မတ်မလီု- အံက်တဝ်ပါ ၉
ပ္ဍဲဂိတုဒဳဇြမ်ပါဏံ ဒၞာဲတိဍာ် သွက်ဂွံကၠောန်အာပေါဲရုဲမာဲ လလောၚ်တြးလဝ်တံမ္ဂး ပြဟ်ဟ်ဏံ တိဍာ်ကဝ်မယှန်ပၞာန် ဒပ်ပၞာန်ဗမာဒးဗလးလဝ်တဲတံဂှ် ပေါဲဗတိုက်ဗလးတိကဵုဗလးကျာ ကၠောန်တိုန်ဆက်ဆက် နွံကၠုၚ်ရ။
ဒၞာဲတိဍာ် ဂကောံကောန်ဍုၚ်ရပ်လွဟ်တံကဵု ဂကောံဇြဟတ် ပၠန်ဂတးတံထိၚ်ချုက်လဝ် ပ္ဍဲကဵုဒေသသေံသၟဝ်ကျာကဵု ရခေၚ်ကီု ဒေသပယျဵုသေံ-ဗမာ တွဵုရးကရေၚ်ကေုာံ ပ္ဍဲကဵုလဒေါဝ်ဍုၚ်ဗမာဒေသတံဂှ် ဒပ်ပၞာန်ဗမာ သၠုၚ်ပတိုန်လဝ်ပရေၚ်ပၞာန်တံရ။
အပ္ဍဲကဵုပရေၚ်ချဳဒရာၚ်ပၞာန်တံမ္ဂး ဒၞာဲဒေသဒးဗလးလဝ်တဲလ္ၚဵုတံဂှ် စကာဇြဟတ်ဇၞော်ဇၞော်တုဲ နူကဵုဗလးတိ ထပက်ကရောၚ်ပၞာန်ကီု နကဵုဒပ်ပၞာန်ကျာတံကီု စကာနဲစုၚ်စုၚ်တုဲ ကြဳဗုမ်ပတိုက်မံၚ် မဒှ်ရ။
ပ္ဍဲကဵုဒၞာဲကၠောန်အာပေါဲရုဲမာဲတံဂှ် ညံၚ်ဂွံဒှ်ဒၞာဲတိဍာ် မကမ်ဗုမ်ဗၠးၜးမာန် ကရပ်ကဵုဒၞာဲဒကဲဒကဲတံဂှ်ကီု ဗလးတိဗလးကျာ ပံၚ်ပစပ်တုဲ လဝေၚ်အာပရေၚ်ပၞာန်ရောၚ် ညးခါတ်အကာဲပရေၚ်ပၞာန် ဗိုလ်ဇၞော် ဇြေန်ယျဝ် CDM သ္ၚဳဂၠိပ်ရ။
“ပ္ဍဲကဵုဒၞာဲပွိုၚ်ဍုၚ်ဍေံတံ ကၠောန်ပေါဲရုဲမာဲဂှ် ယဝ်ရမၞိဟ်ဟၟဲမ္ဂး ဂွိၚ်ဖေက်ဟွံအံၚ်ဇၞးတုဲ ဍုၚ်ကရပ်ကရပ်တံဂှ်လေဝ် ဂေတ်ကဵုကရောၚ်ပၞာန်ဗလးတံတုဲ ထပက်ဏောၚ်။ ဒၞာလဝ်ဒၞာဲဍေံတံကၠောန်ပေါဲရုဲမာဲဂှ်တုဲမှ ပန်ရီုကဵုပၞာန်ကျာဟွံက ပဵုတုဲကၠောန်သ္ပအာ ဓဇန်ဓဇန်မာန်ဏောၚ်။ ကၠောန်ဗီုတံဏံတုဲဒှ်အိုတ်မှ ဒၞာဲဍေံတံကၠောန်ပေါဲရုဲမာဲဂှ် ညံၚ်ဂွံဒှ်တိဍာ်ဗၠးမကမ်မာန် မၞိဟ်ညံၚ်ဂွံလုပ်ကၠုၚ် လပါ်ရဲဂြိပ်ဒဴပၞာန်တံမံၚ်စံၚ်မံၚ်တံဂှ် ပြဟ်ဟ်ဏံ ဗလးတိ၊ ဗလးကျာ သီုကဵုလွဟ်ဇၞော် ဍေံတံဖန်ဇန်ကၠောန်ကၠုၚ်မာန်ရောၚ်” သာ်ဝွံ သ္ဂးရ။
