မုဟ်ဍုၚ်၊ ဒဳဇြမ်ပါ ၁၁
ပ္ဍဲကဵုပွိုၚ်ဍုၚ်မုဟ်ဍုၚ် သ္ကိုပ်အုပ်ဓုပ် ကွာန်နာၚ်သၠုၚ်ကဵု က္ဍိုပ်သ္ကိုပ် ဒပ်မၚ်ကွာန် ပရေၚ်ဒးဒုၚ်ပန်ဂစိုတ်လဝ်ဂှ် နူကဵုဗော်ဍုၚ်မန်တၟိ (ဗတိုက်သရိုဟ်တၠအဝဵုပၞာန်) NMSP AD ဗဟဵု သောၚ်ကလးလဝ် တၚ်နၚ်ပရောဒဒှ် ပ္ဍဲဂိတုဒဳဇြမ်ပါ ၉ ရ။
ကောန်ဒပ် NMSP AD/ RMA တံ ပ္ဍဲဒဳဇြမ်ပါ ၇ အခိၚ်ဒေါဝ်တ္ၚဲ သွက်ဂွံအာပန်သၞ တိတ်ကၠုၚ်အတိုၚ်ဂၠံၚ်ကွဳစက် မုဟ်ဍုၚ်-ကမာဝက် ကီုလေဝ် အကာဲအရာဟွံကဵုတုဲ ဒးကလေၚ်ဆုတ်ကၠုၚ် လပါ်ကွာန်နာင်သၠုၚ် သ္ဂးရ။
အခိၚ်ကလေၚ်ဆုတ်ကၠုၚ် ၜိုတ်အဒေါဝ်တ္ၚဲ ၁၂ နာဍဳကဝက် စိုပ်ကၠုၚ်အကြာဂၠံၚ်ကၠအ်ရာဘာ ကွာန်နာၚ်သၠုၚ်တုဲ မၞိဟ်ၜါတၠ ဖျာံလဝ်လွဟ်ကဵု ကွဳလိုန်ဓါတ်ဂှ် ကောန်ဒပ် NMSP AD/ RMA တံ ဂွံညာတ်အာ သ္ဂးလဝ်ရ။
ဟိုတ်ဂှ်တုဲ ညးလေဝ်လွဟ် အဲလေဝ်လွဟ် ပ္ဍဲအကာဲအရာ ဒးဆဵုဂဗဏံ ကေတ်ကၠာတဲတုဲ ပန်ကဵုလွဟ် ၈ လစုတ်ဂှ် မၞိဟ်ၜါတၠ ချိုတ်အာ သ္ဂးရ။
ဒှ်ပန်တုဲ နူကဵုညးချိုတ်အာတံဂှ် သီဂွံလွဟ်မွဲဇကိုအ်၊ ကွဳလိုန်ဓါတ်မွဲမ၊ ပလောအ်ပၞာန်မွဲခတှ်ေ၊ လိက်အုပ်စၟတ်သမ္တီ ဒပ်ဗၠာဲသၟိၚ် ၝောံဍုၚ် မုဟ်ဍုၚ်ကေုာံ ထိုၚ်စၞာံစုတ်လှုဲ မွဲမရောၚ် ပ္ဍဲကဵုတၚ်သောၚ်ကလး ချူထမံက်လဝ်ရ။
မၞိဟ်တံဏံ ဟိုတ်နူဒှ်မံၚ်ဂကောံအုပ်ဓုပ်ကွာန် တီလဝ်တုဲ ရန်တၟံနွံနွံ ပန်လဝ်ဟွံသေၚ်၊ ညးလေဝ်လွဟ် အဲလေဝ်လွဟ် ညးဟာအဲဟာ ပ္ဍဲဒးဆဵုဂဗဏံ သွက်ဂွံစဵုဒၞာကုဇကု ဒးကေတ်ကၠာတဲတုဲ ပန်လဝ် ရောၚ် နကဵုဗော်ဍုၚ်မန်တၟိ AD ချူပတိုန်လဝ် တၚ်သောၚ်ကလးရ။
အတိုၚ်ညးဍုၚ်ကွာန်တံ ဟီုလဴလဝ်မ္ဂး ပ္ဍဲကဵုကၠအ်ရာဘာ ကမၠတ်ကွဳလိုန်ဓါတ်စိုပ်မံၚ် သ္ကိုပ်အုပ်ဓုပ် နာဲထောဋ်ကဵု က္ဍိုပ်သ္ကိုပ်ဒပ်မၚ်ကွာန် မာံဗညာမန်တံဂွံပရိုၚ်တုဲ အခိၚ်အာဗက်ရပ်ဂှ် ဒးဒုၚ်ပန်ကဵုလွဟ်တုဲ ချိုတ်အာလဝ်ရောၚ် သ္ဂးရ။
သွက်ဂွံလုပ်ပြိုၚ်မာဲ သ္ကိုပ်အုပ်ဓုပ်တြေံ ကွာန်နာၚ်သၠုၚ် နာဲမန်သဝ်နဲ နုတ်တိတ်တုဲ စၞးညးဂှ် သ္ကိုပ်အုပ်ဓုပ်တၟိ နာဲထောဋ် ဒးပန်ဂစိုတ်လဝ် ဏံ ကေတ်ကၠုၚ်တာလျိုၚ် ဂွံၜိုတ်မွဲဂိတုဓဝ်ဏီ ဂွံတီကေတ်ရ။
ပရိုၚ်-သြန်လောန်တိုင်မ်
Photo – NMSP AD / CJ