မတ်မလီု ၊ ဂျာန်နဝါရဳ ၉
ပေါဲရုဲမာဲသ္ကုတ် ၁ စကၠောန်လဝ် ဂိတုဒဳဇြမ်ပါတုဲကၠုၚ်တေံ ပ္ဍဲဒေသမန်၊ ကရေၚ်ကဵုရးတနၚ်သဳတံ ဒပ်ပၞာန်ဗမာတံ ဆက်ဖံက် ပကဝ်မံၚ်အခေါၚ်အရာမၞိဟ်နွံမံၚ်ဖိုဟ်ရောၚ်ဂှ် နူကဵုဖံၚ်ဒေယှေန်အခေါၚ်အရာမၞိဟ်ဍုၚ်မန် သ္ၚဳဂၠိပ်လဝ် ပ္ဍဲကဵုလၟေၚ်ဂိတုညးတံဂှ်ရ။
ပ္ဍဲကဵုဒေသတိဍာ် ဖံၚ်ဒေယှေန်အခေါၚ်အရာမၞိဟ်ဍုၚ်မန် ချဳဒရာၚ်မံၚ်ဂှ် တန်တဴကဵုလ္တူအကာဲအရာဲ ပရေၚ်ဖံက်ပကဝ်အခေါၚ်အရာမၞိဟ် ဗီုက္တဵုဒှ်ကၠုၚ်လဝ်တံဂှ်သၟာန်ညးဒေတံတုဲ ပ္ဍဲဂျာန်နဝါရဳ ၇ ဂှ် လလောၚ်တြးလဝ် သီုကဵုမဂၞန်တၚ်နၚ်တံရ။
အပ္ဍဲဏံဂှ်တှ်ေ ရပ်ထိၚ်လဝ်ဟၟဲကဵုပရေၚ်ဓရ်ယာဂှ် ၄၈ အမှု၊ ဒးဒုၚ်ကၠေၚ်ဒက် ၃၅ အမှု၊ ဒးဘဲဝပ် ၇၄ အမှု၊ ဒးဒုၚ်ဂစိုတ်လဝ် ၂၆ အမှုနွံတုဲ ဟိုတ်နူဒပ်ပၞာန်ဗတိုက်လဝ်ကဵုပၞာန်ကျာ၊ ပန်ကဵုလွဟ်ဇၞော် ကြဳဗုၚ် ဗတိုက်ကဵုဒရုၚ်တုဲ သ္ၚိဌာန်မၞိဟ်မံၚ် ၁၀၄ မ ဒးလီုလာ်အာလဝ်ရ။
တုဲပၠန် ပ္ဍဲကဵုဒေသကရေၚ်သ္ကုတ်သၠုၚ်ကျာ၊ ဒေသမန် သ္ကုတ်ဗၟံက်ကဵု ဒေသတနၚ်သဳသၠုၚ်ကျာတံဂှ် ဒပ်ပၞာန် စကာလဝ်ညးဒေသတံ နကဵုဂဒံၚ်မၞိဟ် ၁၉ အလန်နွံတုဲ အခိၚ်ဒပ်ပၞာန်ဗမာ ထပက်ကရောၚ်ပၞာန်ဂှ် သီကေတ်လဝ် ကွဳစက်ညးဍုၚ်ကွာန်တံ ၇၀ မနွံကီုရ။
လၟိဟ်ရဲဒဴပၞာန်ပဵုတိုန်ကၠုၚ် ပ္ဍဲတွဵုရးမန် ၅,၈၀၀ ပြၚ်၊ ပ္ဍဲတွဵုရးကရေၚ် ၁၁,၅၀၀ ပြၚ်ကေုာံ ပ္ဍဲရးတနၚ်သဳ ၉,၅၀၀ ပြၚ် အပံၚ်ဖအိုတ် နွံမံၚ် ၂၆,၈၀၀ ရဂှ် ထမံက်လဝ်သီုကဵုတၚ်နၚ်တံရ။
မွဲလပါ်ပၠန် သွက်ဂွံတိုန်ဘာပၞာန် သၟတ် ၂၈၀ ပြၚ် ဒးဒုၚ်ပကောံဏာကောန်ပၞာန်တၟိတုဲ ဗွဲတၟေၚ် ပ္ဍဲပေါဲရုဲမာဲဒေသမန်ကရေၚ်ဂှ် ဒပ်ပၞာန်ပတေၚ်လဝ်ပရေၚ်ဂီုကၠီု သ္ဂးရ။