တုဲပၠန် ပါဲနူကဵုပွိုၚ်ဍုၚ်လလောၚ်တြးလဝ် ဟွံဒှ်ကၠောန်ပေါဲရုဲမာဲတံတုဲ ပွိုၚ်ဍုၚ်သှ်ေမံၚ်တၞဟ်ဟ်ဂှ်လေဝ် ဗတိုက်ကၠုၚ်မာန်ကီု အကာဲအရာ ဘိုအ်ဂွံမၚ်ရံၚ်အာရောၚ် ညးဆက်ဟီုရ။
ပ္ဍဲဂိတုအံက်တဝ်ပါ ၆ အခိၚ်ဇိုၚ်သဝ်တ္ၚဲဂှ် ဒၞာဲကဵုကွာန်ဗုၚ်တို ပွိုၚ်ဍုၚ် ချံၚ်ဥူ ရးသကိုင်ဂှ် အဃောကမ်မတဳဟဗေၚ်တံ သ္ကိုပ်သ္ကကၠောန်ဗဒှ်လဝ် ပေါဲဟကိုပ်ဗဗေၚ် ဖဳပၟတ်ပၞာၚ် ဂိတိဝှ်ပေၚ် ပွမဒစဵုဒးစ သၞောတ်တၠအဝဵုပၞာန် မွဲကရောံကဵု ညးဍုၚ်ကွာန်တံဂှ် နူကဵုဒပ်ပၞာန် ကၠုၚ်ကြဳဖျေံဏာဗုၚ် နကဵုက္ဍာၚ်ကျာ ဗ္ဂပ်လဝ်စက်ရ။
အပ္ဍဲကဵုပရေၚ်ထောံဖျေံဗုမ်ဏံဝွံ ကမ်မတဳဟဗေၚ်လ္ၚဵုကဵု ကောန်ညးဍုၚ်ကွာန်တံ လၟိဟ်ကဵုစှော်ချိုတ်အာတုဲ ဒးလဝ်ဘဲဝပ်နွံရဂှ် အတိုၚ်လဟီု တမ်ရိုဟ်ကၞက်ညးဒေသတံဂှ်ရ ဌာန်ပရိုၚ်တံ ချူထမံက်လဝ်ရ။
အတိုၚ်ဂွံလဝ်စရၚ် အကာဲအရာလက်ကရဴအိုတ်မ္ဂး ကောန်ၚာ်ကဵု ညးဗြဴတံ ပါလုပ်ချိုတ်အာလဝ် ၂၂ တၠ၊ ညးဒးဘဲဝပ် ၄၀ ပြၚ်နွံမံၚ်ရောၚ်ဂှ် ညးအခေါၚ်ဟီုဂးနွံ အလဵုအသဳညီသၟဟ်ဂကူ NUG ဥူနေဖုၚ်လာတ် ဟီုကဵုဌာန်ပရိုၚ်သြၚ်လောန်တိုၚ်မ်ရ။
“အတိုၚ်ဂွံလဝ်စရၚ်ဗွဲကြဴအိုတ်ဏံမ္ဂး ၂၂ တၠချိုတ်အာတုဲ ၄၀ ပြၚ်ဂှ် ဒးလဝ်ဘဲဝပ်။ ညးဗြဴကဵု ကောန်ၚာ်တံပါမံၚ်။ ဆဂးညးဗြဴညးတြုံ ချိုတ်တ်ပၠိုတ်တ် စရၚ်ပိုဲဟွံဂွံလဝ်ဏီ။ ပိုဲအာတ်လဝ်စရၚ်ဖိုအ်ရ” သာ်ဝွံ သ္ဂးရ။
ပြဟ်ဟ်ဏံပၠန် ပ္ဍဲကဵုဒေသသေံသၟဝ်ကျာ ဍုၚ်နံၚ်ချိုကဵု ကျံက်မေဝ်ဂှ် နူကဵုတဲဒပ်တအာၚ် TNLA ထိၚ်ချုက်လဝ်ဂှ် ဒပ်ပၞာန်ဗမာ ကလေၚ်ပလန်ဗတိုက်ဂွံဏာတုဲ ဗွဲကြဴဏံ ပွိုၚ်ဍုၚ်နာန်မတူ၊ တဳပဝ်ကဵု မိုၚ်လုၚ်တံကီု နကဵုပၞာန်ကျာ ဆက်ပတိုက်ကၠုၚ်မံၚ်ရ။
ပ္ဍဲအံက်တဝ်ပါ ၇ ဟိုတ်နူဒပ်ပၞာန်ကျာဗမာ ဖျေံကြဳဗုၚ် ပ္ဍဲကွာန်မာန်ဟုၚ် ပွိုၚ်ဍုၚ်မိုၚ်လုၚ်ဂှ်တုဲ သီုကဵုကောန်ၚာ်ဍောတ်တ်မွဲတၠမပါလုပ် ညးဍုၚ်ကွာန် ၁၀ တၠ ဒးချိုတ်အာလဝ်ရောၚ် ဒပ်တအာၚ် TNLA လလောၚ်တြးလဝ်ရ။
