ဘာအၚ်၊ မာတ် ၄။
ပ္ဍဲတွဵုရးကရေၚ် ဍုၚ်ဗြဝတဳ ပယျဵုသေံ-ဗမာကဵု ဍုၚ်ယှိုဲကုက်ကိုတံ စနူဂိတုမာတ် ၃ ဂှ် ကၠေၚ်စက်ပိုတ်အာတုဲ ဆေၚ်သွံကၠေၚ်ဗွဲမဂၠိုၚ်ကၟာတ်လဝ်ရောၚ် ဂွံတီကေတ်နူညးဒေသတံရ။
ဟိုတ်နူပဋိပက္ခ ဒေသဗၟံက်လဒေါဝ်တုဲ နူကဵုဍုၚ်သေံပလံၚ်သွံမံၚ်ကၠေၚ် ဇရေၚ်ဍုၚ်မ္ၚးတံဂှ် ဒေါအ်လဝ်ကၠာရောၚ် ထမံက်ထ္ၜး လလောၚ်တြးလဝ် ပ္ဍဲဂိတုမာတ် ၁ တေံရ။
ဍုၚ်ပယျဵု ဗြဝတဳ ကေုာံ ဍုၚ်တၟိယှိုဲကုက်ကို အဓိကဒးဗ္ဒဗ္ဒါဲမံၚ် ကၠေၚ်စက်နူဍုၚ်သေံတံ ပ္ဍဲမာတ် ၃ အခိၚ်နူဂယးပြဟ်ဂှ် ညးဒေသတံ အာပၠံၚ်ရာန်မံၚ်ကၠေၚ် ပ္ဍဲဆေၚ်တံရ။
မၞိဟ်ဂမၠိုၚ်တံ ဟိုတ်နူအာပၠံၚ်ရာန်ကေတ်မံၚ်တုဲ ဆေၚ်သွံကၠေၚ်စက်ဇၞော်ဇၞော် ပ္ဍဲဍုၚ်ဗြဝတဳတံဂှ် နကဵုအပိုၚ်အခြာဟေၚ်သွံကဵုတုဲ ၚုဟ်ကၠေၚ်ဍေၚ်လေဝ် သၠုၚ်တိုန်အာဗွဲမပြဟ်ကီု၊ ပ္ဍဲအခိၚ်သဝ်တ္ၚဲ မာတ် ၃ ဂှ် ဆေၚ်သွံကၠေၚ်ဇၞော်ဇၞော် ကြပ်သီုဖအိုတ်ကၟာတ်အာယျ ညးဒေသမွဲတၠ သ္ဂးလဝ်ရောၚ်။
တုဲပၠန် ဟိုတ်နူပရိုၚ်ဍုၚ်သေံ ဒေါအ်လဝ်ပရေၚ်သွံကၠေၚ်တုဲ ပ္ဍဲဍုၚ်ယှိုဲကုက်ကိုဂှ်လေဝ် ဆေၚ်သွံကၠေၚ်စက်ဂမၠိုၚ် ကၟာတ်အာအိုတ် တုဲ အတိုၚ်အကာဲအရာပြဟ်ဟ်ဏအ်မ္ဂး သွက်ဂွံဂွံကၠေၚ်ပၠန်ဂှ် ဟၟဲလောဲသွာဏီပုဟ် ဂွံတီကေတ်နူညးဒေသတံရ။
ကၠေၚ်စက်နူဍုၚ်သေံ မတြးသွံမံၚ် ပ္ဍဲဍုၚ်ဗြဝတဳဂှ် စနူဂိတုဖေဖဝ်ဝါရဳ ၂၀၂၅ တေံကၟာတ်လဝ်တုဲ သွက်ဂွံသွံကၠေၚ်စက်မာန်ဂှ် ဒးရာန်စကာမံၚ်ကၠေၚ်စက် ဂၠံၚ်ကမၠတ်ဒမၠုနူသေံ ကေုာံ ကၠေၚ်စက်ကၠုၚ်နူအပ္ဍဲဍုၚ်တံရောၚ်။
အပ္ဍဲသတ္တဟတုဲကၠုၚ်ဏအ် ပ္ဍဲဍုၚ်ဗြဝတဳဂှ် ကဝ်မယှေန်ပၞာန်တံ ထ္ၜးဟိုတ်ဘဲပၟတ်ဂးတုဲ ဗက်ဂၠာဲရပ်မံၚ် ညးမသွံကၠေၚ်စက် ဒကဲဇိုၚ်ဂၠံၚ်တံကီု ပါဲနူဂှ်ပၠန် နူမတ်မလီု၊ ဘာအၚ်တေံ ကၠေၚ်စက်ကေတ်ဖ္ဍိုက်နၚ် ဇရေၚ်ဍုၚ်ဗြဝတဳဂှ်လေဝ် ဒပ်ပၞာန်ကဝ်မယှေန်ပၞာန်တံ ဗက်ဂၠာဲရပ်မံၚ်ကီုရောၚ်။
ပရိုၚ် – သြၚ်လောန်တိုၚ်မ်
Photo – CJ