လိုၚ်ဗၠဲ၊ ဂျာန်နဝါရဳ ၉
ထ္ၜးဟိုတ်ပေါဲရုဲမာဲတုဲ ဟိုတ်နူကရောၚ်ပၞာန်ဒပ်ကဝ်မယှေန်ပၞာန် ထပက်လုပ်ကၠုၚ်ပွိုၚ်ဍုၚ်လိုၚ်ဗၠဲ တွဵုရးကရေၚ်ဂှ်ရ ဂွိၚ်ဖက်ဒှ်ပေါဲဗတိုက်တုဲ ညးဒေသတံဂြိပ်ပါဲမံၚ်ရဂှ် ဂွံတီနူကဵုညးဒေသတံရ။
သွက်ဂွံကေတ်ကဵုပရေၚ်ဂီုကၠီု ပေါဲရုဲမာဲသ္ကုတ် ၂ ကၠောန်အာ ပ္ဍဲပွိုၚ်ဍုၚ်လိုၚ်ဗၠဲဂးတုဲ စနူဂိတုဂျာန်နဝါရဳ ပထမသတ္တဟဏံ နူကဵုဒပ်ကဝ်မယှေန်ပၞာန်ဗမာတံ ကရောၚ်ပၞာန်ဍိုက်လုပ်ကၠုၚ် နကဵုဇြဟတ်ပေၚ်ၚ်ဂှ်တုဲ အကြာညးဒေသတံ ဒှ်တိုန်ဒွိၚ်ဇၞော်ကဵုဇြဟတ်ရ။
ဒပ်ကဝ်မယှေန်ပၞာန်တံ စိုပ်ကၠုၚ်ကရပ်ဍုၚ်လိုၚ်ဗၠဲ၊ ကရောၚ်ပၞာန်တံစိုပ်မံၚ်သ္ကုတ်ဂၠံၚ် လိုၚ်ဗၠဲ-ပိုၚ်ကြုၚ် ကေုာံ သ္ကုတ်ဂၠံၚ် ထဳလုၚ်-တာပံၚ်ဂှ် ဖျေံလဝ်ဒပ်နွံမံၚ်ဂှ်ရ၊ ဒဒှ်ရ ဂွိၚ်ဖေက်ဒှ်ပေါဲဗတိုက်ကဵု ဒပ်ပၠန်ဂတးတံကီု ဖေက်ဒးဒုၚ်ရပ်ဒက်ပျဲပျာံကီုတုဲ ညးဒေသဗွဲမဂၠိုၚ်ဂြိပ်ပါဲတိတ်အာ ဒၞာဲတၞဟ်ဟ်ရဂှ် ဂွံလဝ်ပရိုၚ်နူကဵုညးဒေသတံရ။
ဗွဲတၟေၚ် ဒပ်ကဝ်မယှေန်ပၞာန် အဓိကထပက်လဝ်လ္တူဍုၚ်ပိုၚ်ကြုၚ်၊ ပ္ဍဲအရာပ်ကေုာံ ကွာန်ဗ္ဒာဲဗ္ဒာဲတံဂှ် ညးဍုၚ်ကွာန်တံ ဂြိပ်ပါဲအာအိုတ်ကီုလေဝ် ဒဵုစိုပ်ဂျာန်နဝါရဳ ၈ ဂှ် မုပေါဲဗတိုက်လေဝ်ဟွံဒှ်လဝ်ဏီပုဟ် ညးဒေသတံ သ္ဂးရ။
ပ္ဍဲပွိုၚ်ဍုၚ်လိုၚ်ဗၠဲ သွက်ဂွံကၠောန်အာပေါဲရုဲမာဲသ္ကုတ် ၂ ထ္ၜးဟိုတ်ပရေၚ်ဂီုကၠီုတုဲ ကဝ်မယှေန်ပၞာန် သွက်ဂွံအုပ်ဓလီုအာတိဍာ်လေဝ်ဒှ်မာန်၊ ဟိုတ်နူကိစ္စဒပ် BGF ပြံၚ်လှာဲယၟု KNA ပ္ဍဲကဵုဂျာန်နဝါရဳ ၁ တေံလေဝ် ဒှ်မာန်ရောၚ် ပရေၚ်သ္ၚဳဂၠိပ်ပါ်ပါဲတံနွံမံၚ်ကီုရ။
ပ္ဍဲဂျာန်နဝါရဳ ၁၁ ဏံ သွက်ဂွံကၠောန်အာ ပေါဲရုဲမာဲသ္ကုတ် ၂ ပ္ဍဲတွဵုရးကရေၚ် ပွိုၚ်ဍုၚ်လိုၚ်ဗၠဲကဵု ပွိုၚ်ဍုၚ်ဖာပေါန်ကီုလေဝ် အပ္ဍဲၜါပွိုၚ်ဍုၚ်ဏံမ္ဂး ဍုၚ်ဖာပေါန်ကဵု ဍုၚ်တၟိကွာန်သေံ၊ သီုကဵုအရာပ်ကွာန် သီုဖအိုတ် ၅၂ ဂအုံကွာန်တံဂှ် ဒှ်တိဍာ် ဟွံဒှ်ကၠောန်ပေါဲရုဲမာဲပုဟ် ကဝ်မယှေန်ပၞာန်လလောၚ်တြးလဝ်ရ။
ပ္ဍဲပွိုၚ်ဍုၚ်ဖာပေါန် ၜၚ်ကျာဒပ်ပၞာန်ဗမာတံ ကၠုၚ်ကြဳဖျေံမံၚ်ဗုမ် ဟွံလံဟွံလံနွံတုဲ ပေါဲရုဲမာဲဂှ်လ္တူဍုၚ်ကမမံၚ်ရ ဘိုအ်ဂွံကၠောန်အာ မဒှ်ရ။
ပ္ဍဲဒဳဇြမ်ပါ ၂၈ ကၠောန်လဝ်ပေါဲရုဲမာဲသ္ကုတ် ၁ တွဵုရးကရေၚ်ဂှ်တှ်ေ ပွိုၚ်ဍုၚ်ဖာအၚ်၊ ပွိုၚ်ဍုၚ်တာန်တံၚ်ဂျဳကဵု ပွိုၚ်ဍုၚ်ဗြဝတဳတံပါမံၚ်တုဲ အလုံသီုပိဒၞာဲဏံ ညးစၞးဗော်ပျဳခိုၚ်ဖျိုဝ်တံသီုဖအိုတ် ဇၞးလဝ်မာဲမဒှ်ရ။
ပရိုၚ်-သြၚ်လောန်တိုၚ်မ်
Photo – CJ