နွံကီုလေဝ် ဗော်ဖျေံလဝ်သ္ဇိုၚ် ပ္ဍဲရးတနၚ်သဳ မွဲဗော်မှဟၟဲပုဟ်ဂှ်လေဝ် ဂွံတီရ။
ပြဟ်ဟ်ဏံ အပ္ဍဲကဵုရးတနၚ်သဳ ပွိုၚ်ဍုၚ်ဍာ်ဗု၊ ပလဝ်၊ ထဝါဲဒေသဂြိပ်ဗၟံက်ကဵု တယိတ်ချံၚ်တံဂှ် ဟိုတ်နူကရောၚ်ပၞာန် ကဝ်မယှေန်ပၞာန်တံ ထပက်လုပ်ကၠုၚ်တုဲ အကာဲအရာပရေၚ်ပၞာန် အကြာၜါလပါ်တံ ကြံၚ်မ္ၚိုဟ်မံၚ်ရောၚ် ဂွံတီကေတ်ရ။
ပရိုၚ်-သြၚ်လောန်တိုၚ်မ်
Photo – Social Media