ဗိက်၊ မာတ် ၄
ပ္ဍဲတွဵုရးတၞၚ်သဳ နကဵုအခေါၚ်ဗၠးဒုဟ်ဒဏ်ကဝ်မယှေန်ပၞာန်ဂှ် ကောန်ထံၚ်ပရေၚ်ဍုၚ်ကွာန် ကြပ် ၁၅၀ တၠ နူထံၚ်ပိဒၞာဲ ကလိဂွံအခေါၚ်ဗၠးတိတ်ကၠုၚ်ယျရောၚ် ဂွံတီကေတ်နူဇာဖိုၚ်ကောန်ထံၚ် ပရေၚ်ဍုၚ်ကွာန်အလုံဍုၚ်ဗၟာ PPNM ရ။
ပ္ဍဲဂိတုမာတ် ၂ နဒဒှ်စၟတ်သမ္တီ တ္ၚဲသၟာဗ္ၚတုဲ သွက်ကောန်ထံၚ် ၁၀၀၀၀ ပြၚ် အလုံမွဲဍုၚ် ဒးဒုၚ်မံၚ်ဒုဟ်ဒဏ် ပ္ဍဲထံၚ်ဂမၠိုၚ်၊ ထံၚ်အချုက်နာနာတံဂှ် ကဵုအခေါၚ်ဗၠးဒုဟ်ဒဏ်တံရ။
အပ္ဍဲဂှ်မ္ဂး နူထံၚ်ကအ်သံၚ် ၆ တၠ၊ ထံၚ်ထဝါဲ ၁၀၈ တၠ၊ ထံၚ်ဗိက် ၃၅ တၠ သီုဖအိုတ် ၁၄၉ တၠ ဗၠးတိတ်ကၠုၚ်လဝ်ရောၚ် ဂွံတီနူအတိုၚ်တင်နင် PPNM ချူထ္ၜးလဝ်ရ။
အတိုၚ်တင်နင် PPNM ပကောံလဝ်မ္ဂး စဵုကဵုစိုပ်ဂိတုမာတ် ၃ အခိၚ်လဒေါဝ်တ္ၚဲ ၁ နာဍဳဂှ် ကောန်ထံၚ်ပရေၚ်ဍုၚ်ကွာန် ဒးဒုၚ်မံၚ်ဒုဟ်ဒဏ် ပ္ဍဲထံၚ်နာနာအလုံမွဲကၟိန်ဍုၚ် ၃၆၁၃ တၠဟေၚ် ဗၠးတိတ်ကၠုၚ်ဏီရောၚ် ချူလဝ်ရောၚ်။
လပါ်ကဝ်မယှေန်ပၞာန်ဂှ် နကဵုဥပဒေ ဗတိုက်သရိုဟ်ပရေၚ်ပကီုပရာတ် ၝောံပိုဒ် ၅၀(ည)၊ ၅၂(က) တံ သွက်ကောန်ထံၚ် ၇၃၃၇ တၠ ဒးဒုၚ်မံၚ်ဒုဟ်ဒဏ်တံဂှ် ကဵုအခေါၚ်ဗၠးဒုဟ်ဒဏ်ယျရောၚ် လလောၚ်တြးလဝ် ပ္ဍဲဂိတုမာတ် ၂ ရ။
တုဲပၠန် အမှုမၞုံပ္ဍဲရုၚ်သၞောဝ်ဓဝ် ၉၅၃၂ အမှု အဃောစဳရေၚ်မံၚ် မၞိဟ် ၁၂၄၈၇ တၠ မဒးဒုၚ်စောဲလဝ်အမှု နကဵု ဥပဒေဗတိုက်သရိုဟ် ပရေၚ်ပကီုပရာတ် ၝောံပိုဒ် ၅၀(ည)၊ ၅၂(က) တံဂှ် ကၟာတ်ထောံအမှုတုဲ ဗလးကဵုဏာမၞိဟ်တံရောၚ် လလောၚ်တြးလဝ်ရ။
ပရိုၚ် – သြၚ်လောန်တိုၚ်မ်
Photo – Dawei Watch