မတ်မလီု၊ ဒဳဇြမ်ပါ ၁၁
လ္တူဂကောံပၞာန်သီလဝ်အဝဵုတံ ညံၚ်ဂွံဒေါအ်ထောံပရေၚ်ပံၚ်တောဲတံကီု သွက်ဂွံထံက်ဂလာန် ဂကောံဇြဟတ်ဒဳမဝ်ကရေသဳဗမာတံ ခိုၚ်ၚ်ကၠိုက်က်ကီု ကမ္မတဳသ္ပစၞးစၠတ်ဓဝ်ကၟိန်ဍုၚ် CRPH အာတ်မိက်ဏာ ပရေၚ်ကာမံက်တိုန်ကု ဍုၚ်ဂၠးကဝ်ဂမၠိုၚ်တံရ။
ပ္ဍဲဒဳဇြမ်ပါ ၁၀ တ္ၚဲအခေါၚ်အရာမၞိဟ်ဂၠးကဝ်ဂှ် နူကဵု CRPH ပတိတ်ဏာ လိက်လလောၚ်တြး နကဵုက္ဍိုပ်လိက် “ညံၚ်ဂွံဒတူလိုၚ်ဒစဵုဒစးအာ ပရေၚ်ဗၠးဒုဟ်ဗၠးဝါ ကေုာံအရာထမံက်ပတိုန် ဖိတ်ဒရေဝ်ဒဳမဝ်ကရေသဳ” မဒှ်ရ။
ပရေၚ်ရုန်ဂစာန် အရာမဒက်ပတန် အနာဂတ်ဖိတ်ဒရေဝ် ဒဳမဝ်ကရေသဳတံ ညံၚ်ဂွံအံၚ်ဇၞးအာ ဂကောံ NUG, CRPH တံကဵု ဂကောံကောန်ဍုၚ်အရၚ်ရပ်လွဟ်ဍာံဍာံပြပြတံဂှ် သ္ပကဵုစၟတ်သမ္တီညိ ကေုာံသၠုၚ်ပတိုန် ပရေၚ်ပံၚ်တောဲရေၚ်တၠုၚ်ဂှ်လေဝ် ဍုၚ်ဂၠးကဝ်တံညံၚ်ဂွံထံက်ကဵုဂလာန် အာတ်မိက်လဝ်ရ။
ပွမချဳဒရာၚ်ဒဳမဝ်ကရေသဳ အတိုၚ်ထံက်ဂလာန်ရီုဗၚ် ပရေၚ်ညဳသၟဟ်အလုံဂၠးကဝ်တံဟေၚ် ကလေၚ်ထမံက်ပတိုန် ဒဳမဝ်ကရေသဳဍုၚ်ဗမာမာန်တုဲ ဗဒေါအ်ကၠေံဒဒိုက်ဝါတ်ဂါတ်တံမာန်ကီု ဒဂေတ်ဗက်အာ အခေါၚ်အရာသၞောတ်ဗ္ၜတ် အခေါၚ်အရာမၞိဟ်ဂၠးကဝ်တံမာန်ရောၚ် သ္ဂးရ။
ပတိုန်စရာဲကု ပရေၚ်သတ္တိဂံၚ်သ္ကာ ကောန်ဍုၚ်ဗမာတံ ဒတူလိုၚ်မံၚ်ဂှ်ကဵုပရေၚ်ပၠန်ဂတးတမ်ကညၚ် ခိုၚ်ၚ်ကၠိုက်က်တုဲ သွက်ဂွံထိၚ်ဒဝ်အာလိက်ကၞပ်တၚ်လလောၚ်တြး အခေါၚ်အရာမၞိဟ် (UDHR) မာန်ဂှ် နူကဵုဍုၚ်ဂၠးကဝ်တံ သွက်ဂွံကေတ်ကဵုအရေဝ်ပိုတ်တ်ဂှ်လေဝ် စွံတၚ်ကိစ္စဇၞော်ဇၞော်တုဲ CRPH အာတ်မိက်ဏာလဝ် မဒှ်ရ။
စနူကဵုအခိၚ်ပၞာန်သီအဝဵု ဒပ်ပၞာန်တံဖံက်ပကဝ်လဝ် ပရေၚ်ရာဇဝတ်ပၞာန် လ္တူကောန်ညးဍုၚ်ကွာန်တံ ထပ်ကဵုထပ်ကီု၊ လ္တူတၞောဝ်ဒတောဝ်ဂကူမၞိဟ်တံ ဆက်ဖံက်ပကဝ်လဝ်အမှုရာဇဝတ် ကၠောန်မံၚ် ပွဖ္ဍိုက်ဓရိုက်ဖျေံသိက္ခာမၞိဟ် နကဵုသၞောတ်စှ်ေစှ်ေရောၚ် သ္ဂးရ။
ရပ်မၞိဟ်ဟၟဲကဵုဗဗွဲဓဝ်၊ အခိၚ်ဒးရပ်လဝ်ဂှ် ဍဵုဍိုက်ပျဲပျာံနာနာ ကေုာံ ပရေၚ်ပကီုပရာတ်လိၚ်တံကီု၊ ဒးဒုၚ်သ္ပကာဂစိုတ် ပရေၚ်ဒးဆုဲပြံၚ် နကဵုဂအုံကလောအ်ကီု ကဵုလုပ်ယိုက်ဝန်ပၞာန်အတေၚ်အဓ္ဓမ၊ ပရေၚ်တဲၜက်ဟၟဲကဵုသၞောဝ်၊ ဂစိုတ်မၞိဟ်နကဵုဂအုံတံသၟးဟွံက ပရေၚ်ကြဳဗုမ်တံ မပါလုပ်ရ။
