သိုဝ်၊ အံက်တဝ်ပါ ၁၆
ကောန်ဍုၚ်ကိုဝ်ရဳယာ လၟိဟ်ဗွဲမဂၠိုၚ် ပါလုပ်မံၚ်ကဵု ပရေၚ်တံၚ်မၞိဟ်အာတ်သြန် ဂိုဏ်လီသြန်အန်လိုၚ်ကေုာံ လီဠာန်ကော်ကမၠောန်တံ သွက်ဂွံချပ်စ နူကဵုကဝ်ရဳယာသၠုၚ်ကျာ ဗလးဂကောံတၟေၚ် ကုခမေန် ပ္ဍဲအံက်တဝ်ပါ ၁၅ ရ။
ကောန်ဍုၚ်ကိုဝ်ရဳယာ ဒးဒုၚ်ရပ်လဝ် ပ္ဍဲကဵု ဂိုဏ်လီသြန်အန်လိုၚ် နွံမံၚ်ဍုၚ်ခမေန်သီုဖအိုတ်တံ ညံၚ်ဂွံကလေၚ်စဴ ဍုၚ်မိတိမမာန် ကော်ဖျဴကဵုရောၚ် အလဵုအသဳ သိုဝ် နူအခိၚ်ပြဟ်ဟ်တေံ ကဵုလဝ်ကတိနွံရ။
ဂကောံတၟေၚ်ကိုဝ်ရဳယာသၠုၚ်ကျာ ဒုဝန်ဇၞော်ဍုၚ်သအာၚ် သ္ကိုပ်သ္ကတံဝွံ ပ္ဍဲအံက်တဝ် ၁၅ အခိၚ်သဝ်တ္ၚဲဂှ် တိတ်အာဍုၚ်ခမေန် ညးတာလျိုၚ်အလဵုအသဳ ဟွံမိက်ထမံက်ယၟုမွဲတၠ ဟီုရ။
ကောန်ဍုၚ်ကိုဝ်ရဳယာသၠုၚ်ကျာ အပ္ဍဲကဵုကၠေံမံၚ် ၈၀ တၠတံ ပ္ဍဲကဵုဍုၚ်ခမေန် ၆၃ တၠ ဒးဒုၚ်ရပ်လဝ်ရောၚ် ပတေဟ်လဝ်တုဲ ကောန်ဍုၚ်ကိုဝ်ရဳယာသၠုၚ်ကျာတံ ညံၚ်ဂွံကလေၚ်စိုပ် ဍုၚ်မိတိမမာန်ဂှ် အလဵုအသဳ ကော်ကလေၚ်ဖျဴနၚ်ရောၚ် ကဵုလဝ်ကတိနွံ နူကဵုရုၚ်သမ္မတ ဟီုလဝ် ပ္ဍဲအံက်တဝ်ပါ ၁၄ ရ။
ကောန်ဍုၚ်ကိုဝ်ရဳယာသၠုၚ်ကျာ ၃၃၀ တံ အခိၚ်နွံမံၚ်ဍုၚ်ခမေန်ဂှ် ပ္ဍဲသၞာံဏံ အကြာဂိတုဂျာန်နဝါရဳကဵု အဝ်ဂတ်တေံ ကၠေံအာလဝ် သာ်ဝွံဟွံသေၚ်မ္ဂး ဒးဒုၚ်ရပ်ထိၚ်လဝ်ရောၚ် ဌာနဝန်ဇၞော်ဍုၚ်သအာၚ် ကိုဝ်ရဳယာသၠုၚ်ကျာ ဟီုလဝ်နွံတုဲ အပ္ဍဲဏံ မၞိဟ် ၈၀ တၠတံဂှ် အန္တရာဲအးဟွံအး ဟွံဂွံသ္ပဒတန်ဏီ ဟီုရ။
