မတ်မလီု ၊ ဒဳဇြမ်ပါ ၁၃
ပ္ဍဲဒၞာဲကဝ်မယှေန်ပၞာန် ၜက်ၜေတ်လုပ်စိုပ်လဝ် ဒေသမိုဝ်ကုက်ကဵု မိုဝ်မုက်တံဂှ် အလဵုအသဳညဳသၟဟ်ကောန်ဂကူ NUG သွက်ဂွံကလေၚ် ထိၚ်ချုက်အုပ်ဓုပ်မာန် ဆက်လုပ်အာပေါဲဗတိုက်ရောၚ် ကညာၚ်ကမြေဲလဝ်ရ။
နူကဵု အလဵုအသဳညဳသၟဟ်ကောန်ဂကူ NUG အတိုၚ်လၟေၚ် တြးပတိတ်မံၚ် အစဳဇန် ဟီုဂးတက်ကျာပရိုၚ်ကု ညးဍုၚ်ကွာန်ကဵု ဍုၚ်ဂၠးကဝ်တံ ပ္ဍဲဒဳဇြမ်ပါ ၁၁ ဂှ် နူရုၚ်သ္ကိုပ်ဝန်ဇၞော် ညးနွံအခေါၚ်ဟီုဂး ဥူနေဖုၚ်လာတ် ဟီုလဝ်ရ။
ပ္ဍဲကဵုဒဳဇြမ်ပါ ၉ ဂှ် ရုၚ်ဌာန်ဂအုပ်ပၞာန် ဒပ်ပၞာန်စဵုဒၞာညးဍုၚ်ကွာန် ဌာနဝန်ဇၞော်ပရေၚ်စဵုဒၞာ NUG စပံက်လဝ် ဂကောံသ္ကိုပ်က္ဍိုက်ပ် လဝေၚ်ပၞာန် သ္ဂးရ။
ဒပ် PDF ကဵု တမ်ဒပ် ပကဖ နွံမံၚ်ပ္ဍဲမွဲဒေသတံဂှ် ပကောံတုဲ နကဵုသၟဝ်အမိၚ် သၞောတ်ပရေၚ်ကောပ်ကာဲမွဲဒၞာဲ ကောပ်ကာဲ ရေၚ်တၠုၚ်အာ ကိစ္စလဝေၚ်ပၞာန်တံ သၞောတ်စှ်ေစှ်ရောၚ်။
တုဲပၠန် ကၠာဟွံဂွံစကၠောန် ကိစ္စပရေၚ်ပၞာန်ဍၚ် ညးဒေသ ကောန်ဍုၚ်ကွာန် ဒးဘဲလေပ်မာန်တံ ညံၚ်ဂွံပါဲဘဲဒဏ်ဗၠးမာန်ကီု ပရေၚ်ဒစးဒုၚ်စဵုဒၞာတံ ဂွံကၠောန်အာမာန် ပရေၚ်ကဵုအရီုဗၚ်တံဂှ်လေဝ် ဗွဲလၟေၚ်အခိၚ် သွက်ဂွံရေၚ်တၠုၚ်အာ မဒှ်ရ။
အခိၚ်ပလေဝ်ပလေတ်စတုဲ စနူနိုဝမ်ပါ ၃၀ အခိၚ်သဝ်တ္ၚဲ ဒဵုကဵု ဒဳဇြမ်ပါ ၆ ဂှ် ပ္ဍဲပွိုၚ်ဍုၚ်မိုဝ်ကုက် ဗတိုက်ဂွံ ၉ ဝါတုဲ သီဂွံလဝ် ဗ္ဒိုပ်ကုန်သၞ မွဲဒၞာဲမာန်ကၠုၚ်ရဂှ် လလောၚ်တြးလဝ်တုဲယျရောၚ် ဥူနေဖုၚ်လာတ် ဟီုရ။
ပ္ဍဲကဵုဒၞာဲကဝ်မယှေန်ပၞာန် ၜက်ၜေတ်လုပ်စိုပ်လဝ် ပ္ဍဲကဵုဒေသ မိုဝ်ကုက်ကဵု မိုဝ်မုက်တံဂှ် ဒပ် PDF ကဵု တမ်ဒပ် ပကဖ NUG တံ ပံၚ်တောဲကဵုညးဍုၚ်ကွာန်တံ လုပ်မံၚ်ပေါဲဗတိုက် ဂံၚ်ၚ်သ္ကာသ္ကာတုဲ သွက်ဂွံကလေၚ်ထိၚ်ချုက် အုပ်ဓုပ်အာမာန် ဆက်လုပ်ပေါဲဗတိုက် ရောၚ် ပလံၚ်ဗစိုပ်လဝ်ကဵု ဇၟန်ပရိုၚ်ကု ညးဍုၚ်ကွာန်တံရ။
အကာဲအရာ ဗီုပြၚ်ဍုၚ်မိုဝ်ကုက်မ္ဂး လပါ် PDF တံ ပကောံဇြဟတ် ဂွံမံၚ်ခိုဟ်ဟ်တုဲ ဒးဟီုအရေဝ် လပါ်ဇြဟတ်ကဵုမကမ်တံရ နွံမာန်ရဂှ် ညးလ္ၚတ်အကာဲအရာပရေၚ်ပၞာန် CDM ဗိုလ်ဇၞော် ဇြေန်ယဝ် သ္ၚဳဂၠိပ်လဝ်ရ။
“သွက်ဍုၚ်မိုဝ်ကုက် (လပါ်ဒပ်ပၞာန်) ဇြဟတ် ၁၂၀၀ ဟီုဂှ် ယဝ်တော်ကေတ်ကဵု ဗီုပြၚ်အကာဲအရာတိဍာ်သဘာဝမ္ဂး ဆၜိုတ်ပက်စုတ်လ္ၚဴပါင်စိၚ်ရ။ ဍေံတံ(ဇြဟတ်ကောန်ဒပ်စကမ) တြးမၞိဟ်တှ်ေ သိၚ်ၚ်။ နကဵုဒပ်ပံၚ်တောဲတံ ၜိုတ်လဵု ကလေၚ်ပခိုၚ်ဂွံမာန်ရော။ ဒၞာဲဗ္ဒိုပ်ဍေံတံ ဖျေံလဝ်သ္ဇိုၚ်ဂှ် ဆက်ဗတိုက်အာမံၚ်ဆက်က်ဂွံဏောၚ်။ ဆဂး ဒဵုကဵုပေါဲဗတိုက်အဆံၚ်သီဍုၚ်ဟီုဂှ်တှ်ေ PDF မာန္တလေဝ်တံ ဇြဟတ်နွံမံၚ်ခိုဟ်ဟ်ရ။ အဓိက ဍေံတံ စကာသုၚ်စောဲအာ ဂကူလွဟ်မကမ်ဂကူဗီုလဵုရော ဟီုကၠုၚ်အရေဝ်ဏောၚ်” သာ်ဝွံ သ္ဂးရ။
PDF တံဂှ် အကာဲအရာဒေသလေဝ်စီုသကီု လပါ်ပရေၚ်စိုတ်ဓါတ် လေဝ် က္တိုၚ်ကၟိုဟ်မံၚ်တုဲ လပါ်ဒပ်ပၞာန် သ္ပပဓါန်ကဵုၜၚ်ကျာ ပန်ကဵုလွဟ်ဇၞော်ရ နွံမာန်ရောၚ် ညးထံက်ထ္ၜးရ။
ဟိုတ်ဂှ်ရ PDF ဘိုၚ်ပန်ရီုဗၚ်ကဵုလွဟ်ဇၞော် ပါ်ဒၞာဲသၞောတ်ဗျူဟာ စှ်ေစှ်မာန်၊ ယဝ်ရဂွံလဝ်မကမ်ပေၚ်ၚ်မ္ဂး အကာဲအရာကလေၚ်သီ ကေတ်ဍုၚ်မိုဝ်ကုက် စိုပ်ကၠုၚ်မာန်ရောၚ် CDM ဗိုလ်ဇၞော် ဇြေန်ယဝ် ဟီုစၟတ်လဝ်ရ။
ပ္ဍဲအခိၚ်ကာလ ပရေၚ်လဝေင်ပၞာန် ၁၀၂၇ သ္ကုတ်ဒုတိယဂှ် ဒပ်တအာၚ် TNLA ကဵု ဒပ်စဵုဒၞာညးဍုၚ်ကွာန် ဌာနဝန်ဇၞော်ပရေၚ်စဵုဒၞာ NUG တံ ပံၚ်ဗတိုက်လဝ်တုဲ သီကေတ်လဝ် ဒေသမိုဝ်ကုက်ကဵု မိုဝ်မုက် ရးမာန္တလေဝ်ရ။
ဆဂး အလဵုအသဳဍုၚ်ကြုက် ကဵုဇြဟတ်ဟရိုဟ်ပရေၚ်ဍုၚ်ကွာန် သီုကဵုဒပ်ပၞာန်ဗမာ ပန်မံၚ်ကဵုပၞာန်ကျာတံကီုဂှ်ရ ဒပ် TNLA ကလေၚ်ဆုတ်တိတ်အာတုဲ ဒပ်နွံမံၚ်သၟဝ်တဲ ပရေၚ်ကောပ်ကာဲ ဌာနဝန်ဇၞော်ပရေၚ်စဵုဒၞာ NUG တံဂှ် ၜိုတ်အစောန်နွံ စဵုဒၞာအာရောၚ် ဟီုလဝ်ရ။
ပ္ဍဲကဵုကၞောတ်ဂိတုအံက်တဝ်ပါ တုဲကၠုၚ်ဏံ ညးစၞးတၟေၚ် အလဵုအသဳကြုက် တိၚ်ယှဳကျွေၚ် ကလေၚ်ပညဳပညပ်အကြာဂှ် ဂကောံညးစၞး TNLA ကဵု ဒပ်ပၞာန်ဗမာတံ ဆဵုဂဗလဝ် ပ္ဍဲဍုၚ်ကူမေန်ရ။
ပ္ဍဲပရေၚ်ဆဵုဂဗဏံ ထပက်စၟတ်တဲပရေၚ်ဒေါအ်ပန်ပှော်ဂှ် ဒပ်ပၞာန်ဗမာတုပ်စိုတ် ဒေါအ်ကဵုပရေၚ်ကြဳဗုမ်ၜၚ်ကျာ ကေုာံ ဇူထောံ ပရေၚ်ထပက်ပၞာန်တံတုဲ လုပ်စိုပ်ကေတ်ကၠုၚ်ဒၞာဲ ပ္ဍဲမိုဝ်ကုက်၊ မိုဝ်မိက် ပ္ဍဲကၞောတ်ဂိတုနဝ်ဝမ်ပါဏံ မဒှ်ရ။
ပရိုၚ်-သြၚ်လောန်တိုင်မ်
Photo – MDY PDF