ကျာ်ထဝ် ၊ ဒီဇြမ်ပါ ၁၇
ပ္ဍဲတွဵုရးမန် ပွိုၚ်ဍုၚ်ကျာ်ထဝ်ဂှ် ပလီုလဝ်ဂတဵုမုက်ဗော်အလံၚ်အမာတ် တံၚ်ဂြဲမာဲတံဂးတုဲ ပံက်လဝ်အမှု ညးတြုံပန်တၠရဂှ် နူကဝ်မယှေန်ပၞာန် လလောၚ်တြးပရိုၚ်ပ္ဍဲဒဳဇြမ်ပါ ၁၆ ဂှ်ရ။
တုဲကၠုၚ်ဒဳဇြမ်ပါ ၁၂ တေံ ဂတဵုမုက်တံၚ်ဂြဲမာဲ အလံၚ်အမာတ်ဗော်ညးဍုၚ်ကွာန်ဗစူစွံလဝ် ဂတမုက်ရုၚ်သ္ကိုပ်အုပ်ဓုပ် ကွာန်ဖက်ကလိက်ဂှ် ညးတြုံၜါတၠကၠုၚ်ထပက်ဂစိုက်ပလီုလဝ်နကဵုၜုန် သ္ဂးရ။
တုဲပၠန် ပ္ဍဲ ဒဳဇြမ်ပါ ၁၃ ဂှ်လေဝ် ဂတဵုမုက်တံၚ်ဂြဲမာဲ အလံၚ်အမာတ်ဗော် တစည ဗစူစွံလဝ် ဂတမုက်ရုၚ်သ္ကိုပ်အုပ်ဓုပ် ကွာန်ဖက်ကလိက်ဂှ်လေဝ် ညးတြုံတၞဟ်ၜါတၠထပ်ကၠုၚ်ဂစိုက်ပလီုလဝ်ကီုရ။
ဟိုတ်ဂှ်ရ အခိၚ်လၟုဟ်ဗက်ဂၠိုက်ဂၠာဲစၟဳစၟတ်မံၚ် ယၟုညးတြုံပန်တၠဏံတုဲ ပ္ဍဲကဵုဒပ်ဗၠာဲသၟိၚ်ၝောံဍုၚ်ကျာ်ထဝ်ဂှ် နကဵုဥပဒေစဵုဒၞာပေါဲရုဲမာဲ ၝောံပိုဒ် ၂၄(ခ) ပံက်လဝ်အမှုနွံမံၚ်ရောၚ် လပါ်ကဝ်မယှေန်ပၞာန် လလောၚ်တြးလဝ်ရ။
နူကဵုလပါ်ကဝ်မယှေန်ပၞာန် ပံက်လဝ်အမှု ဥပဒေၝောံပိုဒ် ၂၄(ခ) ယဝ်ရဒုဟ်ဒဏ်ကၠးမးမ္ဂး ဒးဒုၚ်ဖျေံထံၚ် ဒဵုကဵု ၁၀ သၞာံမာန်ရောၚ်။
ပ္ဍဲကွာန်ယိုက် ပွိုၚ်ဍုၚ်ၜါသွာၚ်ဂှ် တုဲကၠုၚ်နဝ်ဝမ်ပါ ၁၉ တေံ စောဲစပ်လဝ် ဂစိုက်ထောံစရၚ်ယၟု အလံၚ်အမာတ်ဂးတုဲ ဥူကျဝ်မျေအ် အာယုက် ၆၅ သၞာံဂှ် ကဝ်မယှေန်ပၞာန်ဖျေံဏာထံၚ် ၁၇ သၞာံ မဒှ်ရ။
ပရိုၚ်-သြင်လောန်တိုၚ်မ်
Photo – CJ