မတ်မလီု ၊ ဒီဇြမ်ပါ ၁၇
ပ္ဍဲကဵုတွဵုရးမန် ကဝ်မယှေန်ပၞာန်ပံက်ကၠုၚ်လဝ်ဘာတန်ဗတောန် ယိုက်ဝန်ပၞာန် ဒဵုကဵုလၟေၚ် ၂၀ ဏံ ညးဒုၚ်ပကောံလဝ်ကောန်ပၞာန်တၟိ ကြပ်ပေၚ် ၄၀၀၀ နွံမံၚ်ရောၚ်ဂှ် အတိုၚ်တင်နၚ်ဌာန်ပရိုင်သြၚ်လောန်တိုၚ်မ် ပကောံဂွံလဝ်ဂှ် ဂွံတီရ။
အခိၚ်ဒှ်မံၚ်ပေါဲဗတိုက် အလုံဍုၚ်ဒၞာဲပြးဇးဂှ် ကဝ်မယှေန်ပၞာန်ဒးဇီုကပိုက်မံၚ်ကဵု ပရေၚ်ဇြဟတ်ဆောံလေၚ်ဂၠိုၚ်လောန်အာတုဲ က္ဍိုပ်သ္ကိုပ်ပၞာန် ဂဥုပ်သ္ကိုပ်ပၞာန်ဇၞော် မေန်အံၚ်လှိုၚ် ပၠုပ်လဝ်လမျီု ဥပဒေယိုက်ဝန်ပၞာန် ပ္ဍဲကဵုသၞာံ ၂၀၂၄ ဂိတုဖေဖဝ်ဝါရဳ ၁၀ တေံရ။
ကဝ်မယှေန်ပၞာန်ပၠုပ်လမျီု ဥပဒေယိုက်ဝန်ပၞာန်တုဲ ပ္ဍဲကဵုဒၞာဲဍေံတံထိၚ်ချုက်လဝ်ဂှ် ပံက်ကၠုၚ် ဘာတန်ဗတောန်ယိုက်ဝန်ပၞာန် လၟေၚ်ဂိတုမ္ဂး ဒဵုကဵုလၟေၚ် ၂၀ ဝါ စိုပ်ကၠုၚ်မံၚ်ယျ။
ဘာတန်ဗတောန်ယိုက်ဝန်ပၞာန် လၟေၚ် ၂၀ ဝါဂှ် ပံက်လဝ် ပ္ဍဲကဵုဒၞာဲဒပ်ပကတ်ပကေၚ်ပၞာန် သၟဝ်တဲဌာန်ဂအုပ်ပၞာန်ရးအဂၞဲ ပ္ဍဲကဵုဂိတုဒဳဇြမ်ပါ ၁၅ ဏံ မဒှ်ရ။
အတိုၚ်တင်နၚ် ဌာန်ပရိုင်သြၚ်လောန်တိုၚ်မ် ပကောံဂွံလဝ်မ္ဂး ဘာယိုက်ဝန်ပၞာန်နူကဵုလၟေၚ် ၁ ဒဵုစိုပ် ၂၀ ဏံ ကောန်ပၞာန်ကြပ် ၄၀၀၀ ပကောံဂွံလဝ်တုဲ မွဲဂိတုမွဲဝါကောန်ပၞာန်တၟိကရပ် ၂၀၀ တၠ ပကောံဂွံလဝ်ရ။
မွဲလပါ်ဂှ်ပၠန် ကဝ်မယှေန်ပၞာန် ဓရတ်လဝ် သ္ကိုပ်အုပ်ဓုပ် အရာပ်/ကွာန်တံတုဲ ပံက်လဝ်ဘာပၞာန် လၟေၚ်ၚ်ဂိတုတံဏံ ညံၚ်ဂွံပလံၚ်ဗစိုပ်ကဵု ကောန်ပၞာန်တၟိတံမာန်ကီု ယဝ်ပလံၚ်ကဵုဟွံမာန်မ္ဂး ဒးဒုၚ်ဝန် ထပက်စၟတ်တဲရောၚ် ဂးရ။ ဟိုတ်နူကဝ်မယှေန်ပၞာန် ကဵုမံၚ်ဇြဟတ်ဟရိုဟ်ကၠောန်မံၚ်သာ်ဏံတုဲ သ္ကိုပ်အုပ်ဓုပ်တံ လိၚ်မၞိဟ်အဇာဟွံဂွံမ္ဂး သွက်ဂွံတိုန်ဘာတန်ဗတောန်ယိုက်ဝန်ပၞာန်ဂှ် သၟတ်တံဒးဂၠံက်မာဲပၞာန်ကီု ယဝ်ဟွံကၠုၚ်ဂၠံက်မာဲမ္ဂး ပလံၚ်လိက်ရုၚ်ကော်တုဲ ကော်ကေတ်ဏာသၟတ်တံ ဗွဲအတေၚ်အဓ္ဓမရ။
တုဲပၠန် သွက်ဂွံအာတိုန်ဘာပၞာန် စန်ဒက်မံၚ်သၟတ်တံ နကဵုသြန်ကီု အခိၚ်အခါဟွံသေၚ်တိက်မ္ၚးအခိၚ်ဗ္တံမ္ဂး ရပ်သၟတ်တံတုဲ ပကောံကေတ်မံၚ်ကောန်ပၞာန်တၟိ နနဲစုၚ်ၚ်ကၠောန်အာမံၚ်အတေၚ် ဗွဲအဓ္ဓမ မဒှ်ရ။
ပရိုၚ်-သြင်လောန်တိုၚ်မ်
Photo – MOI