ကျာ်ထဝ်၊ ဒဳဇြမ်ပါ ၂၄
ပ္ဍဲတွဵုရးမန် ပွိုၚ်ဍုၚ်ကျာ်ထဝ် ဂိက်သၞေဟ်ကၚ်မုက်ပလေၚ်ဒးဒုၚ်ဗတိုက်တုဲ ကောန်ပၞာန်ကဵုဒပ်ဗၠာဲသၟိၚ် ဒးအာဝပ် ၅ တၠနွံရဂှ် ဂွံလဝ်ပရိုၚ်နူကဵု ညးတာလျိုၚ်ဂကောံပၠန်ဂတးတံရ။
ဂိက်သၞေဟ်ကၚ်မုက်ပလေၚ် ယၟုဒယှ်မံၚ်လပါ်ပရေအ်ဂှ် ဒပ်ပံၚ်တောဲမဟာမိတ်ပၠန်ဂတးတံ ပ္ဍဲကဵုဒဳဇြမ်ပါ ၂၁ အခိၚ်ဒေါဝ်တ္ၚဲ ၜိုတ် ၁၂ ဂှ်အာပန်လဝ်ကဵုလွဟ်ဇၞော်တံရ။
ဟိုတ်ဂှ်ရ အကြာၜါလပါ် ဒှ်ပန်ညးသ္ကံ အခိၚ်မိနေတ်မွဲဍောတ်တုဲ ကွဳစက်အာတရဴတံလၟိဟ်ကဵုကၠမ် မာတ်ဆိုအ်မံၚ် လ္တူဂၠံၚ်အိုတ်ရ။
ရဲဒပ်ကဝ်မယှေန်ပၞာန် ဒးလဝ်ဝပ်နူကဵု ဂိက်သၞေဟ်ကၚ် မုက်ပလေၚ်ဏံဂှ် ဖ္ဍိုက်ပလံၚ်ဏာလဝ်ရုၚ်ဂဥုဲကျာ်ထဝ် နကဵုကွဳစက်ရုၚ်ဂဥုဲရဂှ် တမ်ရိုဟ်ကၞက်ပရိုၚ်ဗလးတိမွဲတၠ ဟီုကဵုဌာန်ပရိုၚ်သြၚ်လောန်တိုၚ်မ်ရ။
ပ္ဍဲကဵုတ္ၚဲ ဂိက်သၞေဟ်ကၚ်မုက်ပလေၚ် ဒးဒုၚ်ဗတိုက်လဝ်ဂှ်ရ ၜၚ်ကျာဒပ်ကဝ်မယှေန်ပၞာန် ကၠုၚ်ကြဳဖျေံဏာဗုမ် ပ္ဍဲကွာန်ခရဲ ဒၞာဲပေါဲဗတိုက်ဒှ်လဝ်ဟၟဲ သ္ဂးရ။
ဟိုတ်နူကဝ်မယှေန်ပၞာန် ကြဳဗုမ်ဗတိုက်လဝ်ကဵုၜၚ်ကျာဂှ် ဘာလကျာ်ပါၚ်ၜဳကဵု ကွဳလိုန်ဓါတ်မွဲမ ဒးဗုမ်လီုလာ်ကီုလေဝ် မၞိဟ်တံဒးလဝ်ဘဲဝပ်ဟၟဲပုဟ် ဂွံတီလဝ်နူကဵု ဗော်သွးကောန်ဂကူကရေၚ် KNU ခရိုၚ်သဓီုရ။
ဂိက်သၞေဟ်ကၚ်မုက်ပလေၚ်ဟီုဂှ် လ္တူညးဍုၚ်ကွာန်အာတရဴတံကီု ကွဳစက်ဖ္ဍိုက်ကပေါတ်ဗၞိက်တံကီု အာတ်သြန်တေၚ်မံၚ်အိုတ်အစောန်၊ ဂၠိုက်ဂၠာဲစၟဳစၟတ်လေဝ်ကြာန်ကွေံကွေံတုဲ ဂကောံပၠန်ဂတးတံ ကၠုၚ်ပန်မံၚ်မွဲဏှမွဲဏှကီု မဒှ်ရ။
ပရိုၚ်-သြၚ်လောန်တိုၚ်မ်
Photo – CJ