တုဲပၠန် ပ္ဍဲတ္ၚဲဂှ် အခိၚ်နူဂယးဂှ် ၜၚ်ကျာဒပ်ပၞာန်ဗမာ Jet fighter ဖျေံဏာဗုၚ် လျိုၚ်ပံၚ် ၅၀၀ ပ္ဍဲကဵုပွိုၚ်ဍုၚ် နာန်မတူ ဘာလကျာ် ပုဗ္ဗာရုံတုဲ ဘာလကျာ်လီုလာ်အာရ။
ပ္ဍဲကဵု တ္ၚဲဂိတုပေၚ်ဝှ်ဂှ်လေဝ် ပ္ဍဲကဵုပွိုၚ်ဍုၚ်တဳပဝ် ဟိုတ်နူဒပ်ပၞာန်ကျာ ကြဳဖျေံဗုမ်တုဲ ကောန်ၚာ်မွဲတၠပါလုပ် ညးဍုၚ်ကွာန်ပိတၠ ဒးလဝ်ဘဲဝပ်နွံ ဂွံတီလဝ် နူ TNLA ကီုရ။
“ကၠာဟွံစိုပ်ပေါဲရုဲမာဲ ဒဵုကဵုပေါဲရုဲမာဲဟွံတုဲဏီမ္ဂး ပၞာန်ကျာတံ ဗတိုက်အာဏောၚ် ဒၞာဲဍေံတံကၠောန်ပေါဲရုဲမာဲ ၁၀၂ ပွိုၚ်ဍုၚ်ကီု ပွိုၚ်ဍုၚ်ကရပ်ဗ္ဒာဲတံဂှ်ကီု လၟိဟ်ဂၠိုၚ်ၚ်ဟွံက အကာဲအရာကြီုကြီုဓဇန်ဓဇန် ဍေံတံဘိုအ်ဂွံကၠောန်အာနွံ တော်ခယျကေတ်မာန်ရ” သာ်ဝွံ ဗိုလ်ဇၞော် CDM ဇြေန်ယျဝ် ထံက်ထ္ၜးလဝ်ရ။
အတိုၚ်တၚ်နၚ် ဂကောံလ္ၚတ်ပရေၚ်ပၞာန်ဗမာကေုာံ ဆေၚ်စပ်ကဵုပရေၚ်ဂီုကၠီု MDSI မ္ဂး ပ္ဍဲကဵုအရာဗတိုက်မံၚ်ပၞာန်တံဂှ် ၜၚ်ကျာ Jet fighter ကီု ၜၚ်ကျာပလံၚ်ဗစိုပ်ဗၞိက်တံဟွံက ၜၚ်ကျာ အထံက်ကၚ်တံကဵု က္ဍာၚ်ကျာဗ္ဂပ်လဝ်စက်တံဂှ် ဒပ်ပၞာန်ဗမာတံ စကာသုၚ်စောဲလဝ်ရ။
နကဵုပွန်ပၞာန်မ္ဂး ဒၞာဲခုတ်စုတ်ဂွံ နကဵုပွန်ပရေၚ်ပၞာန်မာန်တံသၟးဟွံက ဒၞာဲညးဍုၚ်ကွာန်တံကီု စွံလဝ်ပွန်ရောၚ် သ္ဂးရ။ အပ္ဍဲဏံ ဗ္ဒိုပ်ဒဴပၞာန်တံကီု ဒၞာဲစမြိုၚ်ပရေၚ်သာသၞာကေုာံပရေၚ်ပညာတံ ပါလုပ်မံၚ်ရောၚ် ချူထမံက်လဝ်ရ။
လောန်ကၠုၚ်ပ္ဍဲဂိတုသိပ်တမ်ပါတေံ ဒပ်ပၞာန်ဗမာဖန်ဗ္ဒျ်လဝ် ပေါဲဗတိုက်ပၞာန်ကျာအလုံဍုၚ်မွဲတုဲ မၞိဟ်ကရပ် ၁၄၀ ချိုတ်အာတုဲ ဒးဝပ် ၁၈၀ ပြၚ်နွံရ။ အပ္ဍဲကဵု ဘဲချိုတ်ဒးလဝ်ဝပ်နာနာတံဏံ ဒေသကချေၚ်၊ ရခေၚ်၊ ရးသကိုၚ်ကဵု မာန္တလေဝ်တံ လၟိဟ်ဂၠိုၚ်အိုတ်နွံကၠုၚ်လဝ် ဂွံတီနူ MSDI ရ။
ပရိုၚ်-သြန်လောန်တိုၚ်မ်
Photo – SAC