ၜဳလေၚ်၊ ဒဳဇြမ်ပါ ၁၅
တွဵုရးမန် ပွိုၚ်ဍုၚ်ၜဳလေၚ် ကရောၚ်ပၞာန် ဒပ်ကဝ်မယှေန်ပၞာန် ပန်စုတ်ဏာလွဟ်ဇၞော် ပ္ဍဲကဵုကွာန်ဖိုဝ်ဝတုၚ်ဂှ် ကောန်ကွာန်ချိုတ်အာ ၅ တၠတုဲ ဒးဘဲမကမ်ချိုတ်အာနွံ ညးဒေသတံ ဟီုကဵုဌာန်ပရိုၚ်သြင်လောန်တိုင်မ်ရ။
ပ္ဍဲကဵုကွာန်ဖိုဝ်ဝတုၚ်ဂှ် နူကဵုဇြဟတ်ဒပ်ကဝ်မယှေန်ပၞာန် ၁၀၀ ပြၚ်တံ ပ္ဍဲဒဳဇြမ်ပါ ၁၂ ၜိုတ်အခိၚ်နူဂယး ၉ နာဍဳ ပန်စုတ်ဏာလွဟ်ဇၞော် ၁၂၀ မမ ဟွံအောန်နူကဵုပန်မ မဒှ်ရ။
ဟိုတ်နူ ဒးဘဲမကမ် ကောန်ကွာန် ၅ တၠချိုတ်အာဏံဂှ် သီုညးဗြဴၜါ မပါလုပ်ချိုတ်အာတုဲ ဟွံအောန်နူကဵု ၄ တၠဂှ် ဒးလဝ်ဘဲဝပ်ရ။
ကရောၚ်ပၞာန်လုပ်စိုပ်ကၠုၚ် ပ္ဍဲကဵုကွာန်ဖိုဝ်ဝတုၚ်ဂှ် ဟွံကဵုအခေါၚ် ကောန်ကွာန်တံတိတ်မ္ၚးကွာန်၊ ရဲဒးလဝ်ဝပ်တံဂှ်လေဝ် ပလံၚ်ဏာရုၚ်ဂဥုဲ ၜဳလေၚ်ဟွံမာန်ဏီ သ္ဂးရ။
ပ္ဍဲဒဳဇြမ်ပါ ၁၃ အခိၚ်နူဂယးလေဝ် ကရောၚ်ပၞာန်လုပ်စိုပ်ကၠုၚ် ပ္ဍဲကွာန်အလူဇၞော် ပွိုၚ်ဍုၚ်ၜဳလေၚ်ဂှ် ရပ်စွံလဝ်ကောန်ကွာန်ၜိုတ် ၅၀ စွံလဝ်အဒေါဝ်ကွာန်တုဲ စၟဳစၟတ်ဂၠိုက်ဂၠာဲမံၚ်နွံ ညးဒေသတံဟီုတုဲ ဂွံတီရ။
ကွာန်ကရေၚ်ၜါကွာန် ဒပ်ပၞာန်ဗမာ ထပက်မံၚ်ကရောၚ်ပၞာန်ဏံဂှ် ဒှ်မံၚ်တိဍာ် KNU ခရိုၚ်သဓီု မဟာဒပ် (၁) တုဲ နူကဵုဌာန်ပရိုၚ် သြၚ်လောန်တိုၚ် ကေတ်အဆက်ကဵု ညးတာလျိုၚ်အခေါၚ်ဟီုဂးနွံ ခရိုၚ်သဓီုကီုလေဝ် ဟွံဂွံအဆက်ဏီရ။
ပ္ဍဲကဵုပွိုၚ်ဍုၚ်ၜဳလေၚ် အခိၚ်ကြပ်ကၠုၚ်မံၚ်ကဵုရုဲမာဲဏံ ကဝ်မယှေန်ပၞာန် ထပက်ကရောၚ်ပၞာန် ပန်မံၚ်လွဟ်ဇၞော် တံဂှ်ရ ညးဒေသလ္ၚဵု ထောံသ္ၚိဌာန်ဒးဂြိပ်ပါဲအောပ်မံၚ်နွံ ညးဒေသတံ ဟီုရ။
ပရိုၚ်-သြင်လောန်တိုင်မ်
Photo – CJ