မတ်မလီု၊ မာတ် ၅။
ဟိုတ်နူ ဇြဟတ်ပၞာန်ယအ်စှ်ေအာတုဲ ကလေၚ်ပၠုပ်လမျီု စကာကၠုၚ် လဝ် ဥပဒေယိုက်ဝန်ပၞာန် ညးဍုၚ်ကွာန်ဂှ် ကဝ်မယှေန်ပၞာန် ပကောံဂွံလဝ် ကောန်ပၞာန်တၟိယိုက်ဝန်ပၞာန် လၟိဟ် ပေၚ်အာမွဲကိုတ် တုဲယျ။
သွက်ဂွံယိုက်ဂၠေၚ်တာလျိုၚ် ပရေၚ်စဵုဒၞာဍုၚ်ကေုာံ ပရေၚ်ဂီုကၠီု ထ္ၜးဟိုတ်သာ်ဏအ်တုဲ ဘာကွတ်ဗ္တောန်ယိုက်ဝန်ပၞာန် နူလၟေၚ် ၁ စဵုကဵုစိုပ် လၟေၚ် ၂၀ ကဝ်မယှေန်ပၞာန် စှ်ေလဝ်ဘာပၞာန်တုဲအာ မဒှ်ရ။
ဘာတန်ဗတောန်ယိုက်ဝန်ပၞာန် မွဲမွဲလၟေၚ်မ္ဂး ကဝ်မယှေန်ပၞာန် ရန်လဝ် ကောန်ပၞာန် ၅၀၀၀ တုဲ ပ္ဍဲဂိတုမာတ် ၃ တေံ ဘာတန်ဗ္တောန် ယိုက်ဝန်ပၞာန် လၟေၚ် ၂၀ စှ်ေဘာပၞာန် တုဲဒှ်အာတုဲ ကောန်ပၞာန် ပကောံဂွံလဝ် သီုဖအိုတ်ပေၚ်အာမွဲကိုတ်ရောၚ် သ္ဂးမာန်ရ။
တၠအဝဵုတြေံ ဥူတာန်ယှိုဲ ပတိတ်လဝ် ဥပဒေယိုက်ဝန်ပၞာန်ညးဍုၚ်ကွာန် နူအခိၚ်တေံဂှ် ဂကောံပၞာန်သီအဝဵုလၟုဟ်ဏံ ကလေၚ်ပၠုပ်လမျီုစကာကၠုၚ်လဝ် ပ္ဍဲသၞာံ ၂၀၂၄ ဂိတုဖေဖဝ်ဝါရဳ ၁၀ တေံရောၚ်။
အတိုၚ် သၞောဝ်ဥပဒေယိုက်ဝန်ပၞာန် ညးဍုၚ်ကွာန်မ္ဂး ဇၟာပ်ကောန်ဍုၚ် နူအာယုက် ၁၈ သၞာံ စဵုကဵု ၃၅ သၞာံတံဂှ် ဒးယိုက်ဝန်ပၞာန် အောန်အိုတ် ၂ သၞာံ စဵုကဵု ၅ သၞာံရောၚ်။
ညးမယိုက်ဝန်ပၞာန်တံဂှ် ပါဲနူဘာသာကွတ် ပရေၚ်ခိုၚ်ဗိုန် ကေုာံပၠဒပ်တုဲ ဘာသာရပ်နဲကဲဗျူဟာပၞာန် အရာမစီုသကီုဗလးတိ မုက်ပၞာန်၊ နဲပၞာန်ဗျူဟာတၟေၚ်၊ ပရေၚ်ဂီုကၠီုပၞာန်ကေုာံ ပရေၚ်ဗတိုက်သၠေက်တံဂှ် ကဵုလ္ၚတ်ဗတောန်ကဵုလဝ်ရောၚ် ကံၚ်သဳပၞာန် လလောၚ်တြးလဝ်ရ။
ညးဒးဒုၚ်ပကောံယိုက်ဝန်ပၞာန် နကဵုအဓ္ဓမတံဂှ် ပ္ဍဲဘာတန်ဗ္တောန်ပၞာန်ကီု သီုကဵုပ္ဍဲဗလးတိမုက်ပၞာန် ဒးဒုၚ်ဍဵုဍိုက်စကာမံၚ်တုဲ ဒးဒုၚ်ပျဲပျာံကဵုမံၚ်ဒုဟ်ဒဏ်တံနွံမံၚ်ရောၚ် ဂွံတီလဝ်နူလိက်ဒုၚ်စဳရေၚ် အလဵုအသဳညဳသၟဟ်ကောန်ဂကူ NUG ချူလဝ်ရ။
ညးမစှ်ေဘာယိုက်ဝန်ပၞာန်တံဂှ် ဒးတိတ်ဗတိုက်မံၚ် ပ္ဍဲကဵုမုက်ပၞာန်တေံကီု၊ ဒးယိုက်ဂၠေၚ်တာလျိုၚ်ပရေၚ်ဂီုကၠီု၊ ဒးကံက်အခေါန်၊ ဒးပသောင်မာၚ်တိုပ်တိ၊ ပ္ဍဲအရာသိုၚ်ခၞံဗ္ဒိုပ်ပၞာန်ဂှ် ဒးဒုၚ်ရပ်စကာ ဗွဲအဓ္ဓမတုဲ ဒးကေတ်မံၚ်တာလျိုၚ်ပၞာန်တံရောၚ် ဂွံတီရ။
မွဲလပါ်ပၠန် နကဵုကဝ်မယှေန်ပၞာန် သွက်ဂွံပံက်ဘာယိုက်ဝန်ပၞာန်ညးဍုၚ်ကွာန် လၟေၚ် ၂၃ မာန်ပၠန်ဂှ် ပ္ဍဲဂိတုဏံ ကံက်ပကောံဓရတ်ကေတ်မံၚ် ကောန်ပၞာန်တၟိ နကဵုနဲကဲနာနာဗက်ကၠောန်မံၚ် အိုတ်ရ။
ပရိုၚ် – သြၚ်လောန်တိုၚ်မ်
Photo – MOI