နကဵုဗွဝ်သၞာံဗွဲမဂၠိုၚ် တၠအဝဵုပၞာန်တံ ကေတ်ဂွံလဝ်လိုၚ်သေၚ်ဂစိုတ်မၞိဟ်တုဲ ဗၠးၜးမံၚ်နူကဵုဒုဟ်ဒဏ်တံကီု အခိၚ်သီအဝဵုတုဲဗွဲကြဴဏံ ပဵုတုဲ ကြီုတိုန်မံၚ်ဂှ်ပၠန်။ နူကဵုသံသာဂွံလဝ် အခေါၚ်ဗၠးဒုဟ်ဒဏ်တံဏံ ဗဒေါအ်ပလေအ်ထောံမာန်မ္ဂး ဒှ်သွက်ဍုၚ်ဗမာ သ္ဂောံဂွံပရေၚ်ၜိုဟ်လလမ်ကဵု ဓဝ်ဍာံတံရောၚ် CRPH ထံက်ထ္ၜးလဝ်ရ။
ကမၠောန်လီဠာန်သြန်တံဂှ် သွက်ဒပ်ပၞာန်ကဵု ဂကောံရပ်လွဟ် ဆက်ကၠောံကဵုမံၚ်ဍေံတံ ဒှ်ကၠုၚ်ရိုဟ်ကၞက် ပရေၚ်ပၞော်သြန်လုပ်မွဲတုဲ သွက်ဂွံဒစဵုဒစးတဝ်စၞေဟ်အာ ပရေၚ်ဒဳမဝ်ကရေသဳညးဍုၚ်ကွာန်တံ ထံက်ပၚ်ကဵုလဝ်ပၞာန် အပ္ဍဲဍုၚ်ရောၚ် ကဵုမံၚ်သမ္တီရ။
ဒပ်ပၞာန်ကဵု ဂကောံမဟာမိတ်ရပ်လွဟ်တံ ဗတိုက်သရိုဟ်ထ္ၜးစမံၚ် ကမၠောန်ရာဇဝတ်တံဏံဟီုဂှ် သွက်ဂွံသအးပလေအ်ထောံဟွံသေၚ် ပ္ဍဲကဵုဒေသကီု ဂၠးကဝ်ကီု ညံၚ်သ္ဂောံဂွံမုက်ခိုဟ် ကၠောန်ထ္ၜးစမဒှ်ရဂှ် ပ္ဍဲကဵုလိက်လလောၚ်တြး ချူလဝ်ရ။
ပွမကၟာတ်ဆိုအ်ဂၠးကဝ်တံကဵု ပတိတ်မံၚ်ဇြဟတ် အရာပရေၚ် သၞောဝ်ဓရ်အုပ်ဓလီုဟီုဂှ် သွက်ဂွံဗတိုက်သရိုဟ်အာ ဇာဖိုၚ်ရာဇဝတ်တံဏံ၊ စွံပွန်ကဵု ဒပ်ပၞာန်ကေုာံ ဒပ်မဟာမိတ်တံတုဲ ကဵုလဝ် ပရေၚ်စဵုဒၞာကမၠောန်လီသြန်၊ ကဵုမံၚ်အထံက်အပၚ်၊ ပတိတ်ကေတ်မံၚ် ပရဲပရၚ်တံဂှ်ရောၚ် ထံက်ထ္ၜးရ။
မွဲလပါ်ပၠန် ကမ္မတဳသ္ပစၞးစၠတ်ဓဝ်ကၟိန်ဍုၚ် CRPH သ္ပလဝ်စၞး ညးဍုၚ်ကွာန်အလုံဍုၚ်ဗမာမွဲဂှ် တးပါဲလဝ်ပေါဲရုဲမာဲအလီ ဒပ်ပၞာန် စဳဇန်လဝ်ဂှ်ရောၚ်။
ကၠောန်မံၚ်ပကီုပရာတ်၊ ပရေၚ်ဍဵုဍိုက် ရပ်လဝ်က္ဍိုပ်သ္ကိုပ်ဒဳမဝ်ကရေသဳတံတုဲ ကၠောန်ပေါဲရုဲမာဲဟီုဂှ် သွက်ဂကောံပၞာန်တံ ညံၚ်ဂွံလုပ်အဝေါၚ်သၞောဝ် ကၠောန်ဗ္ဒျ်အာပေါဲအလီရောၚ် သ္ဂးရ။
ပေါဲရုဲမာဲဏံ ပတဝ်လဝ်က္ဍိုပ်ကဵု ဒဳမဝ်ကရေသဳဟွံသေၚ်၊ သွက်ပဋိပက္ခ ညံၚ်ဂွံသၠုၚ်တိုန် ညးဍုၚ်ကွာန်တံ သွက်ဂွံစိုပ်ဒဒိုက် ဍာ်ဇမၠိၚ် ပရေၚ်ဗဂေတ်ခၠန်မတ် မွဲရောၚ်မဒှ်တုဲ ပ္ဍဲအကာဲအရာ မူဝါဒတးပါဲအာ ပေါဲရုဲမာဲပရေၚ်ဒဳမဝ်ကရေသဳ ဟွံသေၚ်ဏံ ဍုၚ်ဂၠးကဝ်တံ ညံၚ်ဂွံဘိုၚ်ဒတူလိုၚ်ကဵု ခိုၚ်ၚ်ကၠိုက်က်ညိဂှ် CRPH ဗတိုက်ဖအောဝ် လဝ်ရ။
ပရိုၚ်-သြန်လောန်တိုင်မ်
Photo – CJ