ဍာ်ဗု၊ ဒဳဇြမ်ပါ ၂၄
ရးတနၚ်သဳ ပွိုၚ်ဍုၚ်ဍာ်ဗု ပေါဲဗတိုက်ၜါလပါ်ဒှ်လဝ် အကြာကွာန်ညှေန်ထိုဲကဵု ဇြဳကျဂှ် ကောန်ကဵုယာဲၜါတၠချိုတ်တုဲ ညးဍုၚ်ကွာန်ဒစာံတၠဒးလဝ်ဝပ်နွံ ဂွံတီနူညးဒေသတံကဵု ဂကောံပၠန်ဂတးတံရ။
ဒပ်ကဝ်မယှေန်ပၞာန်ဇြဟတ် ၄၀ ပြၚ် ကၠုၚ်ဖျေံလဝ်ဒပ် ပ္ဍဲကဵုဘာဝိပဿနာမိုဝ်ဂုက်ဂှ် ဒပ်ပံၚ်တောဲ ဂကောံမဟာမိတ်ဇြဟတ်ပၠန်ဂတးတံ ပ္ဍဲဒဳဇြမ်ပါ ၂၃ အခိၚ်ၜိုတ်နူဂယး ၇ နာဍဳလုပ်ဗတိုက်တုဲ ပေါဲဗတိုက်သ္ကာတ်မြဟ်ဒှ်အာရ။
လွဟ်ဇၞော်ဒတုံခတိုဟ်လဝ် နူကဵုပေါဲဗတိုက်ဂှ် ကောန်ၚာ်အယုက် ၉ သၞာံ မွဲတၠ၊ မိကောန်ၚာ် အယုက် ၄၀ မွဲတၠ ဒးအာမကမ်တုဲချိုတ်အာဂှ်ကီု သီုကဵုကောန်ကွာန် ၈ တၠ ကောန်ၚာ်တံမပါလုပ် ဒးအာဝပ်ဇၞော်ကဵုဇြဟတ်ရ။
ပ္ဍဲကဵုပေါဲဗတိုက်ၜါလပါ်ဒှ်လဝ်ဏံ ဒၞာဲစမြိုၚ်ဒၟံၚ် ဘာဝိပဿနာမိုဝ်ဂုက်လ္ၚဵု ဒးကဝေက်မကမ်နွံတုဲ သီုရဲၜါလပါ် အကာဲအရာ ဒးဘဲဒဏ်ချိုတ်ဂျိုၚ်ဂှ် ဟွံဂွံတီဏီပုဟ်။
ဟိုတ်နူပေါဲဗတိုက်ဏံ ကွဳစက်အာမံၚ်လ္တူဂၠံၚ်ဍာ်ဗု-ထဝါဲတံ လၟိဟ်ကဵုကၠမ်မာတ်ဆိုအ်အာတုဲ စိုပ်ၜိုတ်ဒေါဝ်တ္ၚဲ ၁၂ နာဍဳဂှ်မှ ကလေၚ်အာတရဴ လၟေၚ်ဓမ္မတာမာန်ပၠန် ညးဒေသတံဟီုရ။
တုဲကၠုၚ်ဒဳဇြမ်ပါ ၁၂ ဂှ်လေဝ် ပ္ဍဲကဵုဍုၚ်ဍာ်ဗု ရုၚ်ဗၠာဲသၟိၚ်ကဵုရုၚ်ပွိုၚ်ဍုၚ် ဌာနပရေၚ်အုပ်ဓုပ်တံ ဒပ်ပၠန်ဂတး လုပ်သီကေတ်တုဲ စံၚ်ပလီုထောံလဝ်ရ။
ပရိုၚ်-သြၚ်လောန်တိုၚ်မ်
Photo – PDF