အတိုၚ်ညးမၚ်လ္ၚတ်ဗလးတိ နူကဵုဖံၚ်ဒေယှေန်အခေါၚ်အရာမၞိဟ်ဍုၚ်မန်တံ ဆဵုလဝ်မ္ဂး ဓရ်ဖေက်ဂမၠိုၚ် ပြးဇးပေၚ်မံၚ်ဂှ်ကီု၊ ပရေၚ်ဘပဠနွံမံၚ်သၠဲသၠဲလးလးတုဲ ဟိုတ်နူဒပ်ပၞာန်ပတေၚ်လဝ် ပရေၚ်ဂီုကၠီုဂှ်ရ ပေါဲရုဲမာဲသ္ကုတ် ၁ ညးကၠုၚ်စုတ်မာဲ မၞိဟ်နွံညိညဓဝ်ကီုရ။
ပ္ဍဲကဵုတၚ်နၚ် ကဝ်မယှေန်ပေါဲရုဲမာဲကၟိန်ဍုၚ် လလောၚ်တြးလဝ်ဂှ်တှ်ေ ပ္ဍဲပေါဲရုဲမာဲသ္ကုတ် ၁ တွဵုရးမန် ညးအခေါၚ်ကဵုမာဲနွံမံၚ် ၅၉၀,၀၀၀ ပြၚ်ဂှ် ၂၃၀,၀၀၀ ပြၚ် ကၠုၚ်ကဵုမာဲတုဲ ညးကဵုမာဲနွံ ၃၉ ဒသမ ၅% ရ။
ယဝ်ရ တၟော်အာကဵု ပေါဲရုဲမာဲတုဲကၠုၚ် ၂၀၂၅ ကဵု ၂၀၂၀ တေံမ္ဂး နကဵုစိုတ်ဆန္ဒဇကု ညးကၠုၚ်ကဵုလဝ်မာဲဂှ် ဟွံဂွံဆဵုကေတ်လဝ်တုဲ ဟိုတ်နူဒးဒုၚ်ကဵုလဝ် ဇြဟတ်ဟရိုဟ်ဟေၚ် ကၠုၚ်ကဵုမာဲရောၚ် နူကဵုဖံၚ်ဒေယှေန် အခေါၚ်အရာမၞိဟ်ဍုၚ်မန် ထံက်ထ္ၜးရ။
တုဲပၠန် ယဝ်ရဟွံကဵုလဝ်မာဲမ္ဂး ပြဿနာလက်ကြဴ ဖေက်တောဲပါ ဍံၚ်ဗက်ကၠုၚ်ဂှ်ရ ဖေက်လကိုတ်မံၚ်အိုတ်တုဲ ပ္ဍဲပရေၚ်ကဵုမာဲဏံ နူကဵုသွာၚ်ရဲအုပ်ဓုပ်ကၠောန်လဝ် ပရေၚ်ယိုက်ဝန်ပၞာန်၊ အာတရဴ ဒးကေတ်လိက်ထံက်ဂလာန်တံ ဘပဠလဝ်နွံမံၚ်ထမံက်ထ္ၜးလဝ်ရ။
ဟိုတ်ဂှ်တုဲ ပ္ဍဲပေါဲရုဲမာဲသ္ကုတ် ၁ ဂှ် ညးကၠုၚ်စုတ်မာဲအောန်သၟးဟွံက ပရေၚ်ဘပဠရပ်စပ်မံၚ်တံ၊ ရဲထံက်ဂလာန်ဒပ်ပၞာန်တံ အုပ်လဝ်ဂတာတဲဖအိုတ်တုဲ ဒှ်ပေါဲရုဲမာဲထမံက်ထ္ၜးဆန္ဒ ညးဍုၚ်ကွာန်ရောၚ် ဟီုစဂွံ ဟွံဂွံပုဟ်ဂှ် လလောၚ်တြးကဵုလဝ်သမ္တီကီုရ။
ပရိုၚ်-သြၚ်လောန်တိုၚ်မ်
Photo – Social Media