နူကဵုဍုၚ်ခမေန် ညံၚ်ဂွံပံၚ်တောဲရေၚ်တၠုၚ်ကဵုကီု နကဵုအလဵုအသဳ ကိုဝ်ရဳယာသၠုၚ်ကျာ နနဲအမာတ်ကလုတ်တမာန် နဲကဲအိုဿီု ဂိုတ်ဂစာန်အာရောၚ် ရုၚ်သမ္မတ ဟီုရ။
နူကဵုကိုဝ်ရဳယာသၠုၚ်ကျာ ပ္ဍဲကဵုရုၚ်ကလုတ်ညးတံ နွံဍုၚ်ခမေန်ဂှ် သွက်ဂွံထပ်ဟလိုၚ်တိုန် လၟိန်ဇြဟတ်ဒပ်ဗၠာဲသၟိၚ်ကီု ပွမချဳဒရာၚ်ရုၚ်ကလုတ် သွက်ဇြဟတ်ပဵုဂွံခိုဟ်တိုန်အာ စဳဇန်လဝ်ရ။
ပ္ဍဲကဵုဂကောံတၟေၚ်ဏံမ္ဂး ဒပ်ဗၠာဲသၟိၚ်ကဵု ညးတာလျိုၚ်ထံၚ်ပရိုၚ် ကိုဝ်ရဳယာသၠုၚ်ကျာတံ ပါလုပ်ရောၚ် နူရုၚ်သမ္မတ လလောၚ်လဝ်ရ။
ကောန်ဍုၚ်ကိုဝ်ရဳယာသၠုၚ်ကျာ ဒးဒုၚ်ရပ်လဝ်တံ ညံၚ်ကလေၚ်ဗၠးၜးတိတ်မာန်ဂှ် ဒပ်ဗၠာဲသၟိၚ် ကိုဝ်ရဳယာသၠုၚ်ကျာ သဳကၠဳလဝ်ကဵု ညးတာလျိုၚ်ခမေန်တံတုဲ ပရေၚ်ကွးဘာတက္ကသိုလ် ကိုဝ်ရဳယာသၠုၚ်ကျာ ချိုတ်အာလဝ်ဟွံလံမွဲတၠကီု ပံၚ်တောဲသွက်ဂွံစၟဳစၟတ်ဂၠိုက်ဂၠာဲအာ စဳဇန်လဝ် ဂွံတီရ။
ဟိုတ်နူဂိုဏ်ရာဇဝတ် အပ္ဍဲကဵုဒေသ တံၚ်မၞိဟ်အာတ်သြန် ပျဲပျာံတုဲ ဟိုတ်နူ ပရေၚ်ကွးဘာတက္ကသိုလ် ကိုဝ်ရဳယာသၠုၚ်ကျာ ချိုတ်အာလဝ် ပ္ဍဲကဵုဍုၚ်ခမေန်ဂှ် ပ္ဍဲ ကိုဝ်ရဳယာသၠုၚ်ကျာ မၞိဟ်ဂမၠိုၚ် လကိုတ်မံၚ်အိုတ်ရ။
စပ်ကဵုအမှုဏံတုဲ ရပ်လဝ်ကောန်ဍုၚ်ကြုက် ၃ တၠ နကဵုအမှု ဂစိုတ်မၞိဟ်၊ ပရေၚ်လီဠာန်အန်လိုၚ်တံရ။
ပရေၚ်ဖံက်သၞောဝ်ဥပဒေ ဂိုဏ်လီဠာန်သြန်အန်လိုၚ် နွံမံၚ်ဍုၚ်ခမေန်သီုတံဂှ် နကဵုမၞိဟ်ဂအုံကောံတုဲ ဗီုပြၚ်ၜက်ၜေတ်လုလောန် ကၠောန်သ္ပလဝ်ရောၚ် ဂကောံအခေါၚ်ၜိုဟ်လလမ်ဗၠးၜးဂၠးကဝ် ဟီုလဝ်ရ။
Ref:AFP