ကွာလာလာန်ပူ၊ အံက်တဝ်ပါ ၁၅
ပ္ဍဲကဵုကောံဓရီုက္ဍိုပ်သ္ကိုပ်အဆံၚ်လှုၚ် အာသဳယာန် ကၠောန်ဗ္ဒျ် သဘၚ်ကၞာ ပေါဲသေံ-ခမေန် ထပက်စၟတ်တဲ တၚ်တုပ်စိုတ် ပရေၚ်ၜိုဟ်လလမ်ဂှ် ထရ တိုန်စိုပ်အာရောၚ် တၠသ္ၚိ ဝန်ဇၞော်ဍုၚ်သ္အာၚ် မလေဝ်ယှာ ဟီုဏာပ္ဍဲအံက်တဝ်ပါ ၁၄ ရ။
အကြာ သေံကဵုခမေန် အကာဲအရာကြံၚ်မ္ၚိုဟ်တံဝွံ အပ္ဍဲကဵုဗွဝ်စှ်ဂမၠိုၚ်ဏံ ပွမမၞိဟ်ဒးချိုတ်ဂၠိုၚ်အိုတ် ညံၚ်ရဴဗီုပြၚ်ပဋိပက္ခပၞာန် ပြံၚ်သၠာဲအာ မၞိဟ်ၜိုတ် ၄၀ ချိုတ်အာလဝ်တုဲ မၞိဟ်ၜိုတ် ၃ ကိုတ် ဒးပါဲဒဴလဝ် နူသ္ၚိဌာန်ညးတံရ။
ပေါဲဗတိုက် ပွိုၚ် ၅ တ္ၚဲဒှ်လဝ်တုဲ နကဵုမွဲသ္ကုတ်မွဲသ္ကူ ထရ လုပ်စိုပ်ပညဳပညပ်လဝ်အကြာၜါဍုၚ် ဂွံကၠုၚ်တၚ်တုပ်စိုတ် ဒေါအ်ပန်ပှော်တုဲ ဗွဲကြဴပၠန် ဖံက်ပကဝ်မံၚ် တၚ်တုပ်စိုတ်ရောၚ်ဂးတုဲ သီုကဵုအကြာၜါလပါ် စောစပ်လဝ်အတန်အခၠန်နွံရ။
တၚ်တုပ်စိုတ်ပရေၚ်ၜိုဟ်လလမ် သေံ-ခမေန်တံဂှ် နကဵုထရ စၟဳစလဝ် မိက်ဂွံညာတ်နမတ်ရောၚ် ဝန်ဇၞော်ဍုၚ်သ္အာၚ် မလေဝ်ယှာ မိုဟာမက် ဟာသာန် ဟီုလဝ်ကဵုအစာပရိုၚ်ဂမၠိုၚ် ပ္ဍဲပေါဲသောၚ်ကလးလိက်ပရိုၚ် ကွာလာလာန်ပူရ။
ပ္ဍဲကဵုၝောံဍုၚ်ဇၞော် မလေဝ်ယှာ စနူအံက်တဝ် ၂၆ ဒဵုကဵု ၂၈ သွက်ဂွံတိုန်စိုပ် ကောံဓရီုဇၞော် က္ဍိုပ်သ္ကိုပ်အဆံၚ်လှုၚ် အာသဳယာန်မာန် သမ္မတအမေရိကာန် ပ္ဍဲအံက်တဝ်ပါ ၂၆ ဏံ ကၠုၚ်စိုပ်မလေဝ်ယှာရောၚ် ဝန်ဇၞော် ဟာသာန် ဟီုလဝ်ရ။
ပ္ဍဲကဵုဒၞာဲပယျဵုၜါလပါ်တံဂှ် စကာအာ စက်ယန္တရာပၞာန်တုဲ ဖာဲပတိတ်အာ မါၚ်တပ်တိသီုဖအိုတ်မာန်မှ အကြာ သေံကဵု ခမေန် ညံၚ်ဂွံဒှ်အာ ပရေၚ်တၚ်တုပ်စိုတ်ဍာ်ဇမၠိၚ်မာန်ဂှ် နကဵုမၞိဟ်အကြာ မလေဝ်ယှာကဵု အမေရိကာန်တံ ရေၚ်တၠုၚ်ဖန်ဇန်အာရောၚ် သ္ကိုပ်ဝန်ဇၞော် မလေဝ်ယှာ ဟီုရ။
နကဵုဍုၚ်ၜါဍုၚ်တံလေဝ် အတိုၚ်တၚ်ခုတ်စၟတ်လဝ်တံဂှ် ဒဂေတ်ဗက်စအာ ပေၚ်ၚ်တုဲ အပ္ဍဲကဵုကောံဓရီုအာသဳယာန်ဏံ တၚ်လလောၚ်တြးမွဲ ထပက်အာစၟတ်တဲမာန်ရောၚ် နကဵုသ္ကိုပ်ဝန်ဇၞော် မလေဝ်ယှာ ပတေဟ်ကေတ်လဝ်ဂှ် ဟီုရ။
အကြာဍုၚ်ဇိုၚ်ဝုတ်ဒိုဟ်ၜါဍုၚ် အကာဲအရာကြံၚ်မ္ၚိုဟ်မံၚ်တံ လာဲလေၚ်ပြေပြံၚ်အာဂှ် မိက်ဂွံဆဵု ထရ ပလံၚ်ဗစိုပ်ကဵုလဝ်လိက်နွံကီု သ္ကိုပ်ဝန်ဇၞော်သေံ အနုတေန် ဟီုရ။
ပရေၚ်ကယျာန်ဓဝါတ်ဏံဂှ် နကဵုအမေရိကာန် စွံလဝ်စိုတ် ကိစ္စအဓိက ကဵုလဝ်ဖျုန်ရောၚ် နကဵုပိုဲတံ သ္ပလဝ်သတိကီုလေဝ် နူကၠာဲဟွံဂွံဒုၚ်တဲ တၚ်အမေရိကာန် အာတ်မိက်လဝ်တံဂှ် ကိုပ်ကၠာအိုတ် တၚ်ပိုဲပတိုန်ထ္ၜးလဝ် ၄ တၚ်ဂှ် နကဵုခမေန် ဒးဒုၚ်တဲကၠာရောၚ် ညးအခေါၚ်ဟီုဂးနွံသေံ သဳရဳပန် ဟီုလဝ်ရ။
Ref:Agencies