သေတ်တိုဲ၊ ဒဳဇြမ်ပါ ၁၃
ပ္ဍဲတွဵုရးရခေၚ် ဒၞာဲဟွံဆေၚ်ကဵုပွန်ပၞာန် ဒၞာဲကောန်ညးဍုၚ်ကွာန်တံ မံၚ်စံၚ်တန်တဴမံၚ် ပ္ဍဲကွာန်အရာပ်တံမ္ဂး ဗတိုက်လဝ်ကဵုပၞာန်ကျာ ဟိုတ်နူပရေၚ်ဖံက်ပကဝ် အခေါၚ်မၞိဟ်လ္တူကောန်ညးဍုၚ်ကွာန် ဟၟဲကဵုဒုဟ်ဂှ် ကရပ် ၁၂၀၀ ချိုတ်လဝ်ရောၚ် ဒပ်အာရက္ခ AA လလောၚ်တြးလဝ် ပ္ဍဲဒဳဇြမ်ပါ ၁၁ အခိၚ်ဗ္တံရ။
စနူကဵုသၞာံ ၂၀၂၃ ဂိတုနိုဝမ်ပါ ၁၃ ဒဵုကဵု သၞာံ ၂၀၂၅ ဂိတုနဝ်ဝမ်ပါ ၁၃ ပွိုၚ် ၂ သၞာံဏံမ္ဂး ပ္ဍဲကဵုတွဵုရးရခေၚ် ဒၞာဲပွန်ပၞာန်ဟွံသေၚ် ဒၞာဲကောန်အရာပ်တံမံၚ်စံၚ် ဟိုတ်နူပန်ဗတိုက်စုတ်လဝ်သက်က်ဂှ်တုဲ ကောန်ဍုၚ်ကွာန် ၁၁၅၂ တၠချိုတ်အာ၊ ဒးလဝ်ဝပ် ၂၁၅၃ တၠ နွံရ။
ဗွဲတၟေၚ် ပ္ဍဲကဵုတ္ၚဲအခေါၚ်အရာမၞိဟ်ဂၠးကဝ် ဂိတုဒဳဇြမ်ပါ ၁၀ အခိၚ်ဗ္တံဂှ် နူကဵုဒပ်ကဝ်မယှေန်ပၞာန် ရန်တၟံနွံနွံ နကဵုၜၚ်ကျာဂျက်ဖိုက်တာ ကၠုၚ်ဗတိုက်ကြဳဖျေံဗုမ် ၅၀၀ ပံၚ်ၜါမ လ္တူရုၚ်ဂဥုဲဇၞော် ဍုၚ်မျံက်ဥူ မဒှ်ရ။
ဟိုတ်နူကဵုဒပ်ကဝ်မယှေန်ပၞာန် ကြဳဖျေံဗုမ်ဗတိုက်ဏာဂှ်တှ်ေ ရုၚ်ဂဥုဲမွဲမ လီုလာ်အာတုဲ ညးဗြဴ ၁၇ တၠ၊ ညးတြုံ ၁၆ တၠ သီုကောန်ၚာ်ဗြဴ ပိဂိတုမွဲ မပါလုပ် မွဲအလန်ဓဝ်ချိုတ်အာလဝ် ပ္ဍဲဒၞာဲဂှ်ကီု ကောန်ညးဍုၚ်ကွာန်ဒုဟ်ဒဏ်ဟၟဲ ၇၆ တၠ ဒးလဝ်ဝပ်နွံမံၚ် AA သ္ဂးရ။
ရုၚ်ဂဥုဲဇၞော် ဍုၚ်မျံက်ဥူဟီုမ္ဂး ဒှ်မံၚ်ရုၚ်ဂဥုဲဇၞော် ပ္ဍဲဒေသရခေၚ် သွက်ညးဍုၚ်ကွာန်တံ ဂွံပဓာန်စမွဲ အကြာတင်ဝါတ်ခက်ခုဲနာနာ ဂကူဘာသာဟွံရုဲ ဝဳမံၚ်ကဵုတုဲ နကဵုပၞာန်ကျာ ရန်တၟံကၠောန်ဏာ ပကီုပရာတ် ဗီုလၟဟ်ဏံဂှ်တှ်ေ မ္ဒးဍုဟ်မၠိသ္အန်ဇရကွေံရောၚ် သ္ဂးရ။
တုဲပၠန် ပ္ဍဲဒေသအာရက္ခ ပ္ဍဲကဵုဒုဟ်ဒဏ်ကဝ်မယှေန်ပၞာန် ကၠောန်လဝ် တံမ္ဂး “လၟေၚ်ပရူပရာ ဒဒှ်ပရေအ်အိုတ်၊ သ္ကာတ်မြဟ်အိုတ် အမှုရာဇဝတ်ဇၞော်အိုတ်မွဲ၊ ကောန်ညးဍုၚ်ကွာန်ဒုဟ်ဒဏ်ဟၟဲ ဂအုံဂအုံကလောအ်ကလောအ် ဒးလဝ်ဝပ်၊ ချိုတ်လဝ်ဂၠိုၚ်အိုတ်မွဲ” မဒှ်ရောၚ် AA စၟတ်သမ္တီလဝ်ရ။
စနူကဵုသၞာံ ၂၀၂၅ ဂိတုဂျာန်နဝါရဳ ၃ ဒဵုကဵုနဝ်ဝမ်ပါ ၂၈ ပ္ဍဲပွိုၚ်ကရပ် မွဲသၞာံဏံမ္ဂး ပ္ဍဲကဵုတွဵုရးရခေၚ် ဒပ်ကဝ်မယှေန်ပၞာန် ဗတိုက်ကြဳလဝ် ဗုမ် ၉၂ ဝါဂှ် မၞိဟ်ချိုတ်လဝ် ၁၉၂ တၠ၊ ဒးလဝ်ဝပ် ၅၀၂ တၠနွံမံၚ် AA လလောၚ်တြးလဝ်ရ။
ပရိုၚ်-သြၚ်လောန်တိုင်မ်
Photo – Social Media