ဗြဝတဳ၊ မာတ် ၅
ပံၚ်တောဲကဵု ဂကောံဒပ်ဗၠာဲသၟိၚ်သေံတုဲ ဗတိုက်သရိုဟ်အာ ဂိုဏ်လီသြန်အန်လာၚ် (ကျာဖျ) ပ္ဍဲဒေသအာယှဒိုဟ်အဂၞဲရောၚ် အဃောဂကောံ FBI အမေရိကာန် လလောၚ်ပတိတ်ပရိုၚ်ဂှ် လပါ်ကဝ်မယှေန်ပၞာန် ထပ်လုပ်ရပ်ထ္ၜးကဵုလဝ်ဂှ် ဂွံဏာကောန်ကမၠောန်ဂိုဏ်ကျာဖျ ပ္ဍဲပယျဵုသေံ-ဗၟာ လၟိဟ်ကဵုကၠမ်ရ။
သွက်ဂွံဗတိုက်သရိုဟ် ဂိုဏ်ရာဇဝတ်လီသြန်အန်လာၚ် (ကျာဖျ) မၞုံပ္ဍဲဒေသအာယှ ဒိုဟ်အဂၞဲတံဂှ် ပံၚ်တောဲကဵု ဂကောံဒပ်ဗၠာဲသၟိၚ်သေံ တုဲ ထမံက်မံၚ်ရုပ်ရဴရောၚ် ဂကောံ FBI အမေရိကာန် လလောၚ်တြးလဝ်ပရိုၚ် ပ္ဍဲဂိတုမာတ် ၃ တေံရ။
အပ္ဍဲဗီုရုပ် FBI ထမံက်ထ္ၜးလဝ်ဂှ်မ္ဂး သ္ကိုပ်တာလျိုၚ် FBI ကေုာံ ညးတာလျိုၚ်သေံတံ နကဵု ပၠံၚ်ဒ္ၚောဝ်ရံၚ်ကြပ် နူကဵုလပါ်ဍုၚ်သေံဏံ ဗီုရံၚ်အာမံၚ် ဒၞာဲစမြိုၚ်ဂိုဏ်ကျာဖျ ပ္ဍဲဇိုၚ်သြၚ်ၜဳသံၚ်ရေၚ် ပွိုၚ်ဍုၚ်ဗြဝတဳ တွဵုရးဍုၚ်ကရေၚ်တံ ပါလုပ်မံၚ်ရ။
နူ FBI ပတိတ်လိက်လလောၚ်တြး ပ္ဍဲတ္ၚဲမာတ် ၃ ဂှ်ကီု လပါ်ကဝ်မယှေန်ပၞာန်လေဝ် လုပ်စၟဳစၟတ် ပ္ဍဲဟဝ်တေလ် ဍုၚ်တာချဳလုက် ရးဒေသသေံတုဲ ရပ်ဂွံလဝ်ကောန်ကမၠောန် ဂိုဏ်ကျာဖျ ပွဳပွူ ၄၀၀ သီုကဵုကောန်ဍုၚ်ကြုက်တံ ပါလဝ်ဂၠိုၚ်အိုတ် ရဂှ် ကဝ်မယှေန်ပၞာန် လလောၚ်တြးလဝ်ပရိုၚ်ကီုရ။
သီုကဵုကောန်ကမၠောန်ဂိုဏ်ကျာဖျကြပ် ၄၀၀ ဂှ်ကီု ကောန်ပျူတာ၊ ဖုၚ်၊ သတာလေန် (Starlink) ကေုာံ ကပေါတ်ဆက်စပ်တံဂှ် ရပ်ဂွံလဝ်ရောၚ် ပ္ဍဲမာတ် ၄ ဂှ် လိက်ပရိုၚ်တြးဝါဒ ကဝ်မယှေန်ပၞာန် ချူလဝ်ရ။
တုဲပၠန် ပ္ဍဲဂိတုဖေဖဝ်ဝါရဳ ၂၆ တေံလေဝ် ပ္ဍဲကွာန်မေတ္တာလေၚ်မျာင် ပွိုၚ်ဍုၚ်ဗြဝတဳ ပ္ဍဲကဵုဒၞာဲစမြိုၚ် ဂိုဏ်ကျာဖျတၟိ သ္ကိုပ်ဒပ်မၚ်ပယျဵု BGF ဒုသ္ကိုပ်ပၞာန် သဝ်မုက်တုၚ်ဂှ် ဒပ်ပၞာန်ကဝ်မယှေန်ပၞာန် လုပ်ရပ်တုဲ ကောန်ကမၠောန် ၁၅၀ ပြၚ် ကဵု ကပေါတ်ဆက်စပ်တံဂှ် သီဂွံလဝ်ရ။
ကဝ်မယှေန်ပၞာန် လုပ်ရပ်ဂိုဏ်ကျာဖျတံဗီုဏအ်ဂှ် ဒှ်အရာထ္ၜးစ ဗီုပြၚ်သၟးရတုဲ ပ္ဍဲပွိုၚ်ဍုၚ်ဗြဝတဳဂှ် ဒၞာဲဆက်ကၠောန်မံၚ် ကမၠောန်ကျာဖျတံ သှ်ေမံၚ်ဗွဲမဂၠိုၚ်ဏီရောၚ် ညးဒေသဗြဝတဳတံ သ္ဂးရ။
သွက်ဂွံဗတိုက်သရိုဟ် ဂိုဏ်ကျာဖျတံရောၚ် ကဝ်မယှေန်ပၞာန် ဟီုမံၚ်ကီုလေဝ် ဟိုတ်နူအလဵုအသဳကြုက် ကဵုနၚ်ပရိုၚ်တုဲ ညးပါလုပ်မံၚ် ပ္ဍဲအရာပရေၚ်ဗတိုက်သရိုဟ်ဏအ် ဂဥုပ်ဗၠာဲသၟိၚ် (ဒုသ္ကိုပ်ပၞာန်ဗၠာဲသၟိၚ်ဇၞော်) ဥူဝေန်ဇြဝ်မဵု ကဵု ညးတာလျိုၚ်အဆံၚ်သၠုၚ်လ္ၚဵုတံဂှ် ကဝ်မယှေန်ပၞာန် ကလေၚ်ရပ်ထိၚ်လဝ်ရောၚ် ဂွံတီကေတ်လဝ်ရ။
ပရိုၚ် – သြၚ်လောန်တိုၚ်မ်
Photo